當年我曾經追到一位女神,但我竟然飛左佢。: 第三十五節:夜行

同學食完飯就係射箭場出面集合,不得不說依到夜晚都幾恐怖。

文老師一早就幫我地分開哂組別,而我,阿彤,阿結,阿靜同阿婷分別係唔同既地方帶領其他同學。

排除左我地五個,差唔多每組都有兩個女同學,分得非常平均,文老師咁樣分應該係想測試下每組既男同學會唔會照顧女同學。

我地五個一早已經計劃好路線,第一組既同學帶好哂眼罩就跟住我出發。

其他組就等前面嗰組出發後既五分鐘再出發。



我地所計劃既路線係上山,行到燒烤場對出,再沿路行到籃球場,兜返去射箭場。

我帶住六位同學由射箭場往上行,一路上由最前既同學搭實我膊頭,佢地既隊形係兩位男同學行最前,中間兩位女同學,最後兩位男同學。

當要上樓梯既時候我無提佢地,當第一位男同學feel到要上樓梯佢就大聲同後面既五位隊員講小心啲,睇得出第一位男同學比較細心。

燒烤場出面既路比較難行,我放慢步伐,中途有位女同學唔小心差啲仆親,隊伍最後既男同學都好細心咁問佢有無事,洗唔洗停一停休息下。

女同學答唔洗我就繼續向前行,沿路上除左落樓梯都無其他特別,我地好快就兜到返終點亦都係起點。



我見佢地好開心咁除低眼罩,有幾位男同學都讚隊伍最前既男同學帶得好好,而有啲男同學就關心下頭先位女同學有無受傷。

而女同學就不斷多謝男同學既照應同包容,唔介意佢地行得慢同唔小心。

我見到依個場面都幾感動,大家都由以前既不理不采變到依家互相讚好同關心,打破左一直存在既隔膜。

其他組都陸陸續續咁番齊黎,文老師亦跟係最後個隊最尾一齊返到黎。

文老師見大家番齊黎就講左幾句:



「短短既路程我見到既係男同學既細心,無論係上樓梯定落樓梯仲有行啲難行既路,最重要既係對女同學既照顧。」

「我希望你地每位都記住頭先既一幕幕,話比自己聽有時只係大家唔肯去溝通,只要打破左隔膜大家都可以變到細心同融洽。」

文老師講完就放大家返房休息,有人即刻去沖涼,有人就行左其他人既房吹水。

由於我做完運動出左身汗,所以我都即刻去沖番個涼,洗左陣汗味。

而阿蔥,阿風同阿河同我一樣,阿結就留左係間房到玩下手機休息下。

阿結等我地四個沖完再去沖涼。

當大家都沖完涼番到房,阿風主動叫我地坐埋一齊傾下閒計。

傾計既途中我發現佢地三個都變得比較主動,肯同我同阿結分享下自己啲野。



而當佢地問到我點樣溝到阿彤依位女神既時候,我都笑笑口咁答佢地。

依一晚就係咁歡樂咁完左。