中左六合彩頭獎四千八百萬，依家唔知點算?: 98 真實結局（慎入）
「嘟嘟嘟～她的心鐵石那樣無情～～即是可惜我始終不吃驚～～～」電話鬧鐘響起...，我自然反應撳熄咗佢。
我訓左喺我自己張床度，天已經光哂...我聽到廳出面嘅嘈雜聲音，咦...咪住先...呢度咪我以前公屋間房....
「～嚓....」房門鎖扭動。
「...八點半啦，仲唔起身，你鬧鐘首飲歌播咗兩次㗎啦！」思敏叫我，我dear air 左半分鐘之後慢慢爬左起身，意識亦都開始清醒咁行左出房，經過大廳再行到入廁所小便，沖完涼刷完牙之後，我就換衫準備出門口返工啦。
「...爸爸！開youtube 比我吖。」出門口前我個仔攞住部電話走左埋離叫我。
「...成日睇YouTube ，睇壞眼呀。」思敏話佢。
「...拜拜！乖乖地聽媽咪話啦！」同佢哋道別完之後，我就出門口行左落街口巴士總站坐巴士返工啦。
講到依度大家可能仲未知道發生咩事，係咪仲係覺得一舊雲咁？其實一切都只係一場夢，一個好似發生左好耐好耐嘅夢，喺頭先鬧鐘響嘅一刻我已經意識得到依個真實世界。
係呀，我根本就冇中到六合彩，依然係一個住公屋嘅死窮鬼，每日繼續返果份貨van司機嘅工，而我老婆其實就係思敏...一直都係，浠琳真係我個女，不過係我同思敏生嘅女，佢嘅所有野同喺夢入面大至相同，喺我起身之前應該就已經出咗門口返左學啦。
「....咁早呀，聰。」返到公司...阿榮同占士兩個依舊坐左喺車場啲貨van度hea緊，一切就好似從來都冇發生過咁，我唯有繼續努力工作啦。
其實好多野都係我喺夢入面幻想出離，現實我就係一個好平凡嘅貨車司機，思敏的確係我細妹個中學同學兼老友，詠恩亦都係我嘅前度女友，真正嘅版本就係我同詠恩的確係讀毅進果陣識嘅，但係讀完毅進之後果一年，我哋嘅感情就開始轉淡啦，之後思敏就啱啱喺外國讀完書返離，好主動咁親近我，跟住我哋就順理成章咁一齊左，而我就同詠恩和平分手。
至於歌唱比賽？無錯我的確係喺紅磡都會商場參加過一個叫做「粵港偶像模仿大激鬥」嘅歌唱比賽，不過唔係思敏幫我報名，而係一個叫做ceci 嘅舊朋友，不過結果當然係輸咗啦，而果位舊朋友ceci之後就做左𡃁模，聽講仲同余文樂傳過緋聞添。
思敏老豆的確係做生意嘅，不過只係好小型嘅運輸生意，即係有兩三部貨車有幾個伙記打佢工果啲呢，錢唔會搵得多，生意大極有限，就算有都留左比思敏阿哥黑仔先，我從來都冇諗過會有我份，所以思敏肯陪我捱窮住公屋我已經好感恩。
我同思敏就好似一對正常情侶咁，拍左幾年拖無風無浪咁就結咗婚啦。之後一年我哋就生左浠琳，幾年之後仲生左個仔添，所有野都好順理成章，就係一般人嘅日常咁。依家諗返起，其實同詠恩分左手之後，我哋已經冇再連絡，果幾年詠恩就好似人間蒸發左咁，直到阿仔三歲果年，我開始間中喺屋企附近撞到詠恩。原來佢亦都已經嫁左人，而且仲生左一仔一女添。咁啱佢而家嘅老公亦都係住喺同我同一條邨，所以我先可以見返佢。每次見到佢，佢都好似見唔到我咁，就好似個陌路人咁，佢冇同我打招呼，我亦都唔敢打擾。
唔知大家係咪都係好似我咁呢，當你唔了解唔知你嘅前度女友之前空白左嘅日子或者現在嘅日子到底點過嘅時候，就特別覺得好奇，特別想去了解多啲，反而一啲每日喺社交媒體見到嘅前度女友，就會覺得冇乜興趣，唔會上心咁。
收工之後我帶住疲累嘅身軀搭巴士返到屋企，阿媽依舊係煮好哂餸，而且餵緊我個仔昊昊食飯。思敏就開夜仲未收工，至於我老豆呢，的確係一個裝修佬不過喺早兩年已經因為胰臟癌過左身啦，阿妹亦都嫁左人，已經搬走左，不過當然唔係嫁左比黑仔啦，其實佢又真係同黑仔拍過拖嘅，不過係我同思敏一齊之前嘅事啦，最後阿妹都係嫁左比佢個大學同學，而家就只係得返我一家四口同我阿媽一齊住。
食完飯浠琳就自己溫書，因為佢考緊試，今日啱啱考完數學，聽日就考英文，所以我都唔打擾佢啦，等佢可以專心溫書。我同個仔做完功課沖埋涼都已經成十點幾啦。思敏終於都收工返到離，等佢氹埋個仔訓覺，再等佢梳洗完之後已經十一點幾啦。
我哋大家都係百無了賴咁坐喺梳化度拎住部電話喺度各有各撳，好似一齊緊咁，但係又好似冇連繫咁，我相信好多夫妻同我地都係一樣，生活得好平淡，但其實咁先至係正常，平淡似水，但細水長流。
「…係喎！你知唔知我今朝見到邊個呀？」思敏忽然諗起啲野。
「…邊個呢？」我繼續一路打機一路回應。
「…你前度呀！」思敏笑笑口講，搞到我都即時望一望佢。
「…講咩呀！」我扮唔知，繼續好唔自然咁撳緊部電話。
「…你果個詠恩喎！」思敏再講。
「…係咩？」我繼續扮到好不經意咁，希望思敏唔好亂諗野。
「…原來呀！佢個女係你個仔同班同學離架！」思敏再講，今次我真係扮唔到啦，有啲驚訝咁望住思敏。
「…竟然…！」我回應。
「…係喎！我都覺得奇！之前一向都係佢奶奶接放學嘅，但係今日轉左係佢我先知原來同你個仔好friend 果個梓喬係佢個女。」思敏講，估唔到世界真係細…，唔通真係緣份？呢一代冇結果…要到下一代先有？諗起都起雞皮…如果真係嘅話都真係幾尷尬…，唔好諗！唔好諗！唔好諗！清醒清醒清醒！
「…做咩呀，掛住人牙？」思敏見我好似諗緊野咁，於是潤緊我。
「痴…線…！」我繼續打機回應，就咁就輕輕帶過左啦，大家繼續各自撳電話。
「…老公，幾時再去staycation呀，海洋公園萬豪酒店好似幾正咁喎，不如下個月近近地去吓囉。」過左一陣思敏拎住部電話痴左埋離比我睇。
「…好貴喎又去！」我係咁易望一望，之後hea回然後繼續撳我嘅電話。
「…下個月結婚周年吖嘛！嘻嘻…好啦…老公。」思敏攬左埋離好sweet 咁講，講到尾對我最好果個始終都係思敏，有時揀個佢愛你多過你愛佢嘅人，其實都係一種幸福離嘅。
撳完電話我地就一齊入房訓覺，就好似例行工事咁。攤左上床之後，我琴晚個夢開始喺我腦海中浮現返出嚟。唔知點解呢，平時唔會記得，但臨瞓嘅時候又會記得返之前一晚發嘅夢，好回味...可能因為我琴日朝早喺屋企樓下撞到詠恩啦，所以琴晚就發夢見返佢，我間中都係咁樣，回憶總是美好，唔怕話埋比大家聽，其實阿瑜先至係我最愛嘅初戀情人，我哋喺讀中學嘅時期已經識，熱戀左一年就因為性格不合而分開左。讀完書之後佢就人間蒸發左，聽講嫁左去台灣所以感覺更加神秘，更加想知道佢喺消失之後嘅一切。
大家可能覺得我好衰，拿...我由頭到尾都冇講過我唔愛思敏架，我哋喺生活上好夾，思敏亦都好就我對我好好，我哋生活得好開心，不過世事就係咁架啦，最愛嘅永遠都唔會去到終點，白頭到老嘅唔會係最愛果個，依啲就係現實啦，咪住先...今日同阿榮、占士佢哋夾錢買左張六合彩未對喎，拿拿臨上網對一對先，話唔定今期頭獎會係我中呢。
「18....」車...餐餐都中得三個號碼。
「…訓啦！咪成日發夢中六合彩啦！」思敏一邊訓一邊講。
話時話唔講唔覺，原來我訓喺張床度寫依個結局已經寫到凌晨四點啦，六合彩又唔中...大家唔好再發夢啦，真係要訓啦，聽朝早啲起身記得準時返工把啦，希望今晚我可以再發返個好夢啦！
「…咪再寫你果啲無人睇嘅小說啦，個電話好巉眼呀，聽日唔洗返工咩，成四點幾仲唔訓？」半夢半醒嘅思敏講。
好啦好啦！睇離再唔訓真係會比人鬧爆架啦，其實做人間中發吓夢都幾好吖！唔知我可唔可以發返琴晚個夢呢？
早唞！
全書完！
多謝收看！
「…老公…！敬酒啦。」咦～喂！點解我又返返離婚宴嘅？
「…敬咩酒啊？」我問詠恩。
「…頭先唱完歌…差唔多尾聲啦，係時候要敬酒啦！」詠恩再講，仲攞咗杯紅酒俾我添，唔通我又發緊夢？咁到底…邊個先係真實世界呀？媽…我好亂啊！
真係完啦！早唞啦咁多位！
多謝收看！
周文西