《粵語殘片》(新手/校園愛情): Ch02 三面之緣
#你說過，三次遇見使我們相識，不希望，只用一句再見便作別。
中五嗰一年，身邊每一個同學都開始準備緊來勢洶洶既公開試，每日放學，幾乎個個都跑哂去補習。
不過，點解我淨係話「幾乎」？因為，至少我同我老死阿朗都唔係其中一員。
咁你問我地放左會去邊？咪去踢波囉，點建?咪因為我地兩個都係學校足球隊既老臣子，由中一入嚟踢到而家，佢前我後，佢攻我守，嗱，利申先，非Gay。
雖然我地踢既位完全唔同，不過喺成績上面嚟講，我地就真係一擔擔喇，經常都喺合格線上面游上游落。
好快，上學期既考試就出左結果，我都只係紅左兩撻地方啫，值得慶賀既係，我Phy竟然仲可以以3%之差，贏阿朗一個馬鼻，一個28%，一個31%。
但係贏還贏，翻到屋企，都係照樣俾老豆老母省到省港旗兵咁款，老母仲要罊過火屎，話如果下學期再係咁，就掉哂我d波衫波鞋落街。
另一邊廂，原來阿朗都同我遇上左同一個情況，今舖真係難兄難弟喇。
於是我地夾左計，決定去出面d大型補習社，睇下可唔可以惡補翻d physics，至少可以上翻四成既合格線。
之後既嗰一日，我地就拎好哂錢，去左銅鑼灣棕理嗰度，報一個叫MC Tin既「補習名師」。
坦白講吖，其實個個都喺張傳單度，寫到自己極把炮，隨身都有三把刀六枝槍，根本就唔知點樣揀。
不過哩個勁喇，個名改到成個Rapper咁，雖然就係一個阿叔咁既樣，不過唔知佢上堂會唔會無啦啦喺check this out呢？而且我聽d人講，佢喺行內，係最勁嗰個Physic阿sir嚟，咁今次實冇死啦，掂！
去到補嗰一日，阿朗個死仔冇啦啦話肚痛唔嚟，仲叫我幫佢jot埋notes，不過算啦，單機都係要照去，唔通蝕左d錢去咩。
堂就係上6點，但係我5點8既時候都仲喺學校，輕輕鬆鬆搭車過到去，都差唔多6點喇，咁第一堂就梗係唔想遲到啦，雖然我後來終於發現，喺大型補習社補習，你遲唔遲，根本係唔會有人理你，包括個阿sir。
於是，我一落車就狗衝去地址既嗰幢大廈，一開閘門，見到啱啱有部𨋢閂緊，哩個moment我即刻展現我既瞬發力，一個刺步標上前，㩒停部𨋢。
𨋢門打開，入面只得一個著住湛藍色旗袍既女仔，皮膚白皙，個鼻尖尖，眼眉低垂，頭髮長長，綁起左個馬尾，薄而鬈既瀏海披喺左額上，第一眼就即刻俾我感覺到佢強大既氣質。
驚為天人哩四個字，sorry，我諗並唔適合嚟形容佢既外表，我所感受到既，就只得一種簡簡單單、清新寧靜既感覺。嗯，就好似見到一個在雨天撐住傘，獨自孤立自己，欣賞雨境既人一樣。
「呼，輕輕鬆鬆。」我一入到去，正沉醉於自己既超強速度。
哩個時候，眼尾睄到佢論論盡盡好似想閂翻道𨋢門，原來佢手上捧住左一疊書，我嘰一聲笑左一笑，即刻幫佢㩒翻個制，但係，我感覺到，佢即刻好似白左我一眼。
唉，真係陰公，幫左你都要咁，算啦，唔理你，下次一定由你自己㩒。
叮一聲，二樓話咁快就到左，我又再展示我速度，拍完卡，連扭幾個，再cup一cup，迅速進入課室。
點知，7事發生左，原來上一班都仲未上完，其他人其實都喺出面排住隊等緊，NVM，一個好既龍門，必須要時時刻刻都保持冷靜，我若無其事，行翻出門口，心中默念：7到盡頭便是型。
到而定，我伸可以記得喺個班房入面，每一個人既面孔變化。愕然→空白→恥笑 我屌。
出到去，第一個打照面既就係啱啱同𨋢既嗰個女仔，佢好似零秒知道左啱啱我喺入面發生乜事，個樣好明顯就係笑緊我。
善惡到頭終需報，笑9人時總要被人笑9，so9sad,唉。
不過，原來個女仔都係同我同一班既，呵呵，我諗應該都仲有機會可以笑翻佢既。
個半鐘好快就過左，個阿sir當然係唔識rap，不過爛gag就多多，都幾鬼馬，講講下書，仲可以攞剪報出嚟講，時間好快就俾佢dum哂。
執野走嗰時，我掃一掃班房既角落，不帶任何目的。不帶任何目的……應該係。
補完習，個肚唔知點解零捨餓，反正IKEA都唔算遠，落去執翻個熱狗餐再整多個肉丸都好。
乍乍林，即刻用小林尊既速度鯨吞哂d野食，萬事俱吃，只欠百事，即刻去汽水機斟翻杯先再講。
奇怪卻是茄汁污垢 滲在這襯衣布章外邊
極其大意 為何如此
如果大家都有去過銅鑼灣嗰間IKEA既話，你地就會知道，其實入面活動既地方係好窄，一個唔覺意，就好易瀨野。
點瀨？好快你就知。
當我裝完汽水既時候，一另轉身，即刻就撞到一個啱啱擠完醬既人，佢手中既熱狗，就好似一把劍插入我胸口，而啱啱佢擠完既茄醬，好不幸地，通通都揩哂落我恤衫，令我左胸對上形成左一撻好似血跡既野。
「Oh shit 我件恤衫呀。」
我望一望個人，原來又係啱啱喺𨋢既嗰個女仔，我當堂打左一個突，望到佢定一定。
佢對眼碌左一碌，望一望我件恤衫，又望一望自己隻熱狗，唔知點好。此情此景，我諗起一個四字詞，呆若木雞。
咁我就梗係即刻去攞張紙巾抹抹啦，行埋去一角既洗手盆，試試濕下水抹會唔會好d。
「Sorry 我無心整到你㗎，點啊，洗唔洗得甩？洗唔洗我賠翻你？」耳邊突然有一把温柔而焦慮既聲傳嚟，個女仔都急急腳咁行咗埋嚟。
「哈哈，我睇你應該都唔會特登嘥一隻熱狗去整我哩個陌生人掛。應該好小野啫，唔洗賠錢咁誇啦。」我轉身對佢笑一笑，雖然我好戥我件恤衫唔抵，但係自古聖賢教導，面對靚女喎，必須要時刻都保持風度咖嘛。
佢撥一撥頭髮，喺個袋到攞左成包濕紙巾，遞俾我，「你用濕紙巾試下抹？可能會好一D。」
老實講，我真係呆左一呆，因為喺嗰一刻，我真係唔知佢係真心定假膠，仲覺得俾人幽咗一默，我訕笑，「其實呢，一張濕左水既紙巾，同一張濕紙巾，本質上嚟講呢，係冇分別既。」
我講完，佢塊面即刻變到極紅，仲dup低左個頭，我居高臨下既角度，睇得到佢既眼睫毛顫抖緊，而原本拎住濕紙巾嗰隻手即刻垂翻低，靜默，二人佇立原地。
你及時遞上餐紙 去為我清洗襯衣
剎那間身體的觸碰大件事
個畫面好靚，好靚，突然之間，內疚感湧現左出嚟，責怪緊自己唔應該調侃佢。
「喂，我講下笑咋，真係好少野啫，咁啦，嗱，俾我攞你一張濕紙巾喇。」隨即，我捉住佢啱啱垂住左既手，抽左一張濕紙巾出嚟，喺佢面前揚一揚。
見到佢好似笑翻，咁我都定翻d喇，但見到佢仲係個樣怯怯地，我補翻句，「我ok㗎我，真係冇事，bye」，我都唔想再糾纏落去，頭也不回，走了。便如一個瀟灑既浪子。
出到去，我即時屌左聲，個天無啦啦落緊大雨，隨性既我，當然不嬲係唔會帶遮。此情此境，都冇計喇，唔通仲行翻屋企咩，無謂慳嗰幾蚊，即刻跑去電車站。
我fing 一fing身上面既雨水，等左陣，都仲未見到有電車嚟，我撥左個輪翻屋企，同屋企人講，叫佢地等埋我先好開飯。
講完電話，都仲係未有車到，霎時醒起仲未屌爆阿朗條衰仔，即刻就喺whatsapp到錄左段起碼成一分鐘既錄音。
𠹶𠹶𠹶𠹶，雨好似落得越嚟越大，唔知啱啱個女仔會唔會都冇帶遮呢？我望住自己紅色嗰撻地方，笑左一笑。
嘩，做咩事啊我，成件事勁毒呀，我陽光型咖嘛，我即刻搖一搖自己個頭，拍拍自己塊面，快d清醒喇。
無野做咪唯有望下風景囉，突然間，我望到右邊正係有不明物體以高速跑過馬路，跑左上電車站。
真慘，離遠咁又見到一個冇帶遮既同路人，咦唔係喎，望真d，原來又係啱先個女仔，喺嗰陣，都咪問背脊有冇出到冷汗，個心淨係諗，會唔會係咁恐怖，連諗下佢都會即刻出現？！？
視線，同佢連上左，佢擘到隻眼大一大，又好似啱啱喺IKEA咁望到我實一實，而我，應該就係用翻一個驚奇而又帶點慌張既眼神望翻佢。
佢旗袍既裙擺濕左一大片，變咗調既湛藍，佢行左埋嚟，氣氛好似有d尷尬。
「Hi 又見到你既，乜你都冇帶遮呀？」我嘗試提出一d問句，好令成個場面唔好咁突兀。
「嗯，乜你等緊電車？」佢回翻我，有冇發現，我地講既野，全部都同「我阿媽係女人」完全冇分別。
「錯，我係等緊你。哈哈。」
佢塊面又即刻紅左，不過，我都即刻意識到哩野好似有少少flirty，即刻補翻個靚飛先。
「er⋯⋯你知唔知我係香港少年軍？即係港少啊我。」
佢噗哧一笑，兩隻眼珠斜視住我，「點解你個人好似好鐘意講笑既？」
「唔講邊到有笑喎，係咪？做人咁正經，邊度開心啫。」
佢依然冇應到我，但氣氛開始冇咗怪。
「喂，係呢，你有冇聽過三面之緣哩樣野？」
「嗯？冇喎，乜野嚟㗎」
「如果有兩個人，佢地本身都唔識既，但係呢，佢地喺一日之內就撞到對方三次，而且仲要有過交雜，咁就證明佢地好有緣份，嗱，你諗下，喺一個咁大既地球入面，兩個人相遇既機會率就係六十億份之一，而撞到3次就即係要再個數3次方啦，你諗下，個機會率有幾細微？所以啊，你話喇，咁樣係咪好有緣份吖？」
「哦，真係未聽過喎，不過聽落都好似幾得意。咦？唔通你喺度喑示緊我地之間好有緣份？」
「噲，你又蠢唔哂喎，見你論論盡盡咁，估唔到你又轉數幾快。你好，Miss…Yuen Fun，我叫阿成。」
佢佯作慎怒，「哼，你講乜啊。算，見你之後幾有禮貌。哈囉，Mr. Yuen Fun，我叫采兒啊。哈哈~」
「叮叮」，以依一個咁好既氣氛嚟講，哩兩下聲，無疑係有d大煞風景既，天啊，點解你唔可以俾多少少時間我，去認識多d哩個「新朋友」呢？
唔係喎，話唔埋我地可以一齊搭車呢～
「噲，等左咁耐，依家先終於有車，係呢，哩㗎你啱唔啱？上車繼續傾？」
佢皺一皺眉頭，然後再輕描淡寫遺下一笑「喔，我住石塘咀嗰邊啊，但哩㗎係去上環。你快d上啦，下次再見，哈哈。」
就係哩一下笑容，正式咁，將我煞到。
我冇應到佢，直接上左電車，不過，喺上之前，我另轉個身，對住佢，揮揮手，並指住自己左胸個位，然後再露出一個不懷好意既笑容。
嗯，我諗咁樣，應該可以留到一個印象俾佢既。
轉身前一剎，只見佢做咗個咀形，好似同我講咗d野。無奈我既轉身速度媲美法國小跑車Tony Parker，喺我意識度既時候，一切佢為我停留既眼神，湮沒咗喺我身後……
上到車之後，我苦思緊…究竟佢想同我講既係咩呢?