我只不過喺自修室溫書，點知比我遇番佢。: <十一>陌生
「無得頂呀！今次我地5A攞曬彩呀！」阿王上到課室之後就講。佢好似仲開心過我地咁。
「今次真係多得阿言嘅帶領！我地俾啲掌聲阿言！」
「都係有賴各位同學幫手姐，係咪呀阿楓？」阿言突然拋個波俾我。
「係嘅係嘅，真係多謝曬大家嘅幫忙先可以嬴到個比賽。」心水清嘅就知道我唔單止講緊個比賽。
「咁郭SIR你係咪應該有啲表示先？」今次仲唔到我乘機屈番阿王一筆。
「好啦好啦，今個禮拜日就去我屋企燒野食 ！有興趣今晚就喺班group報名！」
「郭SIR萬歲！」
其實阿王，都真係幾好呀。
為咗個比賽，都成個禮拜冇落自修室，今日一於落去溫下書，順便話呢個好消息俾小涼聽先。
「咦，咁晏都未到？」見佢未黎，就隨便搵個位坐住先。
等咗一陣，佢終於都黎。我向佢揮一揮手，點知佢好似扮睇我唔到咁，去咗第二到坐。佢行過果陣跌咗本校簿都唔知，我執起咗佢，望一望個封面，寫住「Hazel Lam」
估唔到佢啲字又幾靚。
我拎番本簿俾小涼，喺佢隔離坐低咗。
「做咩揮曬手都唔過黎坐？」我問佢。
「係咩，睇唔到喎。」佢好冷淡咁講。
「咁都睇唔到..係啦，我地個比賽嬴咗啦！我終於克服到個陰影！多謝你之前聽我呻。」
「恭喜曬。我都冇做啲咩。」
「你幫咗我好多架啦！係呢..」
「我想溫下書..唔該。」佢突然截停我之後講。
「好啦..咁唔阻你。」之後我就翻翻自己位，人地講到咁都無謂賴死唔走。
「究竟搞咩呢佢？」臨瞓前我不斷係到諗。諗諗下我都恰著咗。
.
.
「我仲估你一定會遲到。」第二日翻學我約咗小霖一齊搭巴士。
「約咗汪大小姐喎，我點敢呀。」
「講你就叻，你試下連續一個禮拜唔遲呀。」
「其實唔難，哈哈。」
講講下我就見到小涼排咗喺格離線。係喎，佢喺尖沙嘴翻學架喎，唔怪得啦，我又會一直都醒唔起嘅。
「喂，巴渣妹，翻學呀？」
「唔通耕田呀？」
「哈哈..」我都覺得自己問得一啲廢，但係果一刻我真係諗唔到同佢講啲咩。
「做咩呀佢？」小霖好細聲咁問我。
我聳一聳肩，表示唔清楚。
直至佢架車黎咗之後，佢連BYEBYE都冇講就上咗車走咗，好似仲冷淡過尋日。
我同小霖一路上係到分析佢究竟搞咩，但係都得唔出結果，仲令我愈諗愈煩咁，翻到學校都頹下頹下咁。
「嘩，你2個搞咩？冇厘神氣咁嘅？」阿月翻到班房就問我同阿豪。
「我尋晚終於睇到太子同埋灰狗死果到啦！太子死得好慘呀！」阿豪仰天長喊。
「邊個太子呀？」
「咪就係古惑仔入面最好打果個囉..」我搭嗲。
豪仔呀，如果你知道2017年嘅古惑仔係咩境況，你喊得仲勁呀。
「廢紙咁你呢，你又做咩？」
我冇答阿月，淨係唉咗聲。
「咪因為巴渣妹囉可。」小霖講。
阿月同阿豪即刻衝過黎按住我，問：「邊個巴渣妹？」
「我唔講！」
「講唔講呀？」佢地將我對手向後屈。
「痛...痛呀！放手呀仆街！我..我講啦。」
唉，費子楓呀費子楓，點解你咁撚弱，2野就比人收皮。
於是我就講咗同巴渣妹啲野俾佢地聽。
「呃，你個衰仔，啱啱先放低咗天蕊，咁快又想溝第二個？」阿豪聽完就講。
「唔係呀！咁我真係覺得奇怪姐，突然又好似唔識咁。」
「但係你地的確唔係好熟炸喎。」阿月講完，阿豪猛咁點頭。
「我都係咁同佢講。」小霖補充一句。
「點呀，講緊咩？」阿星突然嘅一個亂入。
下，又要講多次呀？！...好吧
「咁奇怪？唔太熟又幫你呢樣幫你果樣。」阿星聽完就講。
「我都唔知啊。」
「做咩呀，你想溝人呀？」阿星問。
「屌，都話唔係！」
「唔係你咁緊張做咩？」
「咁有日阿言突然唔理你，你唔會覺得奇怪架咩？」
「邊個係到講我？」
嘩屌，阿言你前世係曹操呀？咁神出鬼沒嘅？
「條友不嬲好串架啦，叫親佢杜德偉都應人。」阿星答翻。
「講梗咩呀你地？」阿言顯得一頭霧水。
「救命，我唔想再重覆。」我大嗌。
「佢鍾意咗個自修室女仔，個女仔唔理佢，哈哈哈！」
「死肥豪！唔係呀！！」
「好啦好啦，唔好玩啦，佢個樣就黎喊。XD」阿言講。
「有新對象都好嘅，對佢病情又有幫助。哈哈」
屌，黎爵言你好野。
上會計堂果陣，坐我後面嘅阿言拍一拍我。
「你真係識咗個女仔？」
「係呀，但係唔係佢地講咁架。」我講到好似向包龍星伸冤咁。
「我明嘅，啱啱先完全放低咗個。不過如果真係遇到個啱心水嘅記得唔好放過。」
「遇鬼遇馬咩，頭先阿豪講得啱嘅，雖然我唔知點解仍會一次又一次幫我，但係我地始終識又唔算識咗好耐，可能真係我諗多咗。」
「我覺得係你唔知做咗啲咩激嬲人。唔明就去問下佢啦，你男人黎加麻，做咩咁婆媽？」
「但係我連佢聯絡方法都..唔係喎，我可以試下用Instagram搵佢！」
「諗通就去做啦。」
我即刻上ig 搵睇下搵唔到。個老師一味係到教，都唔會理我地係到做咩。
「Hazel Lam」..嘩屌10鳩幾個Hazel Lam，逐個搵都夠死。
試下「lamsiuleung」先..少好多。
搵搵下，見到有個叫「lam_siuleunghazel」嘅，多數係呢個啦。
但係佢private咗，唯有等佢accept個request。
佢個icon係一個望住夕陽嘅背影，點解望親佢個背影就會覺得咁熟悉呢？
唔知你地有冇試過follow個對象而佢又private咗？個等待真係好煎熬，好漫長。你會成日check住佢accept咗未，驚佢會reject你。最怕就係又唔reject又唔accept，令到
你唔知收唔收番個reject好。期間會有好多好多嘅暇想，總之就會令到自己係果一刻都心神恍惚。
直至放晏，食食下個細蓉，個電話震咗震。
「lam_siuleunghazel (HaZel LaM)已接受你的追蹤要求，現在你可以瀏覽她的照片或影片」。