「東英」奔雷虎 : 耀揚: ( 12 )「立花正仁」身在。。
無巧不成書，奶仔呢個時候，就剛剛連同兩個近身入到 Bar ，「睇場」如釋重負：
＂奶仔哥你嚟得啱嘞，有人搵你。＂
奶仔見到耀揚背影，已經感覺到散發出嚟嘅一股霸氣，到耀揚回頭時，心裡即時感到「麻煩」搵上門嚟。
奶仔個樣雖然好似兇神惡殺，再加上光頭及高大健碩，實則心地倒算善良，為人重情義，係「溫純巨人」，所以同立花咁夾得嚟，跟眼前耀揚相比，正好係一個完全相對。
奶仔出奇：＂耀揚？＂
更加出奇嘅係耀揚竟然展起笑容：
＂奶仔，你嚟得真係啱，我正係想揾你。＂
奶仔完全摸不著頭腦，因為耀揚跟佢，從來河水不犯井水，而一向以麻煩狠毒見稱嘅耀揚，竟然衝著自己而來，愕然之際，膊頭已經被耀揚搭住：
＂嚟，奶仔，我哋搵間 VIP 房，想同你單獨傾啲嘢，方便嘛？＂
奶仔仍然唔知耀揚胡蘆賣緊乜嘢虊，耀揚已經再加：
＂放心喎，唔係郁你哩，你呢度成個場都係你嘅人，就算我掃低哂，我都仲要走得出條街㗎，所以唔使驚喎。＂
奶仔只好答：
＂咁，呢邊啦。（再轉同其他人講）大家放心，我哋唔係「儭家」，無事嘅。＂
VIP 房內，耀揚開門見山：
＂奶仔，我今次嚟，其實係要搵立花正仁，不過，我唔想畀其他人知道，所以先借你過橋，因為我知道你可以幫我安排。＂
奶仔終於明白：
＂不過，立花大哥唔喺香港喎。＂
耀揚：＂我屌你，你唔撚係玩鳩我呀嘛？立花唔喺香港？＂
奶仔：＂我呃你做乜喎，立花大哥返咗去日本，唔信我可以即刻畀電話佢。＂
耀揚沉思一會，的確，立花唔會避開自己，而揾奶仔去頂，況且，立花亦唔知道自己會嚟搵佢：
＂咁好吖，麻煩你即刻幫我 call 佢，嗱，我唔係唔信你，不過，我真係有急事要搵佢。＂
奶仔只好打電話畀身在日本嘅立花：
＂立花大哥？＂
電話另一邊傳來立花聲音：
＂咦，奶仔？有事發生？＂
因為立花曾知會奶仔，日本期間，有事先好 call 佢，奶仔答：
＂我就無事，不過有個人，話有緊急事想揾你。。係「東英」耀揚，佢依家就喺我身邊。＂
立花回答：＂好，交個電話畀佢，由我同佢講。
奶仔將手中電話交出，耀揚嘴角掛笑伸出手接：
＂立花？＂
~ 待續 ~