當年我曾經追到一位女神,但我竟然飛左佢。: 後篇:完結
阿彤角度:
我再訓醒既時候已經係下晏十二點幾鬧鐘一早比我禁熄左所以無響,係我久違既自然醒。
刷完牙洗完面拎部手機睇睇,竟然有兩個對話五十幾個message,訓醒之後我都唔記得文老師搞左個班會活動添。
第一個對話當然係班群,第二個對話係阿東send黎。
我決定睇左阿東個message先:
阿東:難得畢業之後既班會活動,參加下啦,我就話黎唔到啫。😔😔✔✔
阿東:妳睇下愈黎愈多人話去啦,遲多啲想見都唔會禁齊人架啦!!!😫😫✔✔
阿東:去啦去啦,起身記住即刻覆我啦!😝😝✔✔
感覺想阿東好想我出席依次班會活動。
阿東依邊我唔覆住,再睇下班群嗰邊先。
由得阿婷一個話去慢慢變到差唔多全班都覆話去,但係中間除左話去同唔去之外就無其他野講。
唔通全班都覺得依次唔見可能遲啲就無機會咁齊人?
我亦都回覆班群話去,計埋我出席既應該有二十幾人,佔左成班三份二。
我亦都回覆返阿東:我去啦。
我開始期待住一日既來臨,大家變成點啦?大家既煩惱係咩呢?
如常返多一個星期學就放聖誕假,班會活動亦好快到左。
我約左阿婷一齊搭車去燒烤場,畢左業之後間唔中都會約阿婷出黎飲下野,所以佢既近況我都知道。
「好耐無見過佢地啦,唔知有無變到啦。」阿婷講
「個樣就肯定無變,但諗既野應該會變。」我講
「咪鬼講到咁深奧啦,開心啲啦,,有無掛住阿東呀?」阿婷陰陰嘴笑
「無呀,無人掛住佢呀。」我嬲嬲地講
「好似有對情侶耍花槍呀~」阿婷講
我打左佢一下就無出聲。
我地到左之後見到大部份人都到左。
「阿婷,阿欣!!!」阿宜一見到我地就衝過黎攬住我地兩個
「唔好攬咁實啦,我透唔到氣呀!!!」阿婷好辛苦咁講
依家諗番起先覺得阿宜同我大學個阿兒有啲遲,兩個都好健談。
我地去左女同學個堆到坐低,男同學兩,三堆,女同學就得一堆。
「點呀妳兩個,讀書讀成點呀?」阿宜問我地
「hea下又一日hea下又一日囉。」阿婷講
「都幾大壓力呀,讀得有啲辛苦。」我講
唔經唔覺我地傾左十五分鐘左右。
我地講講下就比班男同學插嘴:
「知唔知點解我地今次班會活動可以咁齊人?」阿蔥講
我一面黑人問號,而其他同學就好似知道哂咁。
依個時候係燒烤場入口我見到文老師同一個人行緊過黎。
你地睇下主角黎啦~~ wow~~~wow~
成班男同學係到歡呼。
依個人影有啲熟口面,我心諗。
----------------------------------------------------------------------------------------------------------------------
阿東角度:
訓黎訓去都訓唔著,時間已經係凌晨兩點半,對番香港既時間係朝早九點半。
班群除左阿婷話去之外就無其他人覆過啦。其實我真係唔明白,點解其他人一畢左業就好似唔想再理中學既事咁。
反正都訓唔着,我決定一個個whatsapp佢地,內容大概為希望佢地可以出席依次班會活動。
我一個一個人咁send,而阿結同阿靜咁岩起身見到就幫我手send比其他同學。
依刻除左感動之外我都諗唔到啲咩,其實大家都想見大家一面,只係唔敢行出依一步或者開口。
當我地send完分配好既同學之後我就去左訓覺,我由本來唔眼訓都變左好攰。
希望聽日起身我既whatsapp有二十個回覆啦。
今日我自然醒,唔知係唔係太着緊班會活動呢?
打開手機,有六個對話總共有三十幾個訊息。
其中五個係幾位同學真係有緊要事黎唔到,而我好開心,除左個五位之外,我地尋日有whatsapp通知既都肯出席。
文老師確定左時間同地點之後再通知我地。
而我亦都有一樣緊要事要同文老師講。
聖誕節好快就到,我同Alice同family講左聲之後就踏上左自己一個返香港既計劃。
除左幾個同學同文老師之外無人知道,連阿彤我都無,我諗依次突然其來既回歸,佢地一定估到估唔到。
----------------------------------------------------------------------------------------------------------------------
阿東x阿彤:
我唔相信自己既眼睛,文老師隔離既係阿東!!!
「hello,大家好耐無見啦。」阿東對住我地成班同學講
識唔識到鬼妹呀? 慣唔慣個邊啲生活呀? 多唔多香港人讀書?
好多同學都爭住問阿東野,而我就企左係一邊,因為到依刻我都唔敢相信企係我地面前既真係阿東。
阿東係人群到慢慢行黎我依邊,佢每行一步我就愈想喊。
「對唔住,返黎都唔提早通知你,因為我想比個驚喜妳地。」阿東講
終於阿東開口講完依句我忍唔住攬住佢喊左出黎。
「你個衰人,下次再咁神秘我就嬲死你。」我用把沙哂既聲講
「係啦係啦,唔好喊啦,成班望住妳啦。」阿東尷尬咁講
周圍既同學有啲係到偷笑,有啲就感動。
其他同學同我講番原來係阿東一個一個咁whatsapp叫佢地黎。
我都估唔到阿東會做依啲野。
依一晚大家都講下自己既煩惱,我地聽完就比下意見。
聽完之後我覺得大家都比社會迫住去成長,面對自己既問題。
已經無得好似以前咁無憂無慮。
燒完雞翼之後,大家都準備各自反返屋企,臨散前阿東講左句:
「希望下次再聚,可以再見齊你地啦。」
有啲同學比左個ok手勢,班男同學就大大聲話ok,女仔就笑笑就算。
時候都唔早,阿東亦都決定送我返屋企。
成程車我地無停過咁講野:
「喂,你個金髮靚女呢?做左朋友定第三者呀?」阿彤嚴肅咁問我
「我地真係好朋友黎架,我有親口問過佢,佢都當我係朋友。」我講
「好啦,就信你一次。」阿彤無再追問落去
返到去阿彤樓下,佢好唔捨得我走咁。
「快啲返去啦,我好攰呀,岩岩返到黎香港就趕過黎,聽日再搵妳啦。」我講
「咁你過黎送個kiss比我啦。」阿彤講
我諗都無諗行埋去kiss左個一啖。
「byebye聽日見。」阿彤滿足咁講
我亦都同佢講左再見,之後我帶著攰到死既身體返屋企。
我覺得阿東真係變左好多,大膽左?有主見左?
同佢岩岩追我個時已經唔同哂,不過我都好鐘意依家既佢。
諗到依到我攰得濟就訓着左。
----------------------------------------------------------------------------------------------------------------------
三年後~~~~
一個男仔係行李帶到拎完行李慢慢行出去候機大堂。
原來已經有三年無返過黎啦,男仔望下自己部手機月歷。
男仔出左大堂,周圍咁望,但始終搵唔到佢想搵既野。
依個時候有人係佢背脊攬住左佢。
男仔擰轉頭講左句:好耐無見啦,多謝妳肯等我咁耐。
攬住佢既女仔亦都眼濕濕咁望住男仔講:歡迎返到黎。
當年我曾經追到一個女神,但我竟然飛左佢,真真正正完結。