我只不過喺自修室溫書，點知比我遇番佢。: <六十>尋回記憶的旅程(二)

然後我地就去咗行大東夜市，雖然唔係全台灣最出名嘅，但係都好想見識下。
 
講到食我就興奮至極，我每食一樣嘢都影俾小涼睇，落得佢一個羨慕妒忌恨啊！
 
我見到檔惡魔雞排，啲雞排即叫即炸，好似好正咁，仲有極辣揀，對我呢個辛辣達人黎講簡直係福音。
 
可惜因為係即叫即炸，班乾細佬竟然唔理我..走咗去！
 
「成班得番你有人性！」
 


「你咪當俾佢地拍下拖囉。」小霖講。
 
「咁你呢？我就因為小涼黎唔到先焗住一個姐，真係唔諗住搵番件？」
 
「咁阿豪夠係單身啦。」
 
「佢同我地玩開嘛，況且係你唔接受佢。」
 
「怪我嚕。」
 


「你咁多裙下之臣都睇唔上？」
 
「個個都係以貌取人，都唔係真係鐘意我。」
 
「咁鬼叫你生得靚，鐘意你性格嘅你又唔鐘意。」
 
「可能喺個trip我就搵到呢。」
 
「你再係咁痴住我搵到就奇啊！」
 


「嫌我煩啦加陣！」佢作狀打落黎。
 
「唔玩啦 ，有得食啦！」我迫不及待拎黎食，果然好食啊！外脆內軟，又多汁，啲辣都唔係講笑。
 
「你試下 ！」我同佢講。
 
「下…」
 
「下咩啊，快啲啦，好正。」佢食完果下我先突然醒起，佢小小都唔食得辣架喎！
 
「咳咳咳，嘩好辣！」我即刻幫佢掃背，等佢冇咁辛苦。
 
「傻咗咩，唔食得就唔好隔眼。」
 
佢即刻飲兩啖佢手上杯金桔檸檬止辣，之後講：「唔係啊，都幾好食。」


 
仲死頂喎..
 
「唔食得辣就..咳咳咳！」一邊講嘢就唔好食嘢，認真的，我唔覺意吞咗啲辛辣粉，啃親。
 
「唉，冇嘢啊？」佢拍番我背脊。
 
「飲啖嘢啦！」佢遞咗佢杯嘢飲俾我，我諗都冇諗就飲咗先。
 
「點解你食嘢咁易啃親架？以前食麥當勞又係咁。」
 
「唉唔好提，都唔明食個薯條都會啃到，我又同你夾份食一個開心樂園餐，搞到得一杯嘢飲。」
 
「咪又係我杯嘢飲救咗你！」
 


「係啦..叻啦，去搵佢地啦。」
 
「呃！打完齋唔要和尚！」佢追住我。
 
最後我地成班行咗足足三個圈先肯走，走果陣都11點幾。
 
 
---------------------------------------------------------------------------------------------------------------------

小霖OS篇

我地去到大東夜市，就四周圍搵嘢食，呢到啲食物都好吸引啊，腸到我口水都漏埋，阿楓好好啊，所有我食嘅都係佢出錢。
 
之後佢喺檔雞排檔前面停咗落黎，佢地全部都走開曬，我唯有陪住佢啦。
 


「成班得番你有人性！」阿楓講，其實我只係想陪你姐。
 
「你咪當俾佢地拍下拖囉。」但係唔通我又真係講出口咩。
 
「咁你呢？我就因為小涼黎唔到先焗住一個姐，真係唔諗住搵番件？」我只係怕搵唔到一個好似你咁對我嘅人。
 
「咁阿豪夠係單身啦。」
 
「佢同我地玩開嘛，況且係你唔接受佢。」
 
「怪我嚕。」
 
「你咁多裙下之臣都睇唔上？」佢地點同你比？
 
「個個都係以貌取人，都唔係真係鐘意我。」但係偏偏最了解我嘅，就唔係鐘意我嘅。


 
「咁鬼叫你生得靚，鐘意你性格嘅你又唔鐘意。」
 
「可能喺個trip我就搵到呢。」
 
「你再係咁痴住我搵到就奇啊！」有得揀我都唔想走…
 
「嫌我煩啦加陣！」我要仍然保持住..好朋友嘅角色。
 


「唔玩啦 ，有得食啦！」佢好快就拎黎食，成個大細路咁，但係睇落都..好辣。
 
「你試下 ！」佢隊埋黎。
 
「下…」佢明知我唔食得辣架…
 
「下咩啊，快啲啦，好正。」算啦，費時佢失望，死就死啦。
 
「咳咳咳，嘩好辣！」我即刻咳咗出黎，真係好辣。
 
「傻咗咩，唔食得就唔好隔眼。」你高興我有咩所謂。
 
我即刻飲兩啖手上杯金桔檸檬止辣，之後死頂：「唔係啊，都幾好食。」
 
其實我條脷已經痺曬啦…
 
「唔食得辣就..咳咳咳！」個傻佬又啃親，哈哈。
 
「唉，冇嘢啊？」
 
「飲啖嘢啦！」我遞咗杯嘢飲俾佢，佢諗都冇諗就飲咗先。
 
「點解你食嘢咁易啃親架？以前食麥當勞又係咁。」由細到大都係咁，傻仔。
 
「唉唔好提，都唔明食個薯條都會啃到，我又同你夾份食一個開心樂園餐，搞到得一杯嘢飲。」諗番起都好好笑，佢又要貪快幾條幾條咁食，百厭到。
 
不過佢唔咁白痴..又洗乜需要我..？
 
「咪又係我杯嘢飲救咗你！」
 
「係啦..叻啦，去搵佢地啦。」佢之後跑走咗。
 
「呃！打完齋唔要和尚！」
 
但係我知道..佢一定記錯咗小涼先係食辣果個。果然喺佢心目中，我已經冇小涼咁重要了嗎？

(你地可以睇番阿楓同小涼嘅約會篇)