✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #16

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////






#16



就是說，華小姐到今日仍未聽到我當年親口錄的留言？



我焦急地抓住阿堅︰





「跟、跟住呢？」

「仲跟住？冇啦！跟住我咪走囉，點可以俾阿Bi等咁耐？」

「吓？啱啱先入正題，咁就冇？你做乜唔叫佢試下解個密碼呀？有幾難估先得架？」

「所以我咪寄封信俾你，等你見返佢嗰時再慢慢解囉。」







說話間我們已走到7仔，阿堅買了幾罐啤酒，再三叮囑我︰

「千祈、千祈、千祈唔好俾阿Bi知道我斗膽撮合你同子昕呀。Michelle都唔知得！」

「放心，我會誓死保護重要證人嘅安全！」



來到這地步，我必須接受me2信的確與華小姐無關。

她從來沒有解開過我寄給她的密碼檔，也沒有跟我說過me2……

至於阿堅為什麼要在信上寫me2，他訕笑︰





「無啦啦加密咁中二，係人都估到你寫咗啲咩啦。」

笑什麼？在中學的年紀做些中二的事情不是理所當然的嗎？這才叫青春啊！



我接受了阿堅的解釋，跟他提著啤酒回去天台，邊燒烤邊思考著接下來應該怎樣辦。

不過有Michelle主理燒烤爐，每一件烤好的食物都鮮嫩多汁，跟他們幾個聊天也實在開懷，漸漸我就放下華小姐的事，全情投入愉快的BBQ時間。

要說理由的話，肯定是因為我們四人從中七就常常混在一起，光是說些無聊廢話都夠樂上半天。

只要是我們這四人組，總是很容易忘卻時間，彷彿自己仍過著剛升上大學時的無憂歲月。







直到Michelle的電話突然響起，打斷了這歡樂的時光。

她望望來電顯示，然後獨自走到天台的一角，越說越激動。

我跟Abby對望一眼，都覺得她有點不對勁。

果然，快要20分鐘之後，她掛掉電話就回來跟我們說︰

「sorry呀，我有啲事要走先……你哋慢慢食。」

我連忙扔掉嘴裡的雞翼︰

「我送你。」





「唔使，我自己返去得架啦。」

Abby馬上幫口︰

「由得阿哥送你啦，咁夜你一個人返去我都唔放心。」

「咁……好啦。Sorry呀，幫唔到你哋執嘢。」Michelle一臉抱歉。

「放心交俾我老公得架啦！下次再嚟玩過～」

阿堅，辛苦你了。



道別之後，我匆匆收拾好東西，跟Michelle下樓。





由離開Abby家到地鐵站，Michelle都異常沉默，顯得憂心忡忡。

車程中，我嘗試找些笑話逗她說，但她都很明顯地心不在焉，跟剛開始燒烤時判若兩人。

我猜，那通電話肯定說了什麼非常不得了的事。

亦正因此，她自己不想開口的話，我反而不懂該說些什麼安慰她。



我唯有靜靜地跟在她的身旁，陪她走上回家的路。

中學以來，不知送過她回家多少次了。她家仍是在那舊區的唐樓天台，雖然她自己總說附近很安全，但充滿視線死角的後巷和昏暗的街道怎樣都令人放心不下。

何況，她晚間的視力非常差。

今晚她的狀態超級糟糕，轉進舊區之後幾次被高低不平的行人路絆到，如果不是我扶住她，只怕她已摔倒。



「阿Mi……你冇事呀嘛？」

她站起來，輕輕嘆一口氣︰

「其實我唔明……」

「唔明乜嘢？」

「唔明嗰啲走咗好耐嘅人，點解要返嚟呢？」

我心中一凜，難道Michelle說的是華小姐？

「呃……咁……返得嚟，應該都有啲理由……卦……？」

「例如呢？咩理由？」

她美麗的眼睛在黑夜裡閃閃發光。

「呃……唔捨得？」

她輕蔑一笑︰

「唔捨得，咁當初點解要走？」

「呃……咁可能係因為其他原因先要走……」

「咩原因都好啦，既然決定咗走，就應該唔再留戀，亦都唔好諗可以返轉頭。冇可能你話放棄就放棄，話要返嚟就返嚟架嘛，你話係唔係？唔通你想走就走，其他人就要一路喺度等你呀？冇理由囉。」

「唔，道理上係嘅……」

Michelle越說越激動︰

「呢啲人真係好自私！佢有冇諗過，俾佢瀨低嘅人要點生活？好喇，佢冇諗過，佢一走了之，都算啦。人哋咁辛苦終於搵到方法生活，冇咗佢都冇問題嘅時候，佢又要返嚟破壞人哋嘅新生活！咁算點？」



她生氣的樣子，不禁令我想起剛剛認識她的時候。

就算她想抱怨華小姐，應該也不會說到這地步。我越想越不對勁，便問︰

「阿Mi，其實……發生咩事？你講緊邊個？」

Michelle望望我，重重嘆一口氣︰

「……我阿爸。佢返咗嚟。」



這消息連我都覺得震撼︰

「吓？我記得你爸爸應該喺你好細個時就……」

「係，我五歲時佢就走咗，一直咩音訊都冇，當然亦都冇養過我同我妹妹。我一直都當佢死咗就算。」

她美麗的眼裡帶著冷峻的恨意，下一秒卻洩了氣︰

「點知頭先我媽咪打嚟，好開心咁同我講，話阿爸返咗嚟。」

「返咗嚟嘅意思即係……」

說話間，我們已走到Michelle居住的唐樓樓下。她面無表情地指向上方︰

「係，而家就喺上面。」



十幾年沒見過的父親突然出現嗎？會是感人的重逢還是激烈的吵架？我簡直難以想像那畫面。

「咁……你諗住點？」

Michelle不加思索︰

「趕佢走。」

「……吓？」

「佢擺到明外邊有女人所以先走咗去，而家啲錢洗晒，人又老錢又冇情婦又走佬，就想返嚟認返老婆同啲女？發夢！邊有咁便宜嘅事？」

此刻的Michelle，背後彷彿有殺氣湧出。



「但係，你唔係話auntie佢……」

「係，我會鬧醒埋佢。」

Michelle神情肅穆，我不禁想待會樓上可能會有一輪腥風血雨。

「呃……不如，我陪你上去啦。」

她呆了呆，表情變得柔和︰

「唔使，好小事咋嘛。」

「我覺得，人生入面都冇乜幾多件呢個level嘅小事。」

她笑笑︰

「唔使擔心我，我搞得掂。同埋，一家人嘅事有其他人喺度只會更加複雜。」

「咁都係嘅……」

可能我的樣子太擔心，她輕拍我的手臂︰

「契哥，放心啦，我識得保護自己架。」

「咁……如果有咩事，你要即刻搵我幫手。」

「嗯……」

她靜了下來，雙眼默默地凝望我︰

「我，而家可唔可以請你幫我一樣嘢？」

「梗可以啦！乜都得！」

「咁……我……可唔可以攬下你？」


.

by又曦

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]