外星人騙局: 第三章：反對反政府

白文信將一疊抄票塞進透明的籌款箱，不同面值的紙幣散落膠箱的底部。
我問：「點解自己入錢落捐款箱？」
白文信答：「籌款箱係空啲人就唔入錢，啲人見到個箱有錢即係有人捐就放心捐，多人捐就愈多人跟住入錢，正所為人捐佢又捐，好羊群心態嘅！」
白文信將籌款箱從枱後的地上搬上枱面，兩人站在軒尼詩道一旁，化了一臉𤠣子妝，加上一身厚厚皮毛衣的𤠣子服裝。
背後高掛的橫額大字標題寫着「救救小馬騮」下方的小字「石梨貝水塘馬騮關注組」。
我手執傳單扇風：「好熱！好熱！」
白文信道：「係你話驚被人認出要化裝。」
我問：「你唔怕被人認出，咁你又扮馬騮？」
「初時我都冇諗住扮馬騮，不過諗真依家七一遊行都變咗嘉年華會，裝扮有趣會吸引多啲人影相合照，有助增加收入。」
「遊行隊伍仲未到，仲要等幾耐？」




「哪！一講就到。」
一群人浩浩蕩蕩而來，如白文信所言不停有人來合照，感覺自己真是在嘉年華會工作。
一個架着太陽眼，穿着熱褲及短袖衫的少女，在我手上接過一張傳單看了一會停下腳步回來問：「你哋個組織註咗冊未呀？」
她這一問醒覺自己在街頭行騙，不是在嘉年華會扮馬騮與遊人合照。
也許是心虛不知所措：「註冊…冇…有…。」
白文信見狀立即前來替我解答：「我哋組織在成立階段，一切都在進行之中。」
少女喜道：「呀！我無估錯。我好鐘意啲馬騮仔，一直都有留意開都未聽過你哋嘅組織。好想加入你哋組織，有乜嘢幫到你哋？」
白文信打趣笑道：「唔係幫我哋，係幫班馬騮仔， 組織依家喺起步階段，好多嘢都未定。我同你做個簡單登記，有需要第一時間搵你幫忙。」
白文信帶着少女去枱那邊，抄下資料。
少女接着道：「我喺新聞睇到有人對啲馬騮好殘忍…。」




白文信點頭認真道：「我哋都好睇唔過眼。」
不久，遊行隊伍人數變得疏落。Andrew Chan 那伙人經過，心中一驚立即轉身低頭閃避以免被認出，一轉身面前站了一個人，是辟邪。
她一臉疑惑的看着我，驚愕之中對她點頭，她點頭回應接過我手中傳單後轉身離開。
我對白文信說：「我候先見到辟邪，佢可能認得我。」
「佢見過你一次，連半句說話都未同你講過點會認得你？認得又如何？」白文信壓低聲音對我說：「我哋真事假做，當自己真係開辦關注組織，之後有人追問咪話有解決唔到嘅技述問題放棄唔搞，籌返嚟嘅錢遲啲捐少部份去慈善機構，話全部錢捐晒。咁嘅街頭籌錢無數得計，根本無嘢好驚。」
「你一早諗好又唔早啲同我講，等我個心定啲嗎！」
白文信低聲道：「我想睇下你有無膽偷呃拐騙，第一次行騙係有啲驚，做多幾次就慣。」
「始終利用人對動物同情心呃錢，又喺社會運動裡面搵着數，有啲對唔住社會。」
白文信生氣道：「你最對唔住嘅係我同埋你自己，婆婆媽媽，決定咗就做。做做下又話唔好。抱住個籌款箱去勸人捐錢，遊行隊伍過咗就嘥心機白做。」
某天，立法會大樓外廣場。




領隊的人將紅色 Polo 裇及紅色鴨舌帽分派給各人穿帶。
「不如我哋走啦！呢啲錢唔好賺。」
白文信：「呢啲錢好好賺，行行企企大聲叫兩句，幾個鐘就收得工。」
「我唔係呢個意思。當初，你無同我講係嚟示威。」
「你又唔係未去過示威，今次示威有錢收。」
「以往我企對面。」
「企喺邊一邊，都係嗌完就散，唔通賴死唔走咩！睬你都傻。」
在白文信再三吹促下，穿上 Polo 裇及帶上帽，心想幾個鐘很快就過去。
領隊將一個個印了不同字句的紙牌，分發給各人高舉，接過紙牌看看上面印了什麼字「反對反政府」。這是什麼中文？有點不好意思高舉此牌，即是告知所有人我不識字。
一隊軍裝警員在前方鐵欄外走過，我望向身旁的白文信。
我側身靠近他低聲問：「你無身份証，呢到咁多差人你唔驚咩？」
「屌！你望下嗰邊，佢哋都無喇！」
我循那方望去，一群剛從旅遊巴士下車的大媽。她們穿着與我一樣的紅色 Polo 裇，即使相距甚遠，那吵耳的話聲不知褔建話還是潮州話，震動耳膜。究竟她們自己的耳膜是如何構造？
我答：「佢哋起碼有本雙程証，可以自稱嚟旅遊購物。你乜証都無！」
「屌！差人要查都查對面班人，點會查自己友。那！嗰邊又開始嘈鬧，等睇嘢。」




我方鐵欄盡頭那群職業罵戰王又開工，隔着鐵欄向對方叫罵。我引頸遠望，看見父親劉德威，與那群職業罵戰王一起叫罵。
我心想：「阿爸！你是職業罵戰王？還是無錢收也來叫罵的愚昧老伯。我估多數是後者，因為他實在是一個愚昧老伯，香港有這類人一定無運行。」
想不到與父親站在同一陣線，感到有點羞愧，將鴨舌帽拉低一點，退後兩步不要讓他看見，不敢相認。希望時間過得快一點，集會完結收人工。
後退那時碰到另一人，當轉身道歉見到是一個南亞裔男子，與我一樣穿上了那件紅色 Polo 裇，不禁看看印在衫上的字「福建水頭同鄉會」，再低頭看看自己衫上同樣的字。
事情那有這樣謊謬，忍不住再次回頭看，兩人目光相接有點尷尬。
我不禁開口問他：「你都係福建人？」
他爽快回答：「當然係喇！只係近排曬黑咗少少。」
我呆住了沒有反應，事情最謊之處，是叫他來示威的人不覺得謊謬？而身邊其他參與者的表現亦若無其事。
他見我呆看的神態，再加上一句：「搵食啫！」
「唔…明白。」轉身繼續示威。
時間在喧鬧聲中流逝。
霎時感到有一種不安的感覺，好像有一雙眼睛盯着我，好像有人在監視我。回望四周，一些人圍着閒談，而大多數人是心不在焉空叫口號，一臉等收工的樣子。也許是我多疑，自己只是人叢中一個不值得注意的人。
鐵欄之外一條馬路之隔的另一道鐵欄外，在眾多手持智能手機拍攝者之中，察覺有一個拍攝者無論那一方發出吵鬧聲，手機仍是向着我，不像其他拍攝者轉向事發一方。
那人可能從手機屏幕中發覺我已察覺他，他放下手機。
那人是Andrew Chan 。他對我微笑揮手，兩陣對立面前其中一人向自己揮手示好，在這情景下一時之間不懂回應。 這人一向對別人不懷好意，那會真心示好。




我點頭作回應，慢慢後退沒入人叢之中。
集會結束收了錢，與白文信在回屯門途中，我的電話傳來了一張相片，是 Miko 傳送來。相中人是我，應該是之前集會時給 Andrew Chan 拍攝下來，電話隨即響起。
Miko 怒氣沖沖：「你搞乜嘢呀！全世界都知你係鬼。」
我問：「你想講乜嘢？」
Miko ：「你收到張相仲扮傻，依家我哋成個討論群組都講我男朋友係共狗，又話上次上嚟網台係探聽消息嘅臥底。你搞到我好無面呀！你以後咪再上嚟網台。」
她罵了想罵的話，就結束通話。我將 Miko 所說的話告知白文信。
他哈哈大笑後道：「全世界都知，佢嘅全世界就係佢網台班友。」
「一早就話走，唔好做！依家搞成咁。」
「搞成點呀？佢哋班友一年到晚懷疑好多人係鬼，影到相叫做有証有據無嘢好講，就唔會繼續講啦！無証無據就講極都唔完。咁你有乜損失？」
想真一點，真是沒有實在的損失，但是心裡總覺得有點不妥。
我回答：「我哋收錢站在不義政權那邊，是出賣人格。」
白文信問：「你咁有道德情操，點搵錢呀！即係下次再有呢類集會你唔嚟？」
我搖頭：「唔嚟喇！」
白文信再問：「我認真問你，俾一億叫你再嚟呢道出賣人格，你嚟唔嚟？」
「唔…唔。」




「即係不唔不義都係價錢問題。無需尷尬！呢啲很正常，為公義都要為自己想想㗎。」
我問：「不過，長期咁呃呃騙騙幾時得發達？」
「我都想盡快賺一筆大嘅，諗到單大嘢，不過唔知你夠唔夠膽做。」
我猶豫了一會：「好！要搏就搏一鋪大。」
我站在灣仔告士打道旁的巴士站，在烈日當空下架上太陽眼鏡是很正常，但是帶上魚夫帽又帶上口罩。
等車的乘客不時側目偷看，路過的行人亦好奇回首一看，刻意遮掩面目反倒惹來注意，心中更不安。
突然看見望處有兩個軍裝警向我行來，心中焦急。是否應該轉身離開？雖然還未動手沒有被捕的可能，若被截查有了記錄事情就壞了，好大機會事後被追查到。
在猶豫之間兩警已走近，兩警只顧傾談沒有看我一眼，從我身旁經過離開，鬆一口氣原來只是虛驚一場。
電話鈴聲突然響起。嚇了一跳，是白文信的來電。
「點呀？傳哥仔！你驚到咁嘅款，又帶帽又眼鏡又口罩，你好刻意話俾其他人知你係賊呀？剩係帶太陽眼鏡就得喇！」
我脫下帽及口罩抬頭望向天橋上的白文信：「架車幾時到？」
「俾啲耐性留意路面，解款車就到。」白文信說完這句話就結束通話。
當初聽他說出計劃，心裡是抱有懷疑是否可行。他說自己能使行駛中的解款車跌出錢來，我不相信他能做到，認為是胡吹便隨口答應，但到了真正開始行動心中驚疑不定，也許他另有同黨配合，而設計讓我被警察逮捕，做替死鬼。
不自覺抬頭望向天橋上的白文信，見他突然伸直右手，手掌抓空向後一拉，路面傳來巨響看見行使中解款車的門突然打開，跌出三個大塑膠箱，滾動了幾圈散落滿地一疊疊抄票。
我立即衝出馬路不顧飛馳而來的車輛，御下背囊拼命將錢塞進背囊。巴士站其他等巴士的乘客及路上的途人蜂擁而至哄搶馬路上的錢，解款員意識到事情發生將車停下，但解款車已駛了一段距離。解款員手持散彈槍下車向人群跑來，不停大聲喝止人群繼續搶走抄票，人群開始向不同方向遁逃，而我從預定的逃走路線逃入灣仔鬧市，消失在人海之中。




白文信與我相約事成之後在山坳小屋相見，背着抄票的數量是我一生人都未接觸過，心中的愉快即使山路糾斜亦步伐輕快。
回到小屋，白文信早在門外迎接：「一切順利？」
「當然順利啦！入屋分錢。」
入屋後將背囊內的抄票倒在桌上點算數目，想不到總額比想像中少，只有一百二十多萬。
我心有不忿：「都係我唔夠膽咁快走，應該執多一陣！」
白文信笑道：「第一次去搶算係咁喇！識得驚係好事，有警覺性能知進退。你走嗰時有架旅遊巴嚟，車上面班大陸人落車搶埋一份，解款員用槍指都唔理，咁樣唔係有膽色。佢哋係見到錢雙眼發光喪失理智，無用！不過有佢哋都有好處，差人更難追查，參與搶錢嘅人愈多愈難追返啲錢。」
「一百二十萬分三份，每人只得四十萬。」
白文信愕然問：「點解多咗個人？」
我模仿他在天橋上的動作：「你呢個動作唔係打訊號，俾解款車裡面嘅內應？」
白文信搖頭道：「用內應好易俾差佬跟到。」
我一臉疑惑問：「咁車尾門點會打開？」
白文信定眼看了我一會，然後再做一次在天橋上的動作：「其實我係絕地武士，原力與我同在。」
我估不到白文信有這樣幽默，他不想講就不再追問。
錢對分後，他問我：「六十萬諗住點用？」
我想都不用想：「梗係買樓！」
「六十萬夠買樓？」
「俾咗首期先，慢慢供。」
白文信冷笑一聲問：「冒險搶到筆錢返嚟，送俾班老千集團？」
我長嘆一聲道：「香港變咗好多，如果啲錢再多一啲，可以移民離開香港。」
「我另有大計，不過要用今次搶返嚟嘅錢做本錢。」
我低下頭思量，是不是想騙走我手上的錢，但回想自己在巴士站時多疑對方設計害我。他信任我，不擔憂我帶着錢一走了之不回來，到現在還懷疑對方，真是不夠朋友。
我點頭同意。
錢留在白文信那裡，他說事情剛發生，贓款不能立即用，要過一段時間，而新大計明日再到小屋詳談。我在下山的路上，心中想明天可能他已帶着錢一走了之，騙子是最不可信，但是沒有互信不能合作就成不了事。
電話響起，是一把粗聲粗氣又沒有禮貌的男人聲：「你係咪劉漢傳？差人搵你呀！」
差人找到來，心頭一震說不出話來。
「喂！係咪劉漢傳呀？你老豆喺屯門公園叫雞俾我哋拉咗，你嚟保釋佢。」
「吓！邊間差館？」
「梗係屯門警署！」
再一次來到警署，相距上次的時間不遠，若再來多一兩次就會與警署內的人混熟。
辦理完保釋手續，與父親離開警署。
我道：「咁大年紀就咪搞事啦！襲警、拒捕。」
父親忿忿不平：「屌那星！班冚家產屈得就屈，邊到有打佢呀！搭佢膊頭大力咗少少啫！」
「唉！」我不知怎樣回應，要改變溝通方式問：「叫雞好平常嘅事，阿 Sir 帶你返差館傾兩句，你做乜咁唔合作？」
「班冚家產有心玩嘢，將架警車停到遠一遠， 有心帶我遊街示眾。」
我心中暗笑，而表情認真道：「你唔係一向都好支持香港警察？阿 Sir 咁做自然有佢嘅理由，可以停車嘅地方係咁遠呢！你要相信警察。」
「𨳒你老母！玩嘢呀？」父親被我氣得重提母親：「你同我搵律師打甩單嘢。」
我猶豫了一會道：「我無錢幫你請律師。」
「我唔理！總之你同我搞掂。你唔係睇住老豆去坐監咁不孝呀？」
我想了一會答：「你返屋企先。我去搵朋友商量下。」
我要上山找有錢的朋友商量，他手中的錢有一半是屬於我，取回那需要商量。可是那筆錢得來不易又是開始致富的本錢，不捨得為那個咎由自取的父親錯失良機。
我在小屋門外敲了一會門沒有回應， 常試用力拉門。屋內傳來白文信的喝止聲：「唔好入嚟等一等。」
等了一段時間，白文信才走來開門。
他的神色緊張，有點責罵的語氣：「下次嚟先打個電話嚟通知一聲嗎！」
我心想如此緊張有什麼不見得人？本來想反駁他，這位置收到電話嗎？但見他真是動氣不想惹他。
「我有事搵你商量，入嚟先傾好嗎？」
他不說話轉身入內，跟隨其後。
我將自己父親的事告知他， 想取會自己一份錢以付法律訴訟。
他回應：「唔洗六十萬咁多， 十萬八萬足夠。其實你老豆咁大年紀裁判官好少會判坐監，認罪求情多數判罰款及守行為，啲罰款平過律師費。」
我搖頭道：「我老豆好盲塞，就算佢肯認罪都要搵律師代表佢同個官講，佢講嘢九唔搭八，仲可能鬧法官。」
白文信沉默不語一段時間道：「其實你係咪唔相信我，想攞返啲錢，還是想退出我哋嘅大計？」
他說我不相信他，其實是他不相信我，認為我編造謊言要回贓款。
白文信說出此話使我勃然大怒：「你即係話我作故仔！要呃返啲錢，啲錢我有份無需要呃。既然大家唔信對方就無為繼續合作。」
他神色平靜：「對唔住，係我失言。盜賊之間因利益而結，亦因利而散。該散時就要散，勉強沒有好結果。你嗰份錢俾返你，唔能夠繼續合作好可惜。我送你落山。」
他將一袋錢交給我， 接過錢兩人一起下山，路上再沒有交談。他先前的回應是先道歉再交還金錢， 此連退數步的姿態，使我無話可說。
天色已晚，走至山腳分別時， 對我說有空就來閒聊。他上一次送我下山是向他取回一百元之後，那次我頭也不回離開，但今次回頭看着他返回山上。
父親在保釋期間警方撤銷對其襲警及阻差辦工的控罪，也許近期太多同類罪名，不想年終統計報告上出現，被傳媒說是警民關係惡化的實據。改控公眾地方行為不檢，加上之前另一控罪引人作不道德交易。
父親在門高莊嚴的法庭表現沒有預期般野蠻，當他站在犯人欄望見高高在上的法官，不敢發難低頭認罪，判罰款及守行為。
白文信與我繼續有交往，經常上山找他，但兩人從不提及重新合作之事，其實大家都想重新合作，只是誰都不願先開口。
一天兩人在山崗之上望遠，我問白文信：「你話過搵到大錢就返鄉下，你哋好多人有錢都諗住離開大陸，點解你會諗住返去？」
白文信想了一會：「你唔明嘅，我鄉下唔同嘅！」
「唔好自欺欺人，地獄鬼國邊到都一樣。」
白文信問：「香港都愈來愈似大陸，你有錢都未必有好日子，你又諗住點樣？」
「我之前都講過有錢就走，移民去外國。」
白文信大笑一會對我說：「問題唔係出在地方，係出在人。係班人搞到樂土變地獄，搞出地獄嘅人又憎厭自己搞出嚟嘅地獄，想盡辦法離開地獄去到新嘅樂土，但狗改不了吃屎，蠍子改不了蟄人，思想及性格驅使，不知不覺又將樂土變地獄。當你移民到外國，住在一間有前後花園嘅平房，有一天隔鄰左右搬嚟一班大陸人，你同喺大陸住有乜分別？你想離開香港，逃離大陸人嘅管治移民外國，但有一天收到選舉名單，又有大陸人！大陸人多數選返大陸人，自己人嗎！試問有無人會移民宣誓入藉了一個國家之後，十月一日會聚在一起遊行慶祝另一個國家嘅國慶？」
我對他的言論感到錯愕：「你自己都係大陸人，講到大陸咁差。可能喺外國受過教育會好啲。」
白文信冷笑一聲道：「 百幾年前嘅留學生就變革國家，現在嗰啲大陸留學生係維穩力量之一。」
「俾啲時間佢哋，可能會改變。」
「改變？要承認自己有問題先會去改變，委過於人係佢哋性格之一， 再俾多幾千年時間都唔會變。仲有冇諗住移民？去到全球人口最少嘅南極都可能會遇到大陸人 。」
我苦笑問：「咁我呢種逃走心態係咪好戇鳩？」
白文信笑道：「點會戇鳩！走係好正常嘅想法，你睇下近幾年嘅流行網絡小說唔係逃出地鐵站，就係逃出戲院、逃出屋邨走廊，呢個係多數香港人內心意識投射喺小說裡面嘅表現。未走嘅只係好似你咁走唔到。其實佢哋未意識到，走到去邊都有大陸人。」
我被他這番言論，說得對前景有點迷罔：「照你咁講，是死路一條。」
他又再次哈哈大笑後道：「咁又無需悲觀，活在地獄並不一定痛苦。喺地獄會被欺壓，但係咁大個地獄總有人弱小過你，你咪去欺壓返佢囉！只要唔係最弱嗰個就無問題。有錢又有權就唔係最弱嗰個，疊埋心水一齊搵錢。之前同你提過嘅搵錢大計，仲有無興趣？」
我爽快回答：「有！」
白文信沉思默想一會問：「我哋唔算經過好多事情，算唔算朋友？」
我肯定會答：「係朋友。」
白文信道：「朋友之間要坦誠，要互相信任。我無身份証，有好多事情都要你出面做，唔好諗我係利用你做替死鬼。」
我對他遲遲不說出計劃感到不耐煩：「我信你喇！你快啲講乜嘢計劃。」
白文信神色認真道：「我要建立一個宗教，你做教主。」
我呆住了說不出話，想不到他講出那樣謊謬的想法。