我只不過喺自修室溫書，點知比我遇番佢。: <六十>尋回記憶的旅程(一)
「台灣 we are coming！！」去到下就，我地就現身香港機場，出發去grad trip。
講真我地真係期待咗好耐。
人總係犯賤嘅，當冇假放果陣就好想放，當有假放果陣，放得多會悶，唔洗出街就會呆喺屋企。
「啦，阿楓，呢到得你同我冇王管，幾大都玩盡去啊今次！」阿月講。
係啊，今次阿靜同小涼冇去，阿靜同佢屋企人去日本未番，小涼同佢啲同學去。
「係啊係啊，但聽講我地係去台南，冇咩玩架炸喎。」佢肯定想獨自去偷歡我謝絕你監管咁款。
「去到先算啦，gogogo！」佢係咪食咗過期春藥..
喺飛機上面，當我仲期待緊會唔會有咩艷遇果陣..講笑姐，阿豪就行埋黎坐咗喺我隔離。
「做咩啊，好失望？」佢問。
「你話呢屌！」不過都好，好過唔知有咩奇形怪狀坐落黎我仲驚。
搞搞下去到台中都已經6點半，我地要坐1個鐘頭巴士去高鐵站去台南。
我地喺7仔買完啲乾糧之後就準備買飛，突然有兩個男人問我地去邊，話車我地。
「信唔信得過架..？」開頭我都驚好似大陸果啲咁，講好一個價，落車一個價，好彩就冇，佢地好好人咁車到我地去民宿，雖然去到都12點..
我地去到民宿之後就為咗同房而分組，阿言同阿星、阿豪同阿月即刻企埋一齊，分成2隊。咁即係杯我姐...
「你兩個都唔放心我同是但一個瞓架啦？」我指住阿晴同子妮，再問阿言同阿星。
「唔緊要啦..咁我同你同房囉..」小霖講。
「你唔介意我都冇所謂啦！」
估唔到間民宿幾正，每間房都有一個廁所，只係...
「得一張雙人床咋喎...」我講。
「都要照瞓架啦...」
「一係我瞓地下，俾你瞓床啦。」
「呢到仲邊有地鋪俾你鋪姐，一齊瞓啦，地下都凍。」
「噢..好啊..」媽的屌，突然好尷尬，我地塊面都紅曬。
「我沖涼先啦咁！」佢講。
「哦..」
「做咩姐你，呆曬咁？」
「冇..冇嘢啊，我去搵阿月佢地啦咁。」
「嗯，咁我沖完果黎搵你地啦。」
我即刻跑去阿月間房去消暑，雖然頭先有開冷氣，但係我緊張到成身好熱，我驚再留喺果到，聽到啲水聲我會爆血管。
「嘩，阿楓你正啦，有小霖陪你瞓，我話玩盡去姐，估唔到你真係夠膽死玩到咁盡！」
「喂 ！」我喝住佢，再瞟一瞟阿豪。
「唔緊要喎，我冇嘢架喎，有嘢都唔跟你地啦。」佢講。
「你唔跟我地仲有朋友咩？」我笑佢。
「我冇朋友架喎，我得自己一個架炸。」阿豪講，佢係咪痴咗？
「你小心阿月太掛住阿靜飢餓擒咗你啊。」
「我屌你啊，我洗擒個死肥仔，我打飛機唔好？」佢講。
「咪講咁多啦，鬥下地主先啦！」我講。
.
.
「火箭、三帶一，結啦！」我終於贏，我終於炒到佢地啊！
「轉運啊你，贏咁多鋪？」
「我發威..」
「阿楓到你沖啦！」我未講完就有把聲截住我。
我向後一望，小霖著住咗件粉紅色睡衣，個頭濕漉漉咁，靚到陷啊真係。
「woo，楓哥你小心把持唔住啊！」果兩條契弟講。
「仆街啦你地！」
我沖完涼之後佢地都冇聚埋一齊玩，因為都已經2點幾，加上舟車勞頓完都攰。
「沖完啦？」小霖坐咗喺床玩電話。
「你估下。」真係好笑，明知故問。
「啊，玩我啊！」
我正想上床之際，佢喝住我。
「喂！」
「做咩啊？」
「吹咗頭先啦！攝親架會！」
「唔會啦，平時都係咁。」
「唔得！吹頭！」
「唔吹！」
「吹啊！ ！」佢拉起我，拉到去床邊，然後拎起風筒幫我吹頭。
「啊...我自己吹得啦。」我都有啲唔好意思。
「幫你吹埋啦，費時你一陣又吹唔乾。」
佢吹頭手勢又幾好，好舒服。
「記唔記得你都幫我吹過頭？」我問佢。
「記得啊，果次auntie係都要你吹咗頭先食飯，你個百厭星死都唔聽。」
「之後我又被你拉咗入廁所吹頭。」
「估唔到你咁多年都係咁，咁鬼懶！吹完啦，瞓啦！」
瞓啦，我怕怕噢..
我熄咗燈之後上咗床，我成個人都繃到緊曬唔敢亂郁。間房就得番我地嘅呼吸聲，但係都足夠我心跳加快一百倍。
「估唔到我地仲有機會瞓埋一齊。」大佬啊，呢個時候你唔好講啲咁挑逗性嘅說話啦。
「細個瞓一齊就冇所謂啦，大個就..」
「點解大個咗就有所謂？人大咗就一定會變？」
「下...」
「阿楓啊 。」
「嗯？」
「呢幾日可唔可以同我做一件事？」
「做咩啊？」
「不如我地一齊搵番啲細個嘅回憶啊。」
「喺台灣搵細個嘅回憶？」
「搵回憶唔係睇喺邊嘅，睇同邊個架姐。」講完佢就轉過黎望住我。
喺明月嘅映照下，佢雙眸仍然晶瑩剔透，眼仔碌碌咁。
「啊..你話點就點啦..」
「好耶！咁瞓啦，夜啦，早抖！」之後佢又轉番過去。
上次同小霖一齊瞓好似已經係三年班嘅事，雖然只係瞓下晏教，但係都計啦。
不過細個邊有諗咁多，眼瞓咪瞓囉。但係而家經歷過咁多嘢，都唔會再咁純樸。
諗諗下我都不知不覺咁..瞓著咗。
「Woww！」第二朝起身，突然間聽到床邊有人喺到大嗌，嚇得我鳩都縮。
我攣大眼睇，竟然係隔離房果兩條契弟入咗黎。
「做咩啊..」小霖都佢地嘈醒咗問，我都唔知發生緊咩事，淨係覺得有啲軟冧冧嘅嘢壓住咗自己，同埋見佢地拎住部電話唔知影乜..
拎住電話？影相？shit！
我回過神望一望，我原來痴住咗小霖黎瞓！唉死啦，今次水洗都唔清。
「啊..sorry..」我發現之後即刻縮番開手。
「唔…唔..緊要。」
「哈哈，我地已經影低你地嘅通姦證據！」阿月笑住講。
「喂屌唔好亂講啦，快啲del咗去啦！」
「我唔del！啊，阿豪啊，我地好似多咗個阿四可以用啦喎。」兩個賤人...
「咩阿四啊？」阿言突然喺後面殺上黎。
「冇..冇..嘢啊 ！」兩條友好似做咗虧心事咁走咗番房。
「你兩個快啲啦，就走啦，唔好嘥時間啦。」講完佢就落番去。
「啊...頭先真係..唔好意思..。」得番我地兩個，果浸尷尬嘅氣氛又再次彌漫起來。
「唔緊要...我去刷牙先！」佢急急腳咁沖入廁所，塊面仲紅曬咁。
「喂！」我叫住佢，佢即刻立曬正咁。
「係！」
「你未拎牙刷。」
「係喎..哈哈！」
佢入咗去之後，我個心跳依然冇回復正常，係咁跳係咁跳。
經過咗個咁尷尬嘅起身方式，我地好快就準備好出發，唔知點解佢好似好快當冇事發生咁，繼續同我有講有笑。
我就好似做咗佢侍從咁，佢去到邊我就去邊。
我地第一日就去咗好多地方。首先我地就去咗林百貨，我地由民宿果到行過去，都幾係嘢。行到我地都身水身汗。
到咗林百貨，我同阿星都迫不及待咁跑入去吹冷氣。但係我一起跑就即刻俾人扯住咗。
「喂！又試唔抹汗就入冷氣地方！」原來係小霖拉住我。
講完佢就拎張紙巾幫我抹汗，好似以前咁，好似我打完籃球之後咁。
「wooo~~」佢地又喺到叫囂。
「眾目睽睽..會唔會唔係咁好啊？」
「一陣你真係病咗我唔會照顧你架喎，況且..你唔記得尋晚應承咗我啲咩啦？」
「但係..」
「入得去啦，行啦。」講完佢就拉咗我入去。
其實林百貨都幾多得意嘢，好多都喺香港好少見。最重要係，入面大部分貨品都係啲手作作品。呢個行業唔係冇得發展，只係香港人唔肯同冇資源發展，先俾人覺得手工業係冇作為。
「嘩，呢副眼鏡好靚啊。」阿晴拎咗副眼鏡黎睇，副眼鏡係全木造嘅，應該係平光鏡黎。
「鐘意咪買囉，我送俾你啊。」
「唔洗啦，成千蚊講錢架。」
「唔緊要啦，最緊要你鐘意。」
「唔好啦唔好啦！有錢都唔係咁用。」阿晴真係慳家。
「唉，好啦好啦。」
「呢個咕塾好得意啊，有個人頭嘅。」小霖講。
咕塾..哈哈我突然諗起櫻木同晴子。
「一個櫻木我嘅，另一個..晴子...就係你嘅。」
「阿楓，阿楓！你諗緊咩啊？」小霖問我。
「冇..冇啊，真係幾可愛喎，哈哈。」
我地喺入面行咗個幾鐘頭，真係好多嘢行，加上果到設計好古典，行到入去都成浸文青味。
去完林百貨我地就去咗試魯肉飯，啲魯肉真係好入味，不過就少咗啲，兩嘢就食曬。搞到我之後要去買番個日船小丸子食。日船小丸子喺香港都有得食，係我最鐘意嘅小食之一，小涼都好鐘意食。
「嘩，呢到啲日船咁平嘅？10蚊盒炸，香港都廿幾蚊！」阿豪見到個價錢都嚇親。
我買完之後即刻whatsapp影比小涼睇。
「嘩，日船正啊！」佢好快就應我。
「10蚊盒炸，哈哈，平到喊。」
「啊..我好想食啊！」
「我番到黎再陪你食啦！」
「好啦..」
之後我地就去咗「藍曬圖」，佢起到好似一個小區咁，又係一個充滿文化氣息嘅地方。又有陶瓷整，仲有好多塗鴉。
入夜之後仲靚，果到頂層係一個藍色世界，有好多藍色吊燈整成嘅一個區域，極之浪漫。
「我地影相啊，阿楓！」小霖講。
「又影？影咗好多啦喎。」
「快啲啦快啲啦。」講完佢就挽住我手臂。我就擺咗個好無奈嘅樣。
「你洗唔洗係咁睇番啲相啊？」我問。
「一係就咁多年都唔影，一係就影咁多，係要睇清楚啦！」
確實我地好多相都影得幾靚嘅。
「你睇下呢張！你好似狗仔咁俾我摸住個頭，同細個有張相一樣架！」
「俾我睇過..係喎，果張相我仲放咗喺屋企。」
「我電話有啊！」咁都有？有冇咁橋？
哦~~原來佢將佢自己細個啲相放咗落drive。
「你啲相都有好多我出現，哈哈。」
「我人生都係有住你架啦...」佢講得好細聲。
「下？」
「冇嘢啦，我地繼續行啦，哈哈。」
其實我係聽到嘅..只係扮聽唔到。
而我地出到去先發現..原來佢一直都蹺住我隻手，仲好實。