《打賭輸後要溝女神》: 【一週年特別篇】

四十萬個字，係呢一年間我寫咗四十萬個字。
 
或者對於你哋嚟講，其實四十萬字都係一件好普通嘅事，但對於一個曾經連寫四百字都驚嘅我嚟講，四十萬係一個我無法想象嘅數字。
 
由細到大，我嘅作文都係麻麻，初中合格嘅次數屈指可數，比老師話過我嘅想法天馬行空、比同學嘲笑過文筆差，但唔知點解又繼續鐘意寫嘢，係上年我開始咗寫小說嘅旅程，記得第一個故仔係《我拾到一本魔法筆記》，依舊保持天馬行空嘅諗法，腦入面有咩就寫咩，寫咗二千字之後唔知點解內心有種滿足同興奮，仲周圍send比同學，懶係犀利咁。
 
記得我第一個Post嘅地方係HK Discuss，但原來個「吹水閒聊」區係冇人講小說嘅，當時憨憨居居嘅我就咁Po錯區XD，我幻想過自己一Po就會有好多人開始留言支持，但當然係幻想，歷經七個鐘寂寞嘅等待，我終於迎來人生第一個關於小說嘅留言。
 
雖然只係一句「十卜」，但嗰種有人支持嘅感覺同留言嗰位嘅靚女頭像，令我興奮失眠咗成晚。
 




之後到處去搵啲可以比我Po小說嘅地方，去到Uwants論壇終於有一個「文章創作」，用戶名唔知點解覺得「倖存」好型就咁用咗，然後就開始繼續Po小說，見住個瀏覽數日漸上升，心中嘅滿足感真係不言而喻。
 
然後又搵到個小說網——紙言，當時對於我嚟講，呢個係一個好神聖嘅地方，無論係個名定啲作者，都係咁有神氣，邊寫魔法筆記嘅時候又開始咗我第一個愛情故仔《我的美國留學日記》，每日翻到屋企就係聽住歌打文，好有Feel，尤其係夜晚熄埋燈，好似入咗另一個世界咁，到後來我知道咗，呢個就係寫作世界。
 
係上年暑假嘅時候打文真係我嘅最大娛樂，翻到鄉下對住一部手提，我可以由朝早打到凌晨，冇靈感嘅時候就睇下啲綜藝片，曾經試過一日打咗近萬字，我知道自己深深愛上寫作而不能自拔。
 
到咗十月，我開始寫我嘅第二個愛情故事《彼此最遠的距離》，亦都係我目前嚟講寫得最滿意嘅故仔，用身邊嘅人做藍圖，將我每日嘅感受寫落去，其實我真係好似齊樂爲咁鐘意過一個好鐘意笑嘅女仔，寫到最後聖誕節仲要病到死死下，但見到個「全文完」同十萬字又會好滿足。
 
開始咗一陣，隨即寫咗我寫得最爛嘅故仔《我玩了一場真正的狼人遊戲》，令我經歷一段小低潮，其後開始咗寫《麥當勞遇到女神》，亦都有唔少批評，之前嗰種寫作快樂嘅感覺好似越走越遠，諗過放棄寫作，但又諗起自己係因爲鐘意寫作而開始寫作，就唔應該有批評就放低支筆。
 




終於，靠住新愛情故事《打賭輸後要溝女神》（同時係《彼此最遠的距離》嘅續作）搵翻以往嘅感覺。
 
以前我總係不時會開紙言個「人氣文章排行榜」嚟睇，見住啲榜上有名嘅作者自然有種羨慕同憧憬，點知有一日碌下碌下，第二十二位竟然係...「倖存」。
 
「WTF...」呢個係我第一個反應，我因爲呢件事自high咗成日。
 
慢慢個排名逐漸增加，當我越進步嘅時候就會見到更多犀利嘅作者：阿暖、歐子爭、墨說等等，令我更有動力去寫作，終於係今日，靠住大家同埋敏敏(?)嘅支持，小弟終於爬上單日人氣第六位。
 
我嘅寫作路係過山車，經歷過最高峯、跌過落最低點，感激沿路陪伴我走過低潮嘅讀者。
 




係高登受過唔少批評，錯字、情節悶、因爲手傷而多咗幾個負皮，但感激你哋令我知道自己有咩錯，比咗一個改進嘅機會我。
 
多謝小說帶比我嘅另一個世界，從冇諗過有啲巴打可以一直支持一個文筆唔好嘅我、從冇諗過有讀者會Send好長嘅一段訊息嚟鼓勵我、從冇諗過手傷嘅時候都有好多人關心......
 
仲有好多嘢想講，但我諗如果要打曬出嚟真係要打到聽日。
 
只想講少少嘢作結，感激一路上有睇我故仔嘅人，即使你係入入嚟睇咗兩行字就走嘅人或者見到我個名咁樣衰就比負皮嘅人都好，多謝你哋至少會入嚟睇。
 
更加衷心感激打從上年5月開始有留言、追稿、正評嘅巴打們，每一個留言我都好珍惜、每一句支持都係我寫作嘅動力、每一個閱讀都係我快樂嘅來源。
 
老套啲講句，冇你哋就冇我，多謝大家！
 
倖存 筆

PS 係媽媽節呢個普天同慶嘅好日子，緊係用唔出文嚟慶祝啦！





...

..

.

講笑咋，今晚仲會有文，記得嚟追呀！！！

如果已經迷上我，記得Like埋我個FB專頁啦！https://www.facebook.com/tat0305/