我突然間多咗個妹: 竟然喺女朋友面前提起另一個女仔!?

聽日難得係教師發展日，我同Beverly就約好咗去拍拖。
「聽日唔好整飯盒喇，唔洗拎咁多嘢吖嘛。」
「你好體貼呀...你估Beverly真係會咁講呀?收皮啦!」
「吖Toby你個死仔包吖，我第一次同女朋友出街呀，梗係要表現得溫柔啲架啦，叫你幫我睇下咁樣好唔好，唔係叫你嚟串我呀!」
「唓，巴閉喇你!」
「你冇女朋友咋，唔代表你可以咁樣話我架......嘩哈哈哈!!咪吱我啦，好...好痕呀...頂...透唔到氣喇...」
「吔屎啦你，有囡囡威喇!」

「Beverly，乜原來你鍾意彭于晏架?咁想睇嗰套剩者為王嘅?」
「你唔覺得佢好型架咩...」




「咁我型啲定佢型啲呀?」
「你話呢...哈哈哈...你咁肥」
「講咁多你咪又係鍾意我。」
「咁我又唔係鍾意你個樣...」
「咁你鍾意我啲咩呀?」
「唔知喎，你對我好溫柔，又會成日幫我...」
「原來你真係答得出架...」
「有咩咁出奇喎...你以為我咁隨便就會鍾意一個人架?」
「你諗咗去邊呀傻豬...」其實係因為如果Beverly咁問我，我會答唔出啫。
「咁你呢...你鍾意我啲咩呀?」




「吓...」開口中?快啲諗啲嘢講呀。「可愛得嚟又有啲怕醜，煮嘢又好食咁囉...」
「咁表面架...」咁你想我點呀，又唔係我追你，我冇口啞啞你要偷笑啦LOL。
「呃...仲有啲時間，不如我哋溜冰吖?」
「吓...我唔識溜冰架喎。」
「唔洗驚啦，我識咪得囉，我會扶住你架喇。」

「換好鞋未?OK，嚟吖，拖實我。怕咩醜啫，又唔係第一次拖手，傻豬。」
「咁...咁平時係我翹住你架嘛，今次係你第一次主動拖住我喎...」
「嗯...呃...唉，拖手好正常啫，唔洗咁樣計住呀?」
「唓...你都唔浪漫嘅...」唔浪漫?你睇住嚟，一陣你唔好面紅呀。




「過嚟呢邊吖，一步一步咁行，係嘞。」哼哼，準備棘親啦Beverly，你一定唔會冇事咁過到嚟嘅。哈，話口未完。
「吖吖呀!!!」
「小心!!我喺度，你冇事吖嘛。」
「嗯...」機會嚟喇飛雲，食住個勢上啦。
「Beverly，你真係好可愛。」
「吓，無啦啦講咩呀你...你想點...」
就係咁，我喺溜冰場嗰度當眾同佢接吻。初吻GEEEEEEEEETO!!!
「嘩，😳😳🙈🙈你...你咁大膽嘅?」
「仲話唔話我唔浪漫。」
「白痴...邊有人好似你咁當眾錫架...」吓，乜原來係咁架。
「咁我咪好柒?」
「梗係啦，有...有人望住喇，快啲走啦!!!」
「哦...」
之後，我同Beverly食咗個晚餐之後，就送佢返屋企。
一路行緊嘅途中...




「Beverly，其實我有啲嘢想問你呀?」
「咩呀?」
「係關於Priscilla架，其實你幾時知佢同呀明分咗手架?」
「咦，點...點解你知嘅...」
「果然你一早知，你知唔知點解佢唔一早同我講呀?」
「佢...佢話怕你擔心同埋驚你會因為咁而唔敢接近佢，所以...」
Priscilla真係好傻，點解佢要咁為我着想，明明我係佢呀哥，唔應該由佢嚟承擔呢啲壓力。
「...我送你到門口吖!」
「嗯...」
「你自己小心啲喇!」
「我都喺門口啦，仲可以有幾唔小心喎，你都係呀，小心啲。」Beverly呢個時候喺冇預兆嘅情況下錫咗我一啖。「呢啲先叫浪漫呀，傻仔。哼哼，拜拜!」
「拜拜」其實Beverly平時係咪詐傻架呢，點解會咁識挑逗我嘅?

邊個咁夜打俾我呀=.=
Priscilla!?




「喂，呀妹?咩事呀?你喊緊呀?做咩呀!?」