【《講鬼台》（二）少年驅魔人】: 1.2

黃昏。
 
財記紙紮鋪。
 
「下午茶時間到！」光耀走進店內，將兩份熱騰騰的外賣放到了木桌上。
 
一名大叔從報紙後探出頭來：「咦！？今日星期日喎，咁得閒既，無街去咩？」
 
這位四十來歲，頭戴深色鴨舌帽的男人，是這間財記紙紮鋪的老闆－財叔。
 




「我呢啲宅男，邊有街去架…」光耀說：「係喎，下個星期日父親節喇喎，嗰晚唔好煮飯喇，出去打邊爐啦，我請！」
 
光耀的身世頗為坎坷，自幼無父無母，其母於他出生不久後便於一場交通意外中喪生；其父與財叔乃出生入死的好兄弟，卻英年早逝，輾轉間財叔成為了光耀的監護人，並一手將他養育成人，二人雖沒有半點血緣關係，多年來卻一直情如親父子。
 
「唉…」財叔唏噓地嘆氣了一聲，隨即又把頭埋進報紙中：「財叔唔使你陪架喇，有時間既話，去識翻個女仔好過啦。」
 
「哈，識女仔…」正在執拾著檯面的光耀無奈地笑了笑：「你講到好似好易咁，好難架！」
－　尤其當自己的心早已被某位女孩佔據。
 
「要唔要我介紹啲俾你啊？我識得有個街坊個女都唔差架喎，大學生黎架！」財叔豎起了姆指。




 
「又相睇！？」光耀雙手交叉橫抱於胸前，氣憤道：「咪搞喇！上次你個咩咩舊同學個女，大肥婆黎既，仲嫌害我唔夠！？」
 
財叔搔著下巴那撮滄桑的白鬍，笑說：「肥有咩唔好？好生養啊！」
 
「嘖…」光耀沒他那麼好氣，逕自走到電視機前坐下，於紙紮人偶旁邊一邊收看電視，一邊細味著剛買回來餐蛋麵。
 
財叔又說：「今次唔同架喇，我已經問清楚，今次呢個係大學生黎，又靚又叻女！」
 
「你都識講人地係大學生啦，我呢啲中五都未畢業，搵得又唔係多錢，點襯得起人啊？咪玩啦！」




 
「愛情既野好難講既，話唔定你地兩個一拍即合呢…」
 
「唔會囉！」
－　一定不會！除非有一天，自己把她忘了吧…但，那是沒有可能的事。
 
「係喇光耀，後晚放工之後，你得唔得閒啊？」財叔問。
 
「無啊，咩事？」光耀仍專注於電視中的卡通。
 
「就咁既…有個成日黎幫襯我既師奶，佢個姨甥前排喺一單交通意外中過左身，仲話死者最近成日報夢俾佢，話無錢使同埋無衫著，但係佢屋企人明明已經燒左好多野俾佢…」
 
「唔！？姨甥報夢？」光耀輕皺著眉，若有所思：「死者既雙親仲健在嗎？」
 
「老母仲喺度，但老豆就聽講喺幾年前已經過左生。」




 
「嗯…你講嗰位師奶係咪可以睇到嗰啲野？」
 
「聽講以前佢細細個嗰陣係有過陰陽眼既，但後來結左婚之後，陰陽眼就好似無左咁，再見唔到嗰啲野喇。」
 
「哦…」原來如此。
 
婚姻是兩種命格的結合，配偶的命數對自身運程也會有一定程度的影響，被天生賦予的陰陽眼有可能因為兩者命數的相沖而失效。
 
亡者通常只會報夢給自己至親的人，亦即自己的父母，除非某些緣故而無法直接報夢給自己的父母吧，否則絕不會託夢給其他人。能夠透過夢境接收亡者來自陰間的訊息的話，那個人通常是擁有或者曾經擁有過通靈的能力。
 
「佢地家境唔係咁好，請唔起法事師傅，所以…」財叔搔著頭，欲言又止。
 
光耀將經已吃光光的外賣蓋上，站了起來，泰然道：「得啦，你夜啲俾佢個電話我，我了解吓係咩事先，後晚放工之後幫你搞掂佢。」
 




財叔如釋重負道：「好…唔該哂，下星期日打邊爐嗰餐我既！」
 
「傻架咩…講啲咁既野，一單還一單呀嘛。」
 
「係者，但成日要勞煩你，又無報酬，我有啲唔好意思呢…」
 
光耀輕拍了財叔的膊頭一下：「傻啦財叔，我做呢啲野都唔係求回報既，既然自己有能力，幫到既咪盡幫囉。」
 
財叔欣慰地點了點頭。
 
「下星期餐飯，唔好同我爭埋單啊。」光耀。
 
填飽了肚子，又沒事幹，光耀從抽屜中取了兩包白兔糖和幾根大型香燭後，便離開了紙紮店。
 
太陽西下，象徵著日落的火雲滾燙了整片天空。




 
後巷中，身上掛著一個黃色大布袋的光耀一邊輕鬆地吹著口哨，一邊將白兔糖撒在地上，糖果跌落在地上的時候，發出了噠噠噠的清脆聲響，響徹了整條無人的陰森冷巷。
 
幽暗的後巷裡，除了勉強滲進大廈縫間的稀微日光，便幾乎燈火全無。
 
入夜後，後巷的陰森程度更劇，四周彌漫著一片危險詭異的氣息，教置身在此處的人不寒而慄。
 
沿途，光耀一直在撒糖，一直撒…
 
他身後的地上，理應是滿佈以白色包裝紙裹著的糖果，但全數糖果卻離奇地消失得無影無縱…
 
偶爾，光耀的耳邊會聽到某人的淒厲哀號，眼前更飄浮著常人肉眼無法看得見的綠色光點…
 
這些奇異的綠光，就像叢林熱舞中的螢火蟲。
 




就在眨眼的瞬間，他眼前的全數綠色光點霎時變為了一團團相當立體的幻影…
 
那些幻影擁有著人類的姿態，身上發著莫名奇妙的綠色光芒。
 
有些巍巍峨峨，漫無目的地盪踱著；有些雙腳不觸地，於半空中無重般飄浮著。
 
那是，擁有陰陽法眼的人才能看見的…
 
靈體。