「東英」奔雷虎 : 耀揚: ( 4 )「蔡李佛」蔡立賢 / 「大聖劈掛門」齊天

駱駝收到水靈枱底下嘅「指示」，就開聲向同枱中嘅其中一位中年人舉杯：

＂蔡師傅，聽聞你最近又開多一間分館，恭喜恭喜，上次未有光臨新館開張，今日我就補敬你一杯。＂

原來席上呢位「蔡立賢」蔡師傅，係新界一帶有名嘅「蔡李佛」傳人之一，開有多間武館，甚至海外，都有其分館，而其中一間，就係喺日本唐人街。

而蔡立賢有四個兒子「英丶雄丶仁丶傑」，最好打嘅，就係二仔，蔡雄喺「拳壇」相當有名，亦係東英「棍底」，曾經喺擂台上，跟「下山虎」烏鴉 (「東英五虎」之—)，打過旗鼓相當，不過最後評判因畀面烏鴉名氣來頭，判烏鴉勝出。

雖然蔡師傅本身唔係社團中人，但新界區，很多「東英門生」，都喺其門下弟子習練，而其多間武館，能夠「平安無事」，蔡雄本身係「東英紅棍」當然係其中原因，所以，能夠有資格同駱駝一席。





然而，亦係古惑倫嘅安排，因為，蔡立賢就係兩個有可能幫助「日本之憂」嘅其中一人。

蔡師傅知道「東英」對其多間武館嘅牽連，即使本身唔想介入江湖之事，但亦唔敢得罪，所以，一直都保持一個好小心嘅態度，即時亦舉起酒杯，接敬回駱駝，而身邊二仔蔡雄見老豆舉杯回應，當然亦即同時一齊舉杯，龍頭當眾敬酒喎，幾有 face 呀。

蔡立賢：＂唔敢當，唔敢當， 區區一間小武館，點敢勞動到「社長」你呢，多謝多謝，就係今日有幸被「社長」你邀請到此享受「盤宴」，實在已經覺得萬分不配。＂

哈哈哈，好明顯，蔡立賢係畀古惑倫「硬請」出席㗎啦，理由亦好似合乎道理喎，因為駱駝回應：

＂配，絕對配呀，蔡師傅你幫我哋「東英社」作育咁多精英，令二公子更係我哋社團出色嘅「職員」，我駱駝識英雄，重英雄。





另外仲有，既然我邀請得到「齊師傅」（望向同枱另一人），唔通我咁唔識輕重，請佢唔請你嗎？

（講到呢度，駱駝將杯轉向「齊師傅」）

嚟 嚟 嚟，「齊師傅」，我駱駝都敬你一杯，多謝你咁賞面光臨。＂

「齊師傅」，全名「齊天」，「大聖劈掛門傳人」，年齡為四十二，個子不算高大，黑黑實實，雙臂跟其身形比例起來，較長同粗大，即使平常狀態，肌肉紋仍然清澈可見， 渾身散發一股只有習武多年才能有嘅「動感氣息」，仿似，只要你一眨眼，佢就可以向你打出十拳，到你睜番開眼時（如果仍然可以睜番開眼嘅話），會發現自己已經被擊到地上。

齊天嘅武館，唔算多，不過亦有三間，一間就喺元朗，另一間喺荃灣，而第三間，其實只係其入室大弟子，掛其名所開，不過佢亦有股份，大弟子三年前移民到了日本開嘅。。無錯，跟齊天有關連的第三間武館，就喺日本唐人街。





齊天當年到元朗開第一間武館時，當然受到蔡雄去「踢館」嘅待遇啦，而出人意表嘅，竟然係蔡雄完全奈齊天唔何，齊天亦無將蔡雄擊敗，原因可能知道其父武林背景，又或者蔡雄本身社團背景，所以唔想將事化大。

後來蔡立賢知道後，更親身去到齊天武館拜會，亦吩咐蔡雄以後要尊敬齊天武館，蔡雄雖然係古惑仔，不過對其父亦非常尊敬，話哂，自己一身功夫，都係佢教出嚟。

而今次，古惑倫係同蔡雄一齊到齊天武館請齊天出席嘅。

相信，大家開始明白「古惑倫」嘅計畫，而「齊天」，就係另一個將會被卷入到日本「幫助」嘅人。

~ 待續 ~