【《講鬼台》（二）少年驅魔人】: 5.9

離開了馬子蕾的家後，光耀和柯蘭便一同前去用午膳，二人沿著附近的海旁一邊踱著步，一邊享受著沁涼的海風。
 
「師父啊，點解剛才有錢都唔收？」柯蘭問道。
 
「我之所以黎幫手，並唔係為左錢。」眺望著遠海的光耀回應。
 
「但係…你唔係講過要平衡理想同埋現實架咩？」
 
「……」光耀沒有回應。
 




柯蘭又問：「你咁鍾意幫人驅鬼，但係每一次都係免費幫人做野，咁咪好蝕囉？」
 
「我唔同你，我有份正職喺身...」光耀閉起了眼，細心聆聽著令人心曠神怡的海浪聲：「加上我並唔係完全無收獲，只不過呢種回報並唔係可以用金錢去衡量。」
 
「吓…」柯蘭不解，傻兮兮的搔著頭。
 
「實不相瞞，其實你表姐根本就唔係撞邪…頭先我所做既一切只不過係一場戲，根本乜都無做過，所以我係唔會收佢啲錢。」
 
「誒！？」柯蘭感到相當詫異。
 




「喺屋入面，我感應唔到任何污糟野，加上佢口中所謂既被鬼壓，其實只係佢精神過份崩緊所導致既正常現象…所以根本就無任何鬼。」
 
柯蘭不語，只是圓滾著眼珠，不時又打量著光耀。
 
「你唔信？」光耀問。
 
「信啊，但點解師父你唔直接同我表姐解釋，仲要搞一場大龍鳳呢？」
 
「哈…你覺得鬼魂可怕嗎？」
 




「當係可怕啦。」
 
「鬼魂係可怕，但只要你唔驚佢，其實鬼魂一啲都唔可怕。」
 
「哦…」
 
「最可怕既…其實係住喺我地心入面既魔鬼。」
 
「你指既係…心魔！？」
 
「無錯，心入面既鬼先係最得人驚既鬼。想要徹底消除心魔，只可以靠自己，而心魔係無形，要克服佢一啲都唔容易…世間上之所以咁多人自尋短見，咁多人起殺念，咁多人拋妻棄子，咁多人背信棄義…一切既人性醜陋，心靈懦弱，負面情緒同埋道德既遺反，完全都係因為擺脫唔到自身既心魔所造成。」
 
「哦…」柯蘭耐心細聽。
 
「你表姐正正係因為太過投入於電影世界，抽離唔到，所以先會經常疑神疑鬼…我之所以搞咁多野，只係想幫助佢克服心魔。假如我直接話一切只係佢喺度疑神疑鬼，我怕佢會受唔住刺激，然後以為自己精神出現問題，咁樣可能會令佢更加睇唔開…你知啦，電影都算係一門藝術，而從事藝術既人，脾氣同性格通常有別於常人，思維可能會比較偏激，為人亦可能比較沉鬱…為免令你表姐胡思亂想，我唯有做呢場戲，講左呢個大話。」




 
「原來係美麗的謊言…」柯蘭恍然大悟：「師父你真係諗得好周到。」
 
光耀淡然地笑了笑，聳了聳肩。
 
「咦…」柯蘭瞇起了眼，凝望著海面：「海上面有個西瓜波喺度漂吓漂吓喎！」
 
「城市人一向都無公德心，咩都掉落海架啦，有咩咁出奇？」光耀說。
 
「師父，我曾經聽人講過，假如有人喺海度浸死，而又搵唔翻屍體既話，只要拋個西瓜落海，條屍就會自動浮翻上黎，點解既？」
 
光耀解釋，拋西瓜乃傳統的招魂儀式，西瓜的諧音是「屍歸」，相傳具有尋找於海上失蹤的人的能力。假如有人於海上遇難，只要其親人於事發地點拋一個經開壇作法和念咒的西瓜到海中，西瓜便會發揮出搜尋的效用，於海中找尋有關失蹤者的屍體。假如西瓜漂到某一位置然後突然沉下去的話，那表示失蹤者的肉體就位於附近。
 
除了拋西瓜，其實親人也可以於海邊進行拜祭，一邊燒金銀衣紙，一邊大喊失蹤者的名字。正常情況下，經過一段時間後，失蹤者的屍體會自動浮到海面上，以便打撈人員發現。
 




這時，光耀身後傳來了「撲通」一聲，而柯蘭亦忽地驚喊：「哇！有人跌左落海啊！」
 
光耀立即上前，掃視著海面上的情況：「邊度！？」
 
柯蘭指著前方的不遠處：「嗰度啊！」
 
光耀發現跌落海中的是一名女生，她正在水中極力掙扎著，看似並不熟水性。
 
「救人先！」他二話不說衝了上前，將個人物品交給了柯蘭後，便奮勇地縱身一躍，跳了下海。
 
柯蘭一臉憂心的站在原地，這時，海旁開始聚集起好奇的群眾來。
 
未幾，光耀便將該名女生拯回到岸邊，群眾見狀均紛紛為這位少年英雄報以熱烈的掌聲。
 
不久後，救護人員到達了現場，並將該名女生送往醫院，小插曲告一段落。




 
渾身濕透的光耀則顯得有點狼狽：「哈…搞到成身都海水味添…」他邊說邊撥弄著溼淋淋的頭髮。
 
「哎…睇怕都去唔到食飯架喇，你翻屋企啦師父，我自己一個食得喇。」柯蘭說。
 
「自己一個食咁寡？不如買外賣翻去我度食啦，食完提早練功，今堂我開始教你打木人樁。」
 
「又好喎！」柯蘭興奮道。
 
回家的路途上，不小心著涼了的光耀一直在打噴嚏。
 
柯蘭捏著鼻子，一臉嫌棄：「你個身好大陣海水既腥味…」
 
街上的途人紛紛往身上散發著怪味的光耀投放奇異目光。
 




「乞嚏～！」這已經是他的三十個噴嚏。「影衰你啊？行開啲囉。」然後又是一個噴嚏，鼻子都開始紅了。
 
接著，柯蘭負責買外賣，而光耀則先行回家洗個澡。
 
填飽肚子後，他開始指導柯蘭打木人樁。
 
「乞嚏～！」
 
光耀一邊傳授口訣，一邊用紙巾拭著鼻水，不消一會，一整盒紙巾便已被用個清光。
 
「師父，你一定係冷病左喇…」柯蘭一邊打木人樁一邊說：「不如去睇吓醫生啦。」
 
「唔使…少少傷風者。」
 
「為左救一個唔認識既人而搞到自己病左，值得咩？」
 
「值得！人命黎架！」
 
「其實就算你唔跳落水救佢，都會有其他人救架啦。」
 
「你試想吓，如果所有人都抱住呢個想法，呢個世界會變成點？個社會變得咁冷漠，正正係因為人人都覺得事不關己，己不勞心，各家自掃門前雪。」
 
「……」柯蘭不語。
 
「你唔認同？」光耀問。
 
「唔係…只不過你咁樣捨身救人，未必個個都會欣賞者…」柯蘭顯得有點憤慨：「就頭先喺海旁咋嘛，我見到有啲人喺度恥笑師父你啊。」
 
「哈…別人既目光，其實唔需要在意太多。有啲事，無須要證明人地係錯，只要知道自己係做得啱，就已經足夠…你年紀仲細，有啲野，你大個啲就明…乞嚏～！」
 
「不如你去食粒藥，然後去休息吓啦，我自己一個人練就得架喇。」
 
「都好…咁我訓翻半個鐘先，你自便啦吓…肚餓既話，廚房有杯麵。」
 
「得啦，我又唔係第一次黎，熟哂架步架喇！」
 
接著，光耀吞了兩粒感冒藥後，便躺到了廳中的沙發上稍作休息，而柯蘭則獨自摸索著與木人樁對練的精髓。
 
闔起眼，聽著木人樁被拍擊時所發出的清脆聲響，彷彿一首催眠曲正在播放。
 
很快，光耀的意識便開始變得迷糊了起來，繼而走進了夢鄉…