我突然間多咗個妹: 花市破產之旅(前夕)

「Beverly，星期五去行花市好唔好呀?」點解我會約Beverly?因為星期四留咗俾Priscilla吖嘛，Beverly約我星期四去咁點。
「好呀，我本身都想約你去行花市呀，去維園好冇呀?」不過我冇expect佢會話去維園囉...因為我同Priscilla都諗住去維園。
「吓...呃...好!!」
「做咩呀Vincent...你係咪嫌迫唔想去呀...」
「唔係!!點會呢...我係估唔到你會想去咁迫嘅地方啫...上次睇戲你都特登揀最少人睇嗰場嘅...」
「...吓，你咁細心嘅...我以為你會唔知添...」
「唔細心點做你男朋友呀 :‧)咁點解你想去維園嘅?」
「因...因為...我聽Priscilla講，話你好似想去維園行花市咁。」佢唔乸係同咗Beverly講我哋一齊去花市呀!?
「哦...係呀哈哈!所以我聽到你話去維園咪咁驚訝囉...竟然會知我想去邊!」





「喂!Priscilla!你究竟同Beverly講過啲咩呀!?」
「嗯?我話你星期四好似會同屋企人去維園囉...咁...我都算係你屋企人吖，哼哼」
「唔好以為扮牛奶妹個傻樣就可以當冇事發生過呀，」嘩頂吖，嚇死我，幾驚佢直接同Beverly講我哋會去花市，「如果佢知道我同你去花市都未同佢去嘅話實乍我型。你知唔知我可能會俾你累死架...」
「唓，有冇咁嚴重呀，嗯?其實你哋分手仲好啦，可以有多啲時間陪我，你鍾意我仲多過鍾意佢啦。」
「Priscilla，你認真架?你係咪痴咗線...你可能睇唔出啫，但係我真係鍾意Beverly嘅，我放你喺第一位唔代表我唔鍾意佢，你搞清楚。」
「我講笑咋，你睇下你，一聽到我講你哋壞話就嬲到震，唉...熱戀期嘅情侶就係咁架喇...可惜我冇體驗過啦。」乜原來我有咁着緊Beverly咩，我自己都唔知嘅...
「Priscilla...你冇事喇?用自己啲情傷嚟講笑嘅?」
「仲有唔開心架，所以...」佢哄咗埋我耳邊，「...你要對我好啲呀，知唔知呀?」嗯...好痕呀隻耳仔，要腳仔軟喇...
「梗係會啦!!!唔好將我同呀明相提並論添呀!」
「你做咩面紅呀...又諗曳曳嘢呀?呀...信。」




「做咩唔叫我呀哥呀...」
「嗌你呀信你會怕醜吖嘛，我鍾意睇你怕醜個樣...好可愛呀你...」
「唔好玩我啦...」
「你整到我面紅就得，我整到你面紅就唔得嘅...」又嘟嘴喇...Priscilla連嬲都咁鬼死可愛架...

「好波，話咁快又有假放嘞。呀信，同Priscilla又同Beverly行花市，一腳踏兩船真係好咩?」
「咪玩啦Toby哥，一個呀妹一個女朋友，何來一腳踏兩船呀...」
「玩你咋，戥你覺得幸福啫，有兩個咁好嘅女仔喺你身邊。」
「咁你都同『女神』快啲開花結果啦。」
「頂，咪搞!!!前一排佢無啦啦開始撩我傾計，煩死，講埋晒啲無聊嘢。」




「哈，無聊咪啱你囉，同你一樣。」
「去拍拖啦仆街!!」