[銀行妹甜故] 正斗銀行妹: 第一章

午飯之後, 我又要攞啲支票去銀行度入戶口嘞, 排隊期間, 我對眼正喪昅住某個柜枱嘅方向, 無錯, 佢就係七號窗嘅 PY Ho 何寶兒, 佢漂亮, 可人, 大方得體, 甜美嘅笑容永遠都係可以令人忘卻一切嘅煩惱, 佢……

“下一位請到四號窗” 後面個師奶正篤住我, 「呀叔, 四號窗呀!」 唔係, 我唔係屬於四號窗嘅, 我即時攞起個電話扮哂講住, 「呀婆, 我比妳先啦!」“下一位請到二號窗” 「比你先啦!」“下一位請到七號窗” 係嘞, 無錯嘞, 呢個機會先至係屬於我架嗎。 

我即時行過去七號窗度, 仆佢個街吖, 有個排響尊貴客戶嘅呀嬸居然插左埋去七號窗度, 我不敢怠慢, 亦同時牙左響個柜枱度, 兩個人正死迫爛迫住。 

「呀叔, 呢個係尊貴客戶嘅窗黎喎?」 尊妳老味, 妳條呀毛有幾撚尊貴呀, 我即時谷住啲殺氣出黎, 「呀姐, 唔好意思, 我真係好趕時間架, 妳…就可憐吓比我先啦, 嗚~~~」 「唏, 麻鬼煩!」 「唔該哂呀姐, 唔該, Thank you very much, 些些妳吓….!」



噢, 我個女神呀寶兒啊, 佢居然望住我地兩個正響度甜甜咁笑住, 係嘞, 就係呢種感覺, 一種比佢俘虜住我嘅感覺, 「張生, 又黎入票呀?」 「咳唔, 對的, 唔該幫我入左呢兩張票吖, 麻煩哂妳吓!」

望住寶兒好專注咁幫我入緊支票, 而我就呆呆咁望住我個寶兒, 好靚, 真係好靚, 唔知佢比人溝左未呢? 唔知我又比佢嘅感覺會係點嘅呢? 其實到底佢有無成日都掛住我咁呢? 又會唔會好似我咁, 打住飛機嘅時候都會諗起佢咁黎自慰住都會諗番起我咁呢? 又…..

寶兒好可愛地瞄左我一眼, 跟住突然開口問我野, 「張生, 我…想問吓你…., 唔知你地裝修公司可唔可以幫我屋企整少少野咁呢?」 嘩, 仲使問, 簡直就係摞飯應都黎唔切啦。

我係咁問寶兒佢係住響邊? 間屋又係住左啲咩人? 「喂, 咁其實妳有男朋友未架? 放假果陣通常都會去邊度玩多咁呢? 呀, 仲有…..」

銀行女經理已經好木訥咁企左響寶兒嘅後面, 而我後面排住長長嘅龍亦正充滿住濃烈嘅殺氣, 「喂, 咁啦, 呢張係我嘅卡片, 妳今日收工嘅時候就即刻要打電話比我, 到時再有啲咩嘅, 我地就繼續慢慢咁再傾埋落去, 記住呀, 打比我!」



我好瀟灑咁行左出銀行之後, 嘩, 今日, 我個心情簡直就係靚到不得之了啦, 六點半倒, 期待中嘅女神終於都打電話比我, 而且, 佢仲約我即刻就要去佢屋企度睇睇啲野咁。 

我好快咁就揸左部貨 van 去到銀行門口, 噢, 我的女神已經換番佢平時出街嘅衫裙, 一個甜甜嘅微笑, 電壓似乎仲比平時更為增大, 我已經比佢電到暈得一陣陣, 寶兒笑住咁上左我部貨 van, 跟住我就照住佢指示嘅方向, 正向住女神嘅深閨方向駛去。

哦, 居然只係啲舊樓咁嘅, 車停到路邊, 突然, 有一個四眼西裝友正向住我架貨 van 處行緊過黎, 而且…佢…佢…居然仲, 企響車門出面錫左仲坐響我隔離嘅女神一啖, 我….已…經…即…時…

「張生…張生…到左嘞, 我地可以落車上樓嘞, 張生…張生…你無事吖嗎…?」

我正呆哂咁, 「哦…上樓…好呀…上樓…到左未呀? 妳係住響幾多樓架? 等我揸埋部車駛埋上樓去啦……」



(待續)