我只不過喺自修室溫書，點知比我遇番佢。: <五十六>小風波
去到一月尾就已經係考mock嘅時間，呢個mock都算係考dse之前一個好重要嘅環節，因為可以測試到自己每一科仲差幾多先到attain到個目標。
而今個mock..我只夠用慘不忍睹去形容。
由於我地係第二屆DSE嘅考生，所以我地只有一年嘅past paper去參考同操。其餘都只可以靠做CE去操。
過往我以為之前做落嘅past paper已經好足以去測試自己，見到做得唔錯就好滿足。
但原來我完全高估咗自己嘅能力。除咗經濟，根本好多科都轉曬模式，同CE已經係兩個世界。
「唔洗咁灰啦..仲有2個月俾你追喎。」小涼講。
「點追啊..已經溫咗咁耐都考到咁..」
「有冇諗過問題出咗喺邊？」
「有，唔熟題型、時間控制唔好。」
「好！咁我地就跟住呢個方向去溫書！」
「我幫你制定一啲溫書嘅方針同內容，我地一齊溫，溫到你有進步為止！」佢好熱血咁講。
我抬頭望住佢，佢個頭好似有個光環咁，係路西法啊！！
由果日開始，小涼就好似變咗地獄教師咁，每日都督促住我溫書、操卷。
最變態嘅係，佢同化埋小霖，要佢都一齊督促住我，唔俾我有偷懶嘅機會。
佢仲俾埋佢學校啲卷我做，同埋喺唔知邊到搵埋好多卷一齊做，令我喺最短時間內可以見盡好多唔同類別嘅題目同喺時間管理上得到最大嘅提升。
講真就真係好苦不堪言，但係為咗前途都冇辦法。
但係慢慢都令到我有啲喘不過氣....
「錯啦錯啦，唔係咁做啊！」呢一刻我又俾小涼鞭策緊啲數學。
「又唔啱咩..明明咁樣都做到。」
「方法啱但係時間慢啊！應該咁咁咁..」
「做到咪得囉....」
「咁樣會拖慢做成份卷嘅速度，會做唔曬架！」佢語帶一啲激動。
「好啦好啦，唔好嬲啦..聽你啦聽你啦。去唔去食嘢啊？」
「好啦..食少少先再溫啦。」佢講。
出到去自修室，我就感覺好似喺監倉出黎咁。而番學..更加係上天堂咁快活。
隨住考試日子越來越近，好多學校上嘅嘢都準備埋單。今日就拎咗准考證，代表住DSE..正式殺到。
「同學，過幾日就係last day 啦，好好享受埋呢日啦。」阿王講。
雖然我未來仲有好多日子會見到佢，但去到呢一刻都真係有啲唔捨得佢。佢真係一個好稱職嘅班主任，為我地排解好多紛爭。
「呵...」我忍唔住打咗個喊露。
「做咩啊？好攰？」小霖見到就問。
「梗係啦..日日咁操法，鐵人都死。」
「又真係幾辛苦嘅..但係你冇覺得自己的確進步咗？」小霖問。
諗諗下都有嘅，唔係得小涼咁幫我，我都唔知點算。
但係真係好chur，日復日咁做，加上日子愈來愈近，我就愈來愈驚。令到我壓力慢慢咁增加。
「食唔食嘢啊，麥記有新包..」我未講完，小涼已經截住我。
「又食？你坐底冇耐炸喎。」
「咁抖陣得啦掛？」
「費子楓你可唔可以勤力少少啊？」
「我仲唔夠勤力啊？咁我番咗成日學有啲攰啊嘛。」我有少少唔耐煩。
「我夠番咗成日學啦，我一放學就過黎同你溫書啦。」
「好辛苦你咩？！你唔幫我你自己都要溫啦。」我衝口而出。
「你講多次？」佢眼紅紅咁講。
「我話..」
「即係你覺得我咁辛苦都係為咗自己嘅？」
「即係你覺得我係無嘢搵嘢黎做？」
「殊....」佢講得大聲得制，俾人殊。
「我唔係咁嘅意思....」
「算啦..唔好講啦..你鐘意點就點。」講完佢就執嘢走咗。
我地第一次有嗌霎，竟然係因為咁樣，好似有啲幼稚，亦都黎得好突然。
我冇去追佢，我知道我錯咗，但係當刻真係谷住咗度氣想抒發出黎，可惜用錯咗方法。可能讓大家冷靜下先會好啲。
第二日，小涼落黎自修室之後，去搵咗第二個位坐，冇過黎呢度坐。
小霖見狀就問：「做咩啊你地？」
「唔好提啦，尋晚吵咗。」
「點解嘅..？」佢好愕然咁問。
「我話想抖下之麻，都唔明佢點解發咁大脾氣。」
「咁佢都係緊張你姐。」
「會唔會緊張過頭啊？」
「你唔係仲係半筒水咁佢得鬼閒理你咩，又唔諗下自己程度去到邊。」
「你睇下你枱面份英文notes啦，佢逐隻字咁寫落去俾你溫，捱咗好多晚通宵架，我都試過整呢啲筆記，唔易架真係。」
我望住份notes，突然一份內疚感油然而生，我因為一時意氣而忘記曬佢對我嘅付出，仲講咗啲咁晦氣嘅說話，我突然覺得自己好仆街。
「諗通啦麻？諗通就做嘢啦！」
我趁小涼去咗廁所就追咗出去。
我一樣喺廁所個門口等住佢，就好似第一次激嬲佢果陣咁。
佢一出到黎見到我就走咗去，我即刻去截住佢。
「小涼小涼小涼！」
「想點啊？」
「唔好嬲啦唔好嬲啦，我知我錯啦！」
「你可唔可以唔好永遠都咁後知後覺，然後講一句對唔住就覺得可以化解所有事呢？」
「你慢慢反省下先。」
講完之後佢就走開咗，我冇留住佢，應該係我冇原因去留住佢。
佢鬧得我真係好啱，咁樣嘅我真係太過唔成熟，原來對唔住..真係唔係大曬。
我好頹然咁番番去。
「點啊..搞唔掂啊？」小霖問。
我擰一擰頭，表示失敗。
「原來對唔住..真係唔係大曬。」
「你終於知道啦咩？」佢問。
「等你仲以為講句對唔住，隔一段時間就冇事，唔係個個好似我咁大方架！」
「噢..我唔係話小涼小氣..」
「得啦..我明。」
之後我同小涼成日落黎都冇講過嘢，冇任何眼神接觸...得我望住佢。
第二日番到學校...
「你唔好黎搵我啊！蕭皓月！」一番到學校就見到阿靜怒氣沖沖咁走出班房。
「嘩..咩料啊月少？」我問佢。
「唉..一言難盡。」
「哈，嘩你地唔係兩兄弟都冇人信。」小霖喺到調侃我地。
「點解咁講？」阿月一頭霧水。
「個傻仔激嬲咗小涼囉。」
「噢..哈哈..可能係個天要撮合我地兩個。」阿月突然攬過黎。
「妖死開啦gay佬！激嬲條女都可以咁輕鬆嘅？」我推開佢。
「佢緊張你先會嬲你姐，佢仲係鐘意你嘅話，只要你真心認句錯佢一定會原諒你嘅。」
「屌，懶瀟灑啦你，一陣阿靜唔原諒你就好笑。」但係其實都有啲道理嘅..
「聽日都last day，唔係仲要咁咒我啊？」
「超，睇下點。」