「冒險」「生存」《香城之夢》: 捕獲

 Elaine提出先用麻醉槍麻痹條友，再用鎖鏈等高強度物品綁住佢送佢去最近既差館。
 
呢個的確係目前最好既辦法，但Elaine亦馬上提出左相關既風險。
 
就係麻醉槍既射程範圍十分有限，要係大概兩個身位射先有效。
 
咁即係話，我地要同條友係非常近既距離下接觸，而且以條友之前既表現黎分析，佢會突然發狂爭脫瓦礫黎襲擊我地係完全唔出奇。
 
單憑而家既人數去捉實在太大風險，所以我地最後決定先同阿叔佢地成隊會合，等戰力多返D先行動。
 




Chris當時即刻提出異議，話就咁由目標留係度會有被其他玩家搶走既風險，咁我地既努力就會白費左。
 
但L好快就反駁佢，話只要我地行動快D，其他玩家絕對唔會有機可乘，因為隻怪物絕對唔會乖乖就範，一定會爭扎一番，到時我地再趁機搶返主導權就可以。
 
面對大佬俾出肯定既答案，身為細既Chris都無再多言，只好服從。
 
係成功得出下一步應該要點做之後我地就迅速行動，沿住頭先落黎既路返上去搵其他人。
 
同落黎既時候唔同，今次我地唔需要慢慢推進，甚至可以話係要爭分奪秒，所以速度比起上次快左好多。
 




大概四五分鐘，我地就返到超市，見返阿叔佢地。
 
阿叔佢地見到我地個個都氣喘喘咁都大為驚恐，不斷問咩事同有無受傷之類既說話。
 
原本我打算解答呢D問題並且順手說明一下而家既狀況，但L搶先我一步行左出黎。
 
L：「全部人拎起槍跟我走！無時間係度慢慢解釋！」
 
個個一聽到L既號召就即刻跟住做，就連受左傷既都一樣拎起槍整裝待發，而且一句說話都無講，就好似一支軍隊咁。
 




我只能夠話L既統帥力真係好厲害，可以令咁多大人聽佢講既野去做。
 
我地成隊人好似飛虎隊咁浩浩蕩蕩重新向地鐵站出發，就好似荷里活大片咁。
 
沿路上L仲好快咁將成團人分成幾個小隊，各自交付唔同既工作任務，只係行過左一條天橋，大家已經知道自己要做D乜。
 
由於關鍵既道具麻醉槍只有Elaine先有，所以負責呢part既人好似就係佢，而身為佢朋友定係拍檔既我自自然然就要陪住佢。
 
好快，我地就返到去地鐵站下既商場，再一次走到去個條電梯口。
 
我地既目標仍然卡住左係瓦礫下，不過同之前唔同既係佢已經無再爭扎，好似訓著左咁。
 
點解我可以判斷到佢只係訓著左而唔係死左？因為其他小隊既狙擊手透過狙擊槍見到佢既血量條，所以知道佢並未死去。
 
但點解佢郁都唔郁我地就不得而知，亦無時間再分析。




 
L：「作戰開始。」
 
係L一聲之下，大家都紛紛跑去自己既崗位，準備了結呢一場噩夢。
 
無錯，只要捉佢去到差館，呢一切一定可以完結。

 -待續-