我只不過喺自修室溫書，點知比我遇番佢。: <十二>了解我的所有

「Yes！搞點！」好彩佢都follow番我，都叫做有彎轉。

「咩搞點呀？」阿月問。

「冇…冇..野，食..食野啦」我都係唔想比佢地知咁多住，等遲小小先算。

「你覺得我信你咩！？」阿豪鍥而不捨咁問。

我向阿言打一打眼色，發出求救嘅訊號。



「好啦好啦食野啦，就夠鐘啦，佢要講就唔會扮冇野。」

我即刻報以感激嘅眼光，感謝啊言哥！

「仲唔問？」阿言細細聲問我。

「我唔識呀..應該點問？」

「唉屌，成個師奶咁，拎個電話黎。」



「HI 自修室女孩。」佢幫我send咗句咁嘅野。

「喇，幫你開咗頭啦，之後點你自己諗點去。」

喺番學校途中，我一路係到睇小涼IG啲相。原來佢嘅生活都幾多姿多彩。又有跳舞，又打籃球。唔怪得佢唔似果啲細細粒嘅文青女神。

原來佢啱啱先過咗生日，哈，同我生日差唔夠10日。

喺我睇睇下嘅途中，彈咗個訊息出黎。



「你點搵到我ig？」

「知你個名要搵你有幾難，haha。」

「聽講我地唔係好熟炸，你咁隨便起人底。」

我一時之間都唔係好知點應，咁啱又翻到學校，所以就暫時唔理佢住。

突然我都好佩服阿言，就咁打一句就令到佢打出個重點。

該面對的還是要面對，放學之後，我回咗句：「唔熟你又幫我咁多？」

可惜，只係換來一個狠狠嘅已讀。

唔緊要！只要佢會落自修室，我就有機會問清楚！



落到自修室後，果然俾我見到佢。

「上啦！飛雲！係機會啦！」

我走過去，拉住佢隻手，一直行咗落休息區。佢朋友都好愕然。

「放手啦...好痛呀..！喂！」佢fing開咗我隻手。

「想點姐你？」佢問。

「應該係我問你呀。做咩突然又好似唔識我咁？」

「聽講我地真係唔係好認識架喎。我連你叫咩名都未知呀！」



又好似真係喎，好似得我知佢叫林小涼，佢唔知我叫費子楓。

「冇野啦麻？咁我上去啦。」

「等陣！」我叫停佢。

「我..我叫費子楓。今年十七歲，白羊座，我而加單身！」

「讀馬嘉諾二世中學，中五甲班，最好嘅朋友叫黎爵言、龍應豪同蕭皓月！」

「最鍾意嘅顏色係黑色，最愛睇嘅卡通係聖鬥士星矢！」

「最鍾意聽嘅係黎明嘅今生不再，最鐘意嘅明星都係黎明！」

「最唔鍾意食臭豆腐，最成日做嘅運動係打籃球！」



「最叻嘅科係中文，最差係數學！」

「我最憎人睇我唔起同摸我個頭！」

「屋企有父有母，最錫我嘅親戚係我表姐，佢就黎結婚，我表姐夫仲要係我班主任！」

我一口氣講曬我嘅野比佢聽，希望佢感受到我嘅誠意啦..

佢聽完之後呆咗幾秒，之後偷偷地笑咗笑，然後又忍住咁講。

「你話曬啲野比我知做咩，我都冇話要知。」

「我唔知，我淨係知我想同你做朋友，所以就講曬啲野比你知，我相信你了解咗我之後就會想同我做朋友！」



「傻佬！白痴！」之後佢就轉身走咗。

「咁即係點呀？」

「溫書呀，溫唔溫呀你，"朋友"？」
  
「溫呀！等埋呀！」

「嘻，原來佢單身。」我同佢行翻去果陣好隱約咁聽到呢句，不過可能聽錯，因為佢講得好細聲。