✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #23

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////
 




拒絕了Suki之後我又回去麥當當上班，這天工作比想像中順利，Suki也沒有再來找我。
我想她大概找到別人陪她吧？說不擔心Suki是假的，想到她找到人陪，我才鬆一口氣。

工作了大概兩、三小時後，經理突然走過來取笑我︰
「喂阿翔，你今日係咪想詐病陪女朋友呀？」
經理是個女生，大概廿幾歲，對我們就像大姐姐一樣。因為看不出經理的年紀，有人傳說她已婚，又有人說她還在讀大學。
但我想，這兩者都太戲劇性了，應該都是假的吧。



被經理這樣一說，我的臉馬上紅了起來︰
「乜、乜呀……我……我都無女朋友……」
「吓？無？」
「係呀，俾、俾人飛咗……」
「係——咩？咁我諗佢想同你復合喎。你睇下，佢又嚟搵你啦。」

經理動作誇張地指指店面，我探頭一看，竟然又見到華小姐坐在窗邊看書，只覺頭皮發麻。
她又來了？因為我昨晚送她回家嗎？所以她以為我很歡迎她？
怎麼這樣啊，我只是想表現一點風度而已，不要來找我啦……



經理輕拍我的肩，笑得蠱惑︰
「咁啦，我特別恩准你出去同佢傾幾句啦。」
「佢唔係我女朋友嚟！同學嚟架咋！」
經理擺擺手，把我趕出廚房。

.

我走到華小姐的桌前，她卻專心看書，似乎沒有留意到我。
於是，我彎低身裝著抹檯的樣子，她才終於注意到我的存在，放下書本對我微笑。我忍不住說︰
「點解你又喺度嘅？」
「咦？我嚟睇書嘛。」
「考完試重睇乜書呀？你唔係話考完試要日日去玩咩？」
「天氣咁熱，出得街多都悶啦。睇書都係娛樂嚟架！」

我低頭看看，只見她手上的書還是昨天那本英文書︰


「英文書嚟喎，有咩好睇？」
「咩呀？呢本科幻小說好易睇架。」
接著，她就長篇大論介紹那本小說的內容。大意是說一個人意外發明了時光機，於是他就開始了時空冒險，結果令身邊所有事情都變得混亂。

我當然沒有心思慢慢聽她介紹劇情，隨意敷衍過去，便進入正題︰
「其實呢，阿經理已經認得你係我朋友啦。如果你成日都嚟搵我，佢會覺得我開工時間都掛住玩架……」
「點會呀？我坐喺呢度，你喺廚房，我點樣影響到你？」
「又唔係真係影響到嘅，但觀感始終唔好。你都唔想我俾人炒架？」
「但係……」

正跟華小姐爭論時，我的電話突然響了起來，來電者居然是Suki。
我轉頭望了一眼，趁經理沒注意，便跑出店外的死角位接聽。
「喂？Suki？喂？」
電話對頭一直沒回應，只傳來奇怪的叩門聲和叫罵聲。
「Suki？你聽唔聽到呀？」


「……翔……阿翔！你終於聽電話啦！你要救我！快啲救我！」

Suki的聲音明顯是哭腔，認識她這麼久，我還沒見過她這樣說話。我也慌亂起來︰
「你、你無事呀嘛？而家有冇人陪你？」
「冇呀，得我一個咋喎！嗰個人……約我嚟影相嗰個原來係淫攝嚟！佢係咁逼我著件好暴露嘅泳衣，我唔肯，佢就係咁鬧我！而家我匿咗入廁所，佢就係咁拍門，我出唔到去……」
她這麼一說，我終於知道剛才聽到的怪聲是什麼。只聽Suki尖叫一聲︰
「呀——！阿翔，我好驚……我真係好驚呀！如果佢踢爛度門咁點算……佢會唔會打我架，我……阿翔，我……」
「你而家喺邊度？我即刻過嚟！」

Suki匆匆跟我說了某沙灘名字就收線，我快步跑回廚房，對經理說︰
「經理，對唔住！我前女友出咗事，我……我想請半日假去睇佢！」
「咦？你前女友唔係出面嗰個咩？乜而家啲後生仔感情咁複雜……」
雖說如此，經理還是讓我放假。我再三道謝，跑去更衣室換過衣服就直奔出麥當當。

華小姐卻在這時跟著跑過來︰


「阿翔，你無事呀嘛？係咪經理鬧你？」
「唔係！我有啲急事！我返嚟再同你講！」
我留下這句話，便把她拋在身後，以最高速度向小巴站跑去。

.

還好家附近有小巴直達Suki所在的沙灘，小巴司機也不負眾望發揮出應有水平，20分鐘之後我已經在沙灘附近下車。
途中我不斷打電話給Suki，但一直沒人接聽，我心中的不安越來越濃。
我走到沙灘看看路牌，然後直往公共廁所跑去。
我在女廁門口大叫Suki的名字，奇怪的是怎麼叫沒人回應，也看不到有人不斷拍門。

Suki的電話還是沒人接，我心中擔憂卻只能在沙灘上亂跑。找了差不多五分鐘，我問過一個清潔嬸嬸，才知道在沙灘的另一邊還有一排臨時廁所。
我連忙向那邊跑去，還在不遠處找到目標。

那一排臨時廁所立在沙灘最上方，散發著濃濃尿臭。由於這邊不是泳灘位置，人煙稀少。一個頸上掛著相機的男人對其中一格廁所門拳打腳踢，口中罵過不停︰


「八婆！你唔好再嘥時間啦！出嚟！快啲出嚟呀！」
那男人看上去大概三十歲年紀，身材比我粗壯起碼兩、三個碼。
我要跟這個人對抗？這是什麼惡質玩笑啊！不不不，必須要用和談解決！

我用力咽了咽口水，皺著眉頭走過去︰
「呃……呢位……呢位先生……」
「過主啦！呢格廁所有人呀！你盲架！」
「呃……我係想請教下呢……即係……唔知你有、有無見過……」
我的話還沒說完，廁所裡就傳出Suki高興的聲音︰
「阿翔！阿翔係咪你嚟咗？快啲救我呀！」

男人一腳踢在廁所門上叫Suki收聲，Suki尖叫起來，男人連續拍門讓她閉嘴，轉而向我逼近︰
「細路，你係條女嘅同黨？嗱，我就講道理嘅！條女網上就話點影都得，收咗錢出到嚟就呢樣唔得嗰樣唔得，點計先？」
「大、大佬，有……有事慢慢講呀……佢……佢收咗你幾多錢？我……我代佢畀返你呀……」
說著，我震騰騰地拿出錢包。男人瞄了我一眼，又打了一掌在廁所門上，怒吼︰
「而家唔係錢嘅問題呀！係佢應承咗影性感相又唔肯！佢玩我呀！」

 


/////


《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰http://bit.ly/2rxGoFA