我只不過喺自修室溫書，點知比我遇番佢。: <六>歌唱比賽
當我翻到學校經過拍卡機嘅時候，我眼尾睨一睨梁主任，佢掛住一副不可思議嘅表情。佢都唔相信我咁早就翻到。我第一次咁有自信咁行過拍卡機再上課室。
雖然而家諗番起係好MK，但係學生時代間唔中做啲平時唔會做嘅野，果種自豪感同埋令人O曬嘴嘅感覺真係好鬼正。
「嘩！！係廢紙呀！！！佢竟然咁早翻到黎呀！！」肥豪一行入黎就大嗌。唔知以為佢翻咗侏羅紀見到真恐龍咁。
同行嘅阿言都乘機挖苦我：「喲，真係世界變喎，我地嘅遲到大王竟然都咁早番。」
「拜託，我今日只係早翻咗少少姐，唔洗咁窒我呀？」我真係冇佢地咁好氣。
「係啦阿言，你有睇過天涯俠醫呀？我尋日翻睇番，幾好睇。」小霖問。
「梗係有啦，我以前睇果陣就封咗張家輝做偶像。」
「天涯俠醫，成8年前架啦喎，2位電視精呢排玩懷舊呀？」我插嘴。
阿言同小霖係出曬名嘅無記忠實fans，佢地好鐘意睇埋大台啲劇集，開頭我都估唔到學霸嘅興趣咁反璞歸真。
「關你鬼事！」小霖講。
唔知你地有冇同感，有時翻學其中一個樂趣就係臨上堂之前果幾個字。幾條友講下東，講下西，你講下尋晚套劇，我講下邊個邊個首新歌。其實真係好開心好輕鬆。
「Good Morning Class!」係呀，又係阿王..係表姐夫先啱。
佢行入黎果陣春風滿面，睇黎仲沉醉係果晚嘅成功。能夠隔咁耐都仲咁開心，睇黎佢真係好鐘意我表姐。
「阿SIR你咁開心嘅，有咗身紀呀？」姚智星問。
姚智星係我地班其中一個活躍人物，我地都叫佢做阿星。佢同阿言係隔離鄰舍，所以同我地都熟絡。平時講野超級無厘頭。
當晚我地幾個有份在場嘅當然知咩事。我地你眼望我眼咁係到奸笑。但係其他同學都未知，我地有共識都係等阿王自己宣布。
「痴線，你個傻星又係到亂講野。哈哈哈」阿王笑住講。
大佬，你啲戲假到呢....
「好啦，大家靜啲，班會主席有野同大家講。」佢繼續講。
呢個時候阿言就行咗出去。每一步都充斥住領導者嘅風範。冇錯啦，阿言就係班會主席。你地依家明點解我只係個副架啦。
「咳，就係咁嘅，學校打算係2個禮拜後舉辦班際歌唱比賽，但係因為F.6要準備DSE，所以我地只會同其餘3班比賽架姐。我心中已經有一定嘅參賽人選，但係我都想睇下有邊個係想參加，而加就傳張人名紙落去，有興趣嘅就係自己個名隔離剔一剔。」
歌唱比賽，咁鬼麻煩架，真係咪搞我。打死都唔要參加。
「世事多變，豈可豈可盡如人意！」
...............肥媽?!?!咁得閒呀
「好啦，大概都睇咗大家嘅意願。而家宣佈人選。」阿言放學之前講。
成班友都屏息以待，難得一見咁靜。
「汪映霖、蕭皓月、曾泳詩。」
正路呀，唱家班。
「龍應豪、姚智星、張子妮、林佳宜。」
班上面嘅鐵膽，應該係自願。
「廖霆堅、文仕揚、費子楓、我。係咁多，以上同學放學留一留低，我地開始傾下。」
「世事多變，豈可豈可盡如人意！唉，嘥氣，嘥氣！」
......肥媽你好嘢！
阿言一翻埋位，我就用盡我畢生元氣，全力灌輸落我隻手第三隻手指，再對住阿言舉出崆峒派鎮山絕學→一陽指。
.
.
.
你唔好問我一陽指係咪崆峒架啦，我知春咁多咩。你想知問翻肥豪啦。
「首先，歡迎大家參與呢次嘅比賽，我知當中有人想參加，有人唔想。但係呢次比賽係為班而戰，我地應該全力以赴，為班爭光！」
阿言簡單幾句就提高曬大家啲士氣。佢講到尾果陣仲好狼死咁啤住我，為咗小楓著想..算，我屈服。
「首先，我想今次嘅比賽歌都係用MEDLEY形式，所以定咗歌曲同埋唔同樂器嘅handler之後就要盡力去搵譜...」佢繼續一輪嘴咁講一大堆野。
佢地好踴躍咁講咗好多建議出黎，仲好似講得好high咁。
「好啦，時間都唔早。好多謝大家咁踴躍俾意見。今晚阿楓就會集合大家意見佢揀歌，我地俾啲掌聲阿楓。」
「WWUU，阿楓好野！」大家難得好齊心咁講。
WTF?!
散咗BAND之後，我地幾個聖鬥士就去咗星矢吧飲野。
「好耐冇黎啦喎細路。係咪照舊？」娜姐問。
娜姐係個廿七八歲左右嘅女人。呢間野叫得星矢吧，就梗係要有個雅典娜坐鎮。咪睇佢年紀輕輕，佢都好多野都好瞭解，可以話係我地嘅人生導師。
「係呀！唔該娜姐！」我地異口同聲咁講。
「做咩要裝我彈弓姐，明知我都唔再玩呢家野。」一坐低我就問阿言。
「你知架。」阿言講。
「唔通咁耐你仲未放低咩？」阿月問我。
「點放呀，唔係我呢件事會發生咩？你仲叫我點唱翻歌？」
係，我之所以唔想參加個比賽就係怕再次記起果樣野。阿言就係想趁呢個機會要我走出陰霾。
「唔係你係我死黨，我都廢閪事理你啦！總之我決定咗係咁，就要你一定走出呢個陰影。」阿言拍曬枱咁講。
「阿楓你聽下阿言講啦，俾個陰影纏一世你甘心咩？」阿豪同我打一打眼色。
當連阿豪都叫我阿楓，就知果陣環境已經去到一個冰點。我地知道再令阿言發嬲會好大件事。
「好啦，咁我試下啦。」
估唔到咁耐冇去星矢吧，走果陣係咁不歡而散。
臨走前，我地俾錢果陣，阿言問娜姐一句：「係呢，娜姐，阿晴佢…好嘛？冇落黎幫手嘅？」
「佢呢排報咗補習班，比較忙，不過幾好，有心。」
阿然…又係阿言心入面嘅一條刺。
翻到屋企之後，我成個人都好亂，所以選擇撻落床咩都唔諗瞓一陣。
食完飯之後，突然諗起今晚要揀好歌交差，唔係又俾阿言柄。反而呢樣係我強項呀。我都聽唔少流行曲，我諗應該唔太難。
我選擇咗落會所自修室諗。唔知幾時開始，自修室就成為我一個好想依賴嘅地方，一有野做，要溫書，都想留喺自修室。
一行入去，果然又見到巴渣妹同佢個friend。究竟佢係咪住係自修室！?
我地對望咗一眼，我唔知點解唔敢行埋去，所以就是但搵個位坐。
原來簡歌都唔係一件咁易嘅事。唔係是但搵幾首串埋一齊就收工。如果係咁我都都唔住自己。我係咁搵個歌庫，都揀唔落手。於是我就行出去自修室啲梳化到抖下氣。
「哈哈，林峯真係超型呀，我都超鐘意佢。」
突然聽到巴渣妹把聲，原來佢同佢個friend都走。我望住佢個背影，突然覺得有啲熟悉。