「東英」奔雷虎 : 耀揚: ( 10 )全軍覆沒

* * 注意，上一集談及耀揚被「和記」要請，原橋段來自「立花正仁」外傳，為配合此版本，耀揚係仍未被立為「奔雷虎」，「立花」考試，亦由晩上六點推至十一二點

。。。。。。。。。。。。。。

眨吓眼，兩星期已過，由齊天所帶嘅一行十三人，呢團人嘅實力，即使未至無堅不摧，實也絕對不易對付。

的確，當初到達一星期後，已經被當地東英，「穿針引線」漂漂亮亮，完成大大小小三數場勝仗，將「一和會」趕出，收復唐人街失地。

豈料，之後嘅一星期，又或者應該講，一日之內，本來已經打算回歸。。不尋常事發生喇。。





駱駝收到日本來電， 震驚不已：

”乜嘢叫做「失蹤」呀？打撚死咗都有條屍㗎！！就算畀人斬到一椂椂，都有一堆嘢啩？”

另一邊：”頂。。頂爺，有。。有，有一條屍。。但認唔出個樣，不過以身形估計。。身形細，雙臂粗大。。應該係齊。。齊師傅。”

認唔出個樣，因為本來「黑黑實實」嘅齊天，已經黑至「炭炭燋燋」，除此之外，仲變成一隻「箭豬」！

相信，當時戰情，齊天已經非常了得，因為大部份「箭」，已經被雙臂所擋，但，更結實嘅肌肉，又能擋多少箭呢？





即使有更快絕嘅身手，能快得過「箭」，能擋得著氣油彈的火嗎？

不能。

駱駝聽到消息，收線後，手按著額頭：”唉，咁撚大劑，屌那媽，頭都痛撚埋。。班死日本仔吖。”

不過，坐喺佢對面枱嘅一個人，只係嘴角掛起一絲「幸災樂禍」嘅冷笑，社團兄弟嘅慘敗失蹤，有人被燒至不似人形，就好似完全唔關佢事，繼續咁吸啜住支黑幼細長嘅 Moore 香煙：

”老頂，你又唔係啦，「五虎」空缺搵人填呢啲筍嘢，都唔單聲我知？不過，我都收到風。。





點呀？班「牛屎飛」同隻「馬騮」 全軍覆沒 呀？

屌，預撚咗㗎啦，嗰啲人，邊有智慧去同啲架仔玩㗎，哈，真係好撚好笑。”

駱駝身邊嘅古惑倫問：

”耀揚，你想見老頂有乜嘢事？”

耀揚：”冇，上次「和記」考「雙花紅棍」嗰鑊我執到啲，想搞啲「郵票仔」生意，希望老頂能單聲畀各單位知，滾大啲生意啫。。話時話，倫少，班「牛屎飛」條橋唔係你度呀嘛？搞撚到人哋一鑊粥，唔似你喎。”

古惑倫面色一紅：”先頭步隊，試下對方實力啫。”

耀揚再輕輕吸入一口煙，然後，細味古惑倫嘅回答，思考咗一剎：

”吾，無錯，應該嘅，倫少果然有智慧，不過。。依家試出啦。。全軍覆沒。。送班牛屎飛去到踩地雷”





駱駝本來對十三人滿有信心，不過現在，更顯出日本危機，深不見底，耀揚亦睇得出呢一點，又再加多句：

”蝦，唔知日本，仲有幾多地雷，要犧牲幾多東英蠢人，先至踩得哂呢？。。。點睇呀，倫少？”

古惑倫答：”耀揚，你有嘢就講。”

無錯，日本來壞消息，駱駝已經一頭煙，古惑倫亦要消化一下，但偏偏耀揚又喺度單單打打，幸災樂禍，不禁令人更加煩惱無癮。

耀揚：”好，我今日除咗嚟傾「生意」之外，仲想同老頂引証一下，日本單嘢，係咪如果邊個搞得掂，就可以坐「東英五虎」嗰個位先？因為，我有興趣。”

駱駝同古惑倫都同時有啲唔相信，因為剛才來電（廣播式會議電話）都聽得出，日本，凶險啊。

擺到明係「火棒」，耀揚居然主動去接，無他，發圍已經一年，如果想將事業再上一層，唔掛番一個「非一般」嘅「朵」，頂多，亦只係「十大紅棍」，人哋一個「立花正仁」，都已經可以「以一敵十」（即使做咗手腳），所以，一般「紅棍」，耀揚已經唔希罕，一年前，佢已經想成為五虎之一，往後嘅生意，如果配合埋地位，就等於黑道中嘅「超級富豪」。





駱駝想咗一想：

”好，我應承你，本來呢個位，就係有能者居之，上次喺「圍村」已經咁決定，你有興趣，就即本畀你試下囉。。你打算可以幾時起行，同埋有乜需要？”

耀揚：”我只需要一兩日時間預備，不過，我想見一見水靈姐先。”

駱駝望向古惑倫，而古惑倫無任何表情，其實，古惑倫跟駱駝多年，雙方已經有一定默契，當駱駝有問題時，望向古惑倫，而古惑倫面無表情，亦即代表同意。。唔通，身為「龍頭」，要畀人知道自己要睇見身邊助手點頭，先夠膽「去馬」嗎？

駱駝回答：”無問題，你返去先，我要知會水靈姐後，先再通知你。”

耀揚走後，駱駝終於忍唔住口：

”串得條撚樣吖，就由得條撚樣去日本踩地雷。”

古惑倫無出聲。。因為，佢知道耀揚靠嘅，唔係單一個打字，至於，有乜嘢辦法，如果古惑倫諗到，一早，就已經向駱駝同水靈獻計。





所以，連古惑倫都估唔到，耀揚將會用乜嘢方法。


～ 待續 ～