是咁的，我嘅職業係ptbf: 260.湊仔

探完李星，我見無野做就翻屋企

星期一嘅下午，屋企依舊空蕩蕩一個人都無

我諗翻阿文同我講，話我而家嘅職業話唔定幫到我改善同老豆嘅關係

於是我拎出電話打比老豆，可惜無人聽

都啱嘅，應該翻緊工，唔得閒聽



「聽日陪我丫。」正當我想放低手機，就見到阿螢搵我

「做咩？」

「有親戚託我睇住佢個仔呀，我請咗假架喇聽日，你幫下我手丫～」

「湊仔我唔掂架喎。」

「你負責帶佢屙殊殊就得架喇。」



阿螢敲定埋時間地點，然後就話聽日見

橫掂無野做，就陪下佢

雖然我做慣人地嘅男朋友，但同客人一齊湊仔，真係第一次