我突然間多咗個妹: 真相大白了嗎?還是...

「我同呀明係喺我做你呀妹嗰日分手架...嗰日其實呀明就喺你救我嗰條馬路對面個籃球場嗰度打緊波，佢睇到我哋攬住嗰個場面。」
「你冇同佢講嗰陣你係因為差啲俾車撞先會咁咩?」
「我梗係有啦，但係佢死都唔信，仲話咩估到我哋偷偷哋發展地下情，日日以練舞為由，其實係偷偷地約會。我同佢講話你係想做我呀哥，唔係第三者，但係佢都係唔信我呀...」
「對唔住呀呀妹，唔怪之得嗰日你聽到我問你做唔做我呀妹會咁反感，跳舞俾Missy睇嗰陣又咁差啦，真係好對唔住呀，我唔單止冇體諒到你，仲係咁迫你，而家仲拆散咗你同呀明，我真係好撚賤，我唔配做你呀哥。」
「唔關你事架...因為嗰次我先睇清楚佢份人原來咁唔講道理，佢平時都唔信我講嘢架。其實我哋本身感情都淡咗架喇...」
「真係咁?但係我真係原諒唔到自己呀...」
「唔好咁啦呀哥，我都冇怪你...」唔怪得之前Toby無啦啦問我兩個人揀邊個啦，原來Priscilla同呀明分咗手。但係點解連Toby都知，得我一個唔知呢...Beverly好似都知喎，之前問我係咪同Priscilla拍拖...終於都真相大白喇...
「我諗我都明咗一大部分喇。咁...咁點解你嗰兩個朋友之前好似成日睥住我咁嘅?又係咩原因呀...」
「佢哋聽咗呀明講，話你係第三者介入我哋嘅感情，對你產生咗誤會，所以一直都唔鍾意你。佢哋硬係覺得我哋有路，所以都係唔肯聽我講...」 
「對唔住呀，原來你一直以嚟受咗咁多委屈，我就乜都唔知，要你自己一直承擔呢啲痛苦成兩個幾三個月。」




「唔緊要架呀哥，你而家明就得喇...」
「你喺承受咁大嘅壓力之下仲敢痴我痴得咁埋，你一定下咗好大嘅決心，但係我嗰陣竟然嫌三嫌四...」
「真係...唔緊要架...」
「唔好喊啦呀妹，你搞到我都想喊呀...」
「呀信，我真係好鍾意好鍾意你呀...」
「嗯...我以後會用多好多好多時間陪你，關心你。我承諾你，我會盡我作為一個呀哥嘅責任，去照顧你，呵護你同寵你。」留意返，雖然我今日話過我係一個不折不扣嘅賤人，但我重申，作為一個妹控，呢啲說話，我全部都係發自內心咁講嘅，完全冇講過一句大話。

「Vincent，我今日都整咗飯盒呀...」
「咁就啱喇，er...不如同埋Priscilla一齊食吖，佢都帶咗飯，三個一齊食多啲計傾吖嘛。」
「哦...嗯...」




「呀信...咁樣真係好咩...」我叫Priscilla埃埋嚟，然後我喺佢耳邊細細聲講。
「話咗要多啲陪你架嘛😉」
「Vincent，你做咩有嘢唔話俾我聽，係咪唔鍾意我整嘅嘢食。」
「呀...Beverly唔好扭我耳仔啦，我話你煮啲嘢好好食，想趁機俾Priscilla試下啫，我唔想你聽到，費事你得戚呀。」
「係...係咩...咦，你好衰架...」
「哈哈...咁不如食飯啦...」
「Vincent，我餵你食吖...呀...」
「呀信，我都餵你食吖!!」
嘩...好尷尬呀...呢餐飯就好似兩個女仔喺度爭男朋友咁...用廚藝嚟比拼咁呀。
「我自己嚟得喇...」食開Beverly煮嘅飯，我以為冇嘢比得上啦，點知原來Priscilla煮嘅嘢食拍得住Beverly喎。「好好味喎...」好尷尬呀好尷尬呀。




「咁你覺得邊個煮得好食啲呀?我吖定係Priscilla呀?」我差啲哽親，呢個問題就好似女朋友問阿媽同佢跌落水救邊個先，點答呀大佬。
「我肚痛呀...要去厠所。」三十六計，走為上計，閃人最實際!!!

雖然我話就話好尷尬，但係其實諗深一層，我哋好似好耐冇試過三個人一齊咁融洽喇。