當年我曾經追到一位女神,但我竟然飛左佢。: 第五十二節:閒情

畢業禮完左之後,就踏入左四個月左右既空檔期。好多畢業生都會係依段時間搵下part time消磨下時間同賺下錢。等七月放榜再去補唔同既課程,有啲就一齊去左畢業旅行。

不過我地中學生涯其實仲未完,仲有最後一件事,亦係唯一一次既謝師宴。

話就話係謝師,但其際上應該係咁多位同學既主場,男既就個個着哂西裝,gel下個頭,打個煲呔。女既就有咁令着到咁令。

所以我就搵左日,約阿彤出黎陪我整番套西裝,我亦都陪佢簡番套晚裝。

「好耐無試過咁輕輕鬆鬆唔洗煩啦,要考既都考哂,依家仲畢埋業。」阿彤講





「係呀,上年仲做緊卷補緊課,搞到個人散哂,今年考完DSE終於有得抖下。」我講

「謝師宴完左之後我諗完搵份part time做下.反正要等到七月先放榜。」阿彤講

「妳諗住搵咩做呀?」我問

「應該做住便利店或者超市收銀先,橫掂都係part time做唔耐,求其搵啲野做住先。係喎,咁你呢?無聽你提起過既。」阿彤問我

「唔..............我都唔知喎,唔好講依啲住啦,其實我唔係好記得個間鋪點去。」我轉開話題





「你個路痴.....好彩我之前都去過,跟住我啦。」阿彤拖住我一齊行

一路上阿彤行前面我行後面,望住阿彤既背影,唔知仲有幾耐時間可以同阿彤相處。

去到買西裝個間鋪頭,我決定訂做一套岩身既西裝,方便第時有咩大日子都可以着到。

揀完顏色又揀布料再揀花紋,阿彤亦都係隔離幫下眼,度埋身仲有好多步驟,整左差唔多半個鐘再多啲終於搞掂,留低埋電話到時候就可以返黎拎。

「整一套野仲耐過我地女仔揀衫,你話你係唔係麻煩阿。」阿彤講笑咁講





「係既對唔住阿彤大人,最多我陪妳揀衫揀到滿意為止啦,原諒我啦!」我亦都陪合番阿彤

「算你啦,難得出到黎就周圍睇下啦,我口光好高,唔行番十幾廿間我唔滿意架。」阿彤講

我地兩個打情罵俏咁周圍揀下衫,情侶之間一定要咁樣先至有情趣。

行左五,六間左右阿彤就已經揀到套黑色連身裙,我睇過阿彤試着文青得黎又得體,簡直絕配。

買完哂野我地就去左食晚飯,我地由下晝買到依家,我都行到有啲累。

求求其其搵左間餐廳坐下食完晚餐就搭上歸家既路途。

「好在我地無見咁耐仲keep到感情,我幾驚變到die air。」阿彤講

「點會呢,就算我地分隔兩地,我地既心都係會連埋一齊。」我講





「我地又無至於分隔兩地,最多分隔兩條街口姐。」阿彤笑住講

「無見妳咁耐,妳笑起上黎都係咁好睇。」我望住阿彤兩粒小酒窩

「我覺得你變左喎,變到咁識哄女仔,係唔係出面識左第二個變到咁呀?」阿彤懶係認真咁問我

「點敢識第二個呀,同埋我覺得有妳就好足夠架啦,檸檬豬。」我講

「口花花!」阿彤細細聲講塊面仲紅哂。

咁耐無見我都照舊送阿彤番屋企,珍惜可以見到佢既時間。

「做咩個人靜哂呀,明明頭先搭火車仲好多野講架喎。」阿彤問我





「無呀,有啲累姐,話哂我地今日既行程有九成都係行。」我講

「真係咁簡單?」阿彤質疑我

「我有咩可以握到妳呀彤姐,快啲返上去啦,唔係妳阿媽就話我帶妳去夜街唔知做咩架啦!!」我推一推阿彤

「好啦,咁遲啲再見啦。」阿彤送左個good bye kiss 比我就上番去

如果可以,我都想對住妳耐啲,我望住阿彤背影心諗。