外星人騙局: 第四章：信仰的建立

我手持書本朗讀，面前的白文信緊閉雙目不知他是否在聆聽，停下來不再朗讀。
白文信：「讀得幾好繼續啦！」
我抛下書本問：「已經讀咗幾日仲唔滿意？」
如老僧入定的白文信慢慢張開眼：「你讀得流暢咗好多，語調方面多啲變化要有感情，但係唔好太誇張，唔要小學生朗誦嗰種。再練習多啲打穩根基，跟住其他練習會輕鬆好多。你要明白傳播自己嘅想法最直接就係講俾人知，即使有好嘅內容同精心鋪排，但無好嘅演繹係唔能夠留住受眾，聽完你要講嘅嘢。好多成功政治領袖都係好有演說能力，例如希特拉。」
我一臉疑惑問：「乜我哋唔係搞宗教組織咩？」
他微微一笑道：「宗教同政治都係一種信仰，其實分別唔大。」
當時我對他的說話似懂與不懂之間，不是完全明白， 低頭思考。
他繼續道：「朗讀就練埋今日，聽日就試下睇熟篇文章， 唔好睇本書用自己嘅說話講出嚟，之後係對談練習。」
我經過兩星期特訓，未至於能言善道，跟已往有很大分別。今天不再留在小屋，與白文信跟地產代理參觀工廠大廈單位， 要選擇一個適合開設網台的地方， 很快就選定了，即日辦妥手續租了單位。
兩人用拉尺量度，考量傢俬及設備的安放位置。




白文信道：「嗰邊放器材，嗰邊放張長枱好似莫探員嗰邊網台。我哋地方大過佢哋，可以容納更多人參與現場節目，遲啲每個星期日都要做現場版。」
我瞪大眼道：「逢星期日做現場版，未有網台做過喎！」
白文信對着我皺眉道：「唔洗緊張遲啲先做。其實有好多宗教團體逢星期日聚會都有網上直播有乜出奇？做呢啲一定要集中在星期六、日，一來放假多人嚟，二來每個星期六、日都搞，部份熱充者參加埋節目之後嘅活動，工餘時間被我哋霸佔，將佢哋生活圈收窄…」
白文信見我聽不懂顯得有點不耐煩說話一轉：「其他詳細操作遲啲教你，總之要製造一班堅定嘅核心信徙。」
我心中一直有一些疑問：「邊個位安設神壇？我哋拜乜嘢神？」
「唔拜神。」
我驚奇問：「我哋唔係搞宗教組織咩？點何以無敬拜對像？」
他思考了一會：「我諗唔到點樣簡單解釋，其實我哋係用理性科學包裝迷信偏見。總之你照我指示做，做落你就會明白。你趁單位裝修呢段時間，睇熟頭幾集節目啲稿，個節目名都諗好叫真實知識頻道。」
寂寂無聞的開了台，將節目上載到YouTube 已經播放了三集節目，可惜反應一般，兩人相對而坐商討對策。
我問：「你係咪諗得個計劃太完美。」




白文信道：「計劃大方向無錯，節目質素亦無問題，只係推廣不足。同類節目都網上都有唔少，即使我哋比佢哋優勝都好難即時引起注意。」
「其他網台節目好多源化，政治、武術、旅遊…」
白文信打斷我的說話：「我哋定位係神秘學，搞網台唔係目的，要聚集一班相信有外星人嘅信徙。」
「咁依家應該點做？」
白文信低頭想了一會，問了一個使我感到意外的問題：「好耐無見過 Miko ，佢依家同你乜嘢關係？」
我想了一回：「炮友。」
「哦！」白文信：「即係未分手。我哋需要一個多兵嘅觀音。」
真實知識頻道第四集錄製現場。
「哈！哈！」Miko的嬌笑音響遍了整個現場：「唔好意思又NG。」
負責在鏡頭後錄影的白文信微笑道：「唔緊！我哋之後剪走就得，繼續啦！」




終於明白Miko在那邊網台受歡迎，但從來不讓她開咪說話的原因，一個沒有內涵的人要証明自己有內涵，總會在不懂的話題裡加把話，再加上Miko 是一個嘴巴快於腦袋，往往說出一些自己說完也覺不對的話。其實她要做的事，就是出現在鏡前陪笑。
「阿漢！劉漢傳！」白文信見我想得入神：「繼續節目。」
節目斷斷續續之中進行至入夜才完成，我在送Miko 回家的車途上，身旁的她不停使用手機上網。其後知到她將與節目背景板合照的相片上載到多種社交媒體，四處宣揚自己做節目嘉賓，在她的兵團之中引來一陣小騷動。她在車途上忙碌回覆一些上等兵的留言，節目未播出已引起談論。
白文信說得沒錯，要利用身邊可用的一切，包括這個喜歡四處收兵的名義上女朋友。
節目播出後真實知識頻道的Facebook群組成員增加不少，達到了預期目標，引起一定程度的注意。
白文信將小屋中的各類藏書搬移到網台，供日後到來聚會的成員翻閱。
兩人正在將書本放上書架。
我道：「呢道俾你搞到愈來愈有學術氣氛，不過我哋只係老千。」
白文信道：「老千身份好失禮咩？敢想、敢吹、有學識，得閒睇多本書，你識人哋唔識先呃到人。」
「我唔係呢個意思，老千目的係呃錢，但係到依家搞咁多嘢都未有收入，錢就用咗唔少。」
「你要有信心，宗教係世界上最搵錢嘅生意，但係我哋資金有限，所以個計劃要加快步伐。你條女令節目引起一定程度嘅注意， 但係唔可以長期放佢喺節目裡面，會拉低節目質素。」
我放下書本拍手叫好：「同佢做咗兩集節目，愈來愈有殺佢嘅衝動。」
「即使殺咗佢，個節目都未必能夠好過其他網台同類節目。」
「咁我哋仲可以點樣做好啲個節目。」
白文信透出絲絲奸笑：「做好自己提升節目質素，呢個方法太正路喇！無聽開呢類節目嘅人，要佢哋成為聽眾係好難。搞跨同類節目將佢哋嘅人同埋聽眾拉過嚟。」




我苦笑問：「搞個網台啫！唔洗咁有心計？」
白文信認真道：「小手段嚟啫！你個嗰仆街朋友仲有無聯絡？」
我眼珠一轉想不到：「我識得好多仆街你講邊個？」
「最鍾搬弄是非篤人背脊嗰個。」
這樣形容就想到：「哦！Andrew Chan ，我唔想搵呢條仆街。」
白文信想了一會：「你唔搵佢都啱， 你做門面嘅雙手要白，俾佢個電話碼嚟，我去搵佢。
我問：「你搵乍做乜呀？」
白文信陰惻惻笑道：「要做仆街嘢，梗係去搵仆街。」
兩星期後，獨坐在網台辦公桌前面對電腦屏幕，食指推動滑鼠中間的輪，拉動Facebook頁面。
一句又一句的奇怪惡毒留言，看得驚訝亦感到哭笑不得。莫探員的網台不知從可時起發生內部爭拗，原因不清楚。從網上留言看出由不同節目主持對罵掀起，到各自的支持者爆發大規模罵戰。
罵戰內容多不星數：「因溝不遂」、「借錢唔還」、「人哋個仔賴屎」兩歲半小孩賴屎很平常，與家教有什麼關係？
我想不到一個人數眾多的組織社群，在短時間內原因不明下四分五裂。
傳來大門開啟聲，為可白文信這麼晚回來，不是待在那山中小屋？進來除了白文信隨後十數人，其中兩人是梅林及辟邪，其他人有點面熟，最觸動我神經是走在尾後那人Andrew Chan。網台成立之初應協議那些是不受歡迎人任。
走在最後的Andrew Chan一看見我立即面帶笑容驃前，差點來不及起身相迎。
Andrew Chan笑道：「好耐無見你。」




我冷冷回應：「你有睇我節目咪見到我。」
白文信帶着各人前來逐一介紹，他們都是來自莫探員那邊網台不同節目的主持，離開了之前的網台，想來這邊繼續節目，當然包括Andrew Chan 論政節目，白文信亦已應允。他們到來是商談節目時間的安排。
還未開始商談，帶着眾人參觀各項設備，其間察覺有兩人在耳語亦不時望向我，之後另一人加入。
我語調平和向那三人問：「係咪有乜嘢唔明白想問？」
最初耳語兩人不說話搖頭表示沒有問題想問，而後加入那位就性格獨特。
他上前不客氣問我：「你係咪Miko男朋友，之前睇相同埋短片見你參加支持政府嘅集會喎 。」
這群人全都是反政府陣營的支持者，被他這樣一問不知從何辯解啞口無言。
Andrew Chan搶着幫我回答：「其實嗰次傳哥同文信原來係有心混入去對方集會，想偷拍收錢示威派錢的過程，不過佢哋個帶隊好小心影唔到，好可惜！」
問我那個人表現得有點驚嘆，而之前耳語兩人一臉半信半疑互望了一眼，其餘多數人都似乎相信。
當正式坐下議定節目安排及新節目的內容，白文信與我表示不干涉編輯自主避席不參與商議節目內容，只囑託保留星期日時段，給真實知識頻道， 其餘時段安排自行協商。
白文信與我離開工廠大廈。
我問：「不如我哋去茶餐廳嘆杯茶好嗎？」
白文信：「夜喇！我要返去。」
「又咁夜上山！其實你依家都唔洗住喺山，今晚喺網台過夜。」
「你唔明嘅嗰道我一定要返去。」




「點解！」
「唔…你都見過我間屋起得幾有心機，霸多一個地方唔好咩！又唔洗俾錢。」
「咁隨你喜歡就好啦！」我問：「嗰邊網台鬧交鬧到散，應該係Andrew Chan條友搞出嚟。你點叫到佢做嘢？」
「俾錢囉！」
我瞪大眼向着他道：「你塞錢俾佢，直接叫佢搞事，太過直接如果佢當時唔收，之後唱出去。我同你都好難喺網台界立足。」
白文信輕笑聲道：「梗係無咁直接啦！俾筆錢叫佢做啲小學生都做到嘅資料搜集，再暗示俾佢知要做啲乜嘢。條友話頭醒尾行動詭秘。你候先都見到佢有幾醒目，真係人才！」
「我總覺得留呢條賤人喺身邊，就係包藏禍心遲早出事。」
顯得自信樂觀的白文信繼續笑道：「樓上有本書個名叫如何與賤人相處，得閒搵嚟睇下。」
我打趣笑罵：「睇少本無為書啦！寫嗰班人都係為咗搵食嘅老千。睇得多會壞腦㗎！」
某天，網台。
「開普勒行星位於天秤座，生存環境同地球相似，適合地球人類居住，仲要冇環境污染。開普勒星球的居民稱為卡普人，外貌有啲似蜥蜴，佢哋嘅智商同地球人差唔多， 但係文明出現比地球人早。地球好多古代文明都有記載卡普人到訪地球。佢哋去過古代嘅中國，對中國道德教化，係將道德標準定到好高，不停講，背熟佢，寫出嚟，掛起佢，但係做唔到！非常反感，所以決定終止與地球人接觸，將地球定為觀察星球類別。咁樣做好易理解，即係嗰條友衰格、口臭、食白粉咁老土。你都會避開佢唔同佢做朋友啦！各位，我今日喺到要講一個重大秘密俾大家知。我見過卡普人，我真係見過！我仲同佢傾過計。」我講到這裡全場嘩然，出乎意料之外，初時預計會𨳒聲四起。坐在我兩旁的辟邪與梅林同時轉身睜大眼看着我。我沒有理會繼續未完的講話：「嗰個卡普人係有任務在身，佢哋政府會定期派員落嚟地球觀察，撰寫報告。卡普人一直希望地球人會有所改善，但係地球人不斷沉淪，將會自我滅亡。卡普人心信唔係所有地球人都死有餘辜，會喺地球毀滅之前帶走部份地球人去開普勒行星，要成為被揀選者必須要；誠實、和平、善良、講理、忍讓、會反躬自責。」
台下其中一位現場觀眾：「反躬自責！咁鍾意諉過於人嘅丁蟹一定無份。」
引得哄堂大笑。
另一人亦喊話：「大陸人冇份就真！野蠻！好鬥！」
我雖然很認同，但心存厚度含笑不回應。




梅林笑道：「大家聽得太投入，唔記得現場版節目觀眾唔好發聲，如果有意見節目完結之後分享會，大家可以分享見解。」
分享會使我感到意外， 竟然有人相信我曾經與外星人會談， 大部份觀眾都只當是故事一則加插在節目之中。
望向站在牆邊的白文信，心想：「你寫得出好巴閉咩？我夠膽講先置厲害！」
分享會完結各人離開，只剩下白文信與我。
白文信笑道：「恭喜你成為開普勒行星移民局駐香港代表，決定乜嘢人得到救贖。」
「講到咁大，得嗰一兩個人信咋！」
「我會聯絡嗰兩條友，信徒貴精不貴多，最重要信念堅定，但係都要有一定人數做行動。遲啲做個特輯連續幾集講詳細啲，招攬多啲人。」
「咩嘢行動？」
「你照我意思做得喇！遲啲會講你知。」
「咁耐都未開始呃錢。呢到運作應該要用唔少錢，仲有其他節目主持車馬費，啲錢用剩幾多呀？不如叫聽眾捐錢？」
「損錢！你諗都唔好諗，今次唔可以叫人捐錢。照計劃按步就班大事可成。」
「我怕遇到突發事情，計劃會有阻滯到時本錢都蝕埋，預多一手棋好喎！」
「唉！」白文信長嘆一聲道：「你太多顧慮。」
果然，七天後發生了一件突發事件。這件大事影響社會直至今天，亦阻礙了白文信的大計。
2014年9月28日
我們在第一輪催淚彈過後到達港鐵金鐘站，沿海富中心旁邊的添馬街走進干諾道中，人群擠滿干諾道中及夏愨道。
網台的主持及忠實聽眾，一起聚在干諾道中近政府總部旁的位置引頸望向添美道口，那是衝突最前線。
那時相距第一輪發放催淚彈已有一段時間，緊張的氣氛稍緩。
我們開始分別談論情況，預測警方動況。
Andrew Chan 問：「信哥喺邊呀？你哋見唔見佢？」
眾人望向我，我吱唔道：「聯絡唔到， 可能喺現場其他位置。」
其實之前與白文信通過 Whatsapp 問會不會來，他沒有身份証，是不會來被警方拘捕。
突然爆破聲響起，白色煙霧來襲，第二輪催激彈發射，人群四散。
我們向中環方向走避上行車天橋，察覺身旁有人向反方向走去前線，那人是辟邪。
我恐怕她會有危險，跟隨其後。
催淚煙的味有點像酸醋，但轉瞬之間就分不到味道。
辟邪想拾起地上正在冒煙的催淚彈企圖扔回警方，但不敵催淚煙站在原地又不肯後退。
我上前捉住她的手拉她離開現場，到達海富中心背後的巴士站。這時兩人淚流滿面， 不知可人幫我兩清洗，稍為好了一點聯絡上 Anbrew Chan ，他帶領眾人退至中環，其後得知中環大會堂乎近亦發射催淚彈。
他們再向西環方向退，差不多整夜遊走於金鐘道，停留力寶中心外，近黎明前從軍器廠街返回干諾道中。
辟邪與我整晚留在干諾道中，與防暴警察對峙，期間進進退退，催淚彈爆發即散開，當催淚煙消去再上前包圍防暴隊。
辟邪即使面對被槍指嚇亦不懼怕， 想不到平常沉默寡言的她在面對威嚇有不屈的勇氣。
凌晨三時防暴警察停止行動，展開了八十一日的佔領。
佔領期間佔領者設立了很多營帳，亦有不同組織設立帳幕，之中大多數是政治組織。
我們在干諾道近中環方向的馬路上，設立了營帳。那位置遠離太台，並不顯眼。
佔領的日子裡除了發生幾次大衝擊及零星的反佔領人仕來挑釁，其餘日子比較平靜。
佔領區通常最多人流的時段是晚上，人們放了工就來支持佔領者聽大台發言或排隊取紀念品、睇貼在牆上的畫，還有人在現場表演音樂。
時間久了漸漸有一種感覺，他們是來參加嘉年華會。
Miko也是嘉年華會的參加者，在佔領區遊覽了一圈，回來營帳前坐下，不久就向我投訴有蚊咬。
我遞給她蚊怕水：「呢度夜晚係多啲蚊， 噴啲蚊怕水。」
她接過在樽口嗅了一嗅便道！「好臭呀！唔要。」
為她排隊領取紀念品的觀音兵回來給她送上紀念品。
她站起身道：「夜啦！我走先。」
她在佔領早期到訪次數較多，但後期可能對事情失去興趣，少來探望我們。」
早期有四人輪流留守，後期只剩下辟邪與我留守。
由佔領早期開始Andrew Chan在營帳前，執起咪發表他的政治演說，一向住持政治節目他說得頭頭是道。
雖然不及大台多聽眾，亦吸引不少人停步駐足。
某天晚上Miko 如常到訪， 對辟邪的態度很不友善，說話似帶有敵意。
辟邪借故避開。
我心想Miko 怎會知道辟邪與我的關係，不其然望向正在發表演說的 Andrew Chan，以他性格是最有可能的告密者， 但現在當紅的他應該沒暇理會。Miko身邊的觀音兵及狗公何其多，他們是最有動機。也許是女人的直覺。
知到了反而更好，無論怎樣都應該向Miko說清楚，用WhatsApp傳送了四個字「我哋分手」，只簡單回了一個字「好」。
簡單的關係，簡單的結束。
有一晚Andrew Chan在真實知識頻的旗幟下，繼續發表政治演說。
我站在聽眾群之間， 突然感到一個熱識的身影站在旁邊， 轉頭看見是白文信。
白文信問：「呢道人多，搵過地方傾好嗎？」
離開人群沿干諾道中向中環行走，到達人少的大會堂旁。
白文信問：「你有幾耐無做節目？」
我想一想道：「斷斷續續無做五集。」
「五集即係有五個星期無做節目，忘記咗個宗教大計？」
我長嘆一聲道：「依家咩神秘事件呀！外星人呀！無人想聽。喺呢個政治風潮裡面，所有人關心係時局發展。」
白文信冷笑道：「關心發展？其實心存幻想，覺得將來有希望。」
「你認為我哋會失敗？香港政府唔會讓步？」
白文信反問：「香港有政府咩？一向都係由大陸管。你要明白大陸人嘅心思，『唔係你可以要啲乜嘢，係你唔可以向我要！』呢啲就係大陸人嘅管理，我管你！」
白文信說穿了現實，現實並不隱秘只是不想面對忽略了。
他繼續道：「我開始明白點解會憎Andrew Chan。我哋搭咗個台出嚟俾佢上位，依家有新聽眾以為個網台係佢。」
「眾人心思，就是社會潮流。佢乘住個潮流上都無辦法阻止。」
白文信語氣堅定道：「計劃一定要進行，唔可以放棄。」
「唔明你點解對呢個外星人騙局咁執迷，呢條穚唔得咪諗過另一條穚。我老實同你講，咩外星人教派都唔係驚世新穚，飛碟教嗎！成日自稱老千，你望嗰邊政府總部，睇清楚前面啲商業大廈，裡面嗰班就係真正老千。你只係有小聰明嘅古蠱惑仔。」
我說完了自覺後悔，過份坦白的話是傷害別人。
他沉默了一回，轉身離開，暗然道：「你唔會明白， 時間無多，我唔會放棄計劃。」