點解當初好挽唔挽要同女神挽同居: 第一章 開學日

「鈴鈴鈴鈴鈴鈴鈴鈴......」
「屌半夜三更邊個打黎阿」我彈起身成隻僵屍咁講。
「又話你睇死我唔夠膽上黎住？開門啦」一把好好聽既聲系電話入面傳出離。
oh my god 今po大鑊了。
事情要追溯返一個星期前既開學日.......

未介紹添，我系阿言，今年讀form4，一個成日都好多嘢講既人，平時都比較串，系班上面都系出名嘈個幾個，樣就一般般啦，起碼見得下人。
「喂！阿言，你今個暑假做過啲咩黎吖？」佢系阿輝，我識左九年既死黨，平時同佢傾計傾得最埋，而且佢好外向，好多朋友，同我一樣都系修物理同ICT。
「無阿，系屋企日日打住機咁過咯。」相信有好多人都一樣暑假無乜動力出街，因為真系好鬼死熱。
我同阿輝坐系位到個陣，聽到好多人討論某啲事情。




「聽講呢今日會好似有插班生wor，會唔會系真架。」
「唔知系男定系女架呢？」
「你話會唔會真系有插班生吖拿？」阿輝系隔黎問我。
「會唔會真系有咁多插班生吖，睇小說睇上腦咩。」
系之後個五分鐘，我即刻收返我頭先講既嘢。
「大家好，我系你地今年4C班既班主任何sir，大家要和平相處好無？上禮堂之前要先介紹一位啱啱從美國過返黎香港讀書既插班生，你過黎啦。」
「你地好，我叫做張嘉程，大家可以叫我做Amy。」講完呢句說話之後，我地班啲男仔個樣好似全部高潮咁既款，因為Amy把聲同個人都系一樣咁吸引，黑帶棕既髮色，令人心跳既馬尾，仲有一副傾城既樣子，已經可以話系女神既級別。
就系咁樣，Amy就成為左我地級既女神。
同新同學認識左一陣之後，就要上禮堂開始聽死亡既演講，因為系好Q悶好Q悶好Q悶，好重要所以講三次。校長講到一半已經有一大邊既人訓低曬，我同阿輝都唔例外，「如果失眠既話依家可以用手機錄低佢，等訓唔著個陣聽.......」 阿輝既靈魂已經去左釣大魚。
因為開學日系返半日，所以演講完之後返班房搞掂埋剩返啲班務就可以放學食lunch。




我地學校就唔知點解咁鬼奇怪每年都系第一日就調位，(相信睇得開呢啲文既讀者一陣都知發生乜事)無錯啦，老師調位就將啱啱系美國返黎既Amy調左同我坐，我同阿輝放學個陣感受到來自四方八面既殺氣，「你死啦你，睇黎你上學期都唔使系班到安然咁度過。」
「我想架咩，老師黎黎去去都系話乜嘢人地啱啱黎到學校要揾個對學校熟悉既同學幫助佢，我淨系最熟邊到走堂最好同訓導處系邊咋。」唉依家咁款都唔洗旨意同自己班啲男同學‘和平’相處。
「嬲ar，去豐記食返個tea冷靜下。」我同阿輝就去左豐記到食我最中意既奶醬多加凍奶茶，次次去個度唔食返兩件都唔捨得走。
當我食完準備買單既時候，我摸一摸褲袋，「屌！！！銀包呢！？」茶餐廳入面大半人望住我，「坐返低慢慢揾啦，唔洗急。」好彩我同茶餐廳啲伙記都既熟，唔系就GG。正當我準備跑返學校揾既時候，女神降臨了，Amy跑到成塊紅都面曬咁過黎茶餐廳，手入面好似攞住啲野咁，「你叫阿言系咪？你啱啱大頭蝦漏左銀包系臺面就走左，我周圍問同學先知你黎左呢度食野阿。」