我只不過喺自修室溫書，點知比我遇番佢。: <五十八>DSE
Last day 完咗，Study leave就隨之開始。人地話study leave開始之後先係真正見真章嘅開始，成敗得失就睇呢個幾月肯努力幾多。
我就當然唔會吝嗇自己嘅勞力同努力，盡力chur盡呢個幾月，無論小霖同小涼點樣chur我，我都唔會有怨言，我一定要入到大學！
不過可能小涼都明白物極必反嘅道理佢都冇chur得我咁緊，適當時大家都會抖下，咁樣佢又開心，我都輕鬆唔少。無謂再俾啲無謂嘢擾亂我地考試嘅情緒啦。
「死啦..聽日就考中文啦..係我最弱果科。」小涼講，佢其他科都唔錯，係中文弱咗啲。呢段日子，我都已經盡量幫佢。
「唔洗太驚嘅，好多人都會炒份閱讀啦。」
「但係我係綜合同作文弱啊..」
「呢個時候驚都冇用，今晚早啲瞓啦，抖足精神，唔好去錯試場啊。」去錯我就真係幫唔到佢，我同小霖都揀咗個近我地學校嘅區，反而我同小霖就有幾個試場都一樣。
臨瞓前我就係到諗..聽日就係DSE啦..驚咗咁耐嘅嘢，終於都到。
一朝早我就起身準備，令自己保持一個好精神嘅狀態。
去到試場之後，見到個個都拎住啲ZZ或者果個燒完嘅筆記死刨爛刨，我自己就喺到養神，呢個時候俾自己放鬆下仲好啦。
入到場先知，原來最大嘅難關係考官讀指引嘅時間，真係好折磨，又怕一陣份卷難，又怕會悶到瞓著。
開咗卷之後，同份死亡之卷正式埋牙，有得呢個稱號真係唔係浪得虛名，我考完出咗試場真係嚇到汗都滴埋…難成咁嘅…
不過預咗炒，有4成分算。
一開番電話，就見到小霖嘅來電。
「阿楓啊！」佢好似好焦急咁。
「唉屌..點啊你考得？」
「考得好差啊..好多唔識啊..點算啊？」我都未聽過佢咁慌張嘅聲。
「冷靜下準備卷二啦，唔好諗啦過咗去！」
「哦哦哦..好啦..一陣考完去食嘢？」佢一講起食就放鬆好多。
「好啦好啦，加油啦。」
喺我收線之後，隔咗一陣就輪到小涼打黎。
「喂…….」一聽佢把聲仲慌過小霖。
「點啊你？好多唔識？」
「死得啦今次…實炒啦。」講到想喊想喊咁添。
「唔緊要啦，我都考得唔好啊，收拾好心情考卷二啦，好冇？」
「唯有係咁啦…唉。」佢士氣仲係好低落，希望唔好影響佢卷二表現。
卷二都算還好，我做咗題己所不欲，我諗發揮平平穩穩都ok。
「唉，死啦，做著份咁難嘅卷，想合格都難。」小霖講，考完我地就去咗星矢吧食嘢。
「你覺得難都大把人覺得難啦。」娜姐講。
「希望啦..唯有綜合同作文拉番啦。」我都頹頹地咁講。
經過第一日嘅失敗，我地唔敢再輕視呢個試嘅難。
接下來幾個主科，由溫習到實戰，我地都出盡力，特別係小涼，都未見過佢咁，直情背水一戰咁。
英文同通識我地都考得唔錯，應該個grade都唔會太核突。
你問我點解唔講下阿月阿言佢地？有咩好講姐，佢地係爭在做唔做到狀元之麻，完全係輕鬆carry嘅。
「加油啊，今日考數，唔洗驚！」小霖喺我隔離講，我地今日同試場。
「你係咁講啦..你啲數咁好。」叔叔不行了..
「你仲係咁驚咪辜負曬我同小涼嘅努力？」佢指一指我手拎本嘢，冇錯，我仲係溫緊小霖本筆記。
我唯一會溫筆記嘅時候竟然係最唔需要筆記果科，真係諷刺。
「好啦..入場啦！放鬆啲！」佢按一按雙膊講。
.
.
.
經過3個幾4個鐘嘅折磨，終於征服咗科數，又真係好似冇想像咁難，總之出到黎就江交棒心情愉快啦！
「睇黎幾好喎考得。」佢笑我。
「不過不失啦，都唔錯！」
「咁咪幾好，都話唔洗驚架啦！」
「隨時愛相見 便見面..」
「喂？死人頭！」係巴渣妹。
「點啊巴渣妹！」
「考成點啊你？」聽把聲佢都好似唔錯咁。
「我唔錯啦！你呢？」
「冇難度，嘻嘻！」
「咁咪幾好，一陣自修室見啦，過兩日考ECON。」
「好啦好啦！」
「小涼啊？」收咗線之後小霖問。
「係啊。」
「你就唔好成日激嬲佢啦，佢係好女仔黎架。」
「我知啦，我會好珍惜佢架啦。雖然有時佢就巴渣啲但係其實冇惡意嘅，佢做每一樣嘢都係為咗我，我知架。」
「知就好啦！記住我話過你對佢唔好..」
「你就唔放過我啊嘛，知啦長氣。」
「呃..有一日我唔哦你睇下你點！」
去到溫Econ嘅時間，我其實都溫到冇咩好溫。
「錯啊錯啊，唔係咁唔係咁！個demand應該係inelastic！」呢一刻，化做地獄教師嘅變咗係我，小涼坐咗喺我間房書桌做past paper。
等佢試下俾人折磨嘅感受哈哈！
「唉啊..點解咁難架！」佢喺到抱怨。
「你係有啲嘢kick住咗諗唔通姐，其實以你而加嘅能力有4唔難，睇下可唔可以有高啲啦。」我同佢講。
「真係架？我可以有4？咁我都安心啲。好！我一定會ko佢！」
「你頂唔頂得順啊？我要開啟我嘅地獄mode架啦！」
「黎啦！」
.
.
.
「啊！頂唔蒲啦！好攰啊！」3個鐘之後佢講。
「等你以為我之前好輕鬆。」
「我邊有咁諗姐..我都知你辛苦架啦！」
「等我幫你按下摩啦…」佢跳咗上床幫我按肩。
「嗯..幾舒服喎！」
「梗係啦，你有福啦，我唔會隨便幫人按。」
「幫我按點算係隨便！」
「嘻嘻，咁又係。」
「衰仔啊，條魚想蒸定..」阿媽冇啦啦衝入黎。
「大佬啊，你敲敲門先得唔得。」
「噢..對唔住。」
「咁條魚你想煎定蒸啊？」
「煎啦，小涼怕薑味。」
「好好好，唔阻你地，哈哈。」我頂..
「真係細心啊，知我怕薑味。」
「你第一日先知咩？」
「唔係唔係，不嬲都知！」我暈啦。
考完econ就到bafs，份卷嘅程度喺意料之內，都唔太擔心，小涼都打黎報捷，咁我都安心啲，總算冇白費心機。
BAFS我地有成十幾日溫，十幾日可以攣都拗番直啦！
不過應該係最後一次我地三個一齊喺自修室溫書。去到最後果日我地都唔太捨得。
「估唔到咁快就完咗，諗番起好似夢咁。」小霖講。
「我仲記得個死人頭當初淨係掛住瞓，哈哈哈。」
真係好似場夢咁，由我被人嗌醒果一刻開始，原來係發緊一個更加比夢境更唔真實嘅夢。
我喺呢到收獲到我最珍惜嘅愛情、友情。
呢到見證住我自己嘅成長，見證住我同小涼感情嘅萌芽，見證我同霖嘅友誼越來越深厚，見證住好多好多，聽日開始就唔洗黎，我諗我會好唔慣。
「走啦，真係咁唔捨得啊？」小涼走之前問。
「唔會啦唔會啦，走啦走啦。」然後我地就頭也不回咁走咗。
千祈唔好回頭，如果唔係會再番入去嘅，道理同出獄一樣。
再見了，自修室。
明天，你好。