中左六合彩頭獎四千八百萬，依家唔知點算?: 97 完美結局
兩年之後
大家好呀，我張敬聰好耐都冇同大家見面啦，話咁快就過左兩年啦，呢兩年話難唔難話易唔易，發生左好多事，但係都終於過咗去啦。
今日係我老豆公司嘅股東大會呀，你無聽錯呀，兩年前老豆間公司已經順利上市，雖然依兩年市道唔係咁好，而且又有疫情，但係好彩對樓市影響不大呀，樓市好自然裝修室內設計都好架啦。咁所以呢…呢兩年公司都真係搵唔小錢，而家我哋間上市公司市值已經去到廿幾憶啦。今年老豆仲準備進軍埋房地產市場添，所以今日股東大會就會同啲股民交代下。
忙完一輪之後，我就同詠恩一齊出席公司嘅午餐酒會，真係唔到你唔信呀，咁岩得咁橋酒會嘅場地竟然會係跑馬地馬會，一個可以話係我哋發跡嘅地方，諗返起當日我攞頭獎果陣時，曾經見到好多名流紳士喺度出出入入，果陣我仲幻想自己唔知會唔會有一日好似佢哋咁喺呢度出入呢，估唔到今日竟然幻想成真喎，可能好多野都好似餐廳例湯咁，即係咩？（整定）囉。
現場離得嘅都係名流紳士，唔係公司股東就係生意上嘅夥伴，我同詠恩仲有阿妹周圍同佢哋soso同打交道，雖然我個人就唔係太鍾意soso但為咗公司無計啦，況且做落又唔係太差姐，咪當同人吹下水囉。
但係傾傾吓，有一個人忽然喺我面前出現。
「…大佬！」阿妹同我同時見到佢，而果個人亦都係一樣，而家仲主動行緊埋離添。
「…hi！」果個人開聲同我哋打招呼。
「…hi。」我同阿妹一齊回應。
「…好耐冇見啦，見返你哋真係好呀！」果個人開口講，其實佢…就係…阿瑜。
而家阿瑜身穿高級晚裝裙，就好似個名媛咁款，睇離佢終於都成功左。
「…恭喜你喎。」我同阿瑜講，其實又好似有少少暗串佢咁。
「…多謝，其實有啲野…大家都係身不由己嘅，哈哈…等價交換吖嘛！！」阿瑜好似好隱晦咁。
「…我都恭喜你哋呀！公司上市兩年就有咁好業績，哈哈…如果當年我揀你…你話幾好呢…哈哈…！」阿瑜懶搞笑咁講，其實咁講佢仲尷尬。
「…傾緊咩呀？」一個西裝佬行左埋離，我認得佢係我哋公司嘅合作夥伴離。
「…無呀，撞返個舊同學同埋佢阿哥咋嘛。」阿瑜回應，睇得出阿瑜好聽佢話。
「…哦！原來張小姐係我太太舊同學離架？你好！」阿瑜老公同我哋揸揸手，循例傾咗幾句之後，就同阿瑜一齊行開咗啦。
「…估唔到阿瑜最後真係嫁到有錢佬，不過就年紀大左小小咁囉，睇落好似成五十幾歲架啦喎，邊個離架？」我問阿妹。
「…你唔知咩大佬？果個咪牆紙大王達明囉！」阿妹講出。
「我真係唔知邊個達明囉，張達明我就識。」我懶搞笑回應。
「…佢個廠房喺我哋以前公屋屋企附近架咋，我哋公司成日都同佢攞貨嘅，不過大佬你成日都唔理公司野緊唔知啦。」阿妹講到好似好熟咁。
「…不過聽講脾氣好臭架，仲成日都打老婆嘅，估唔到原來佢老婆就係…阿瑜囉。」阿妹講完之後唔知點解有少少覺得阿瑜好可憐添，其實錢同物質真係咁重要咩？為咗錢連肉體甚至乎靈魂都可以出賣，我諗我哋都真係要好好反思吓啦。
酒會完左之後我馬不停蹄，因為我有三個好重要嘅地方要去。我揸住部車去到石塘咀，我行到上一幢唐樓嘅其中一個單位度準備贖罪啦。
「…叮噹～」我撳鐘…好快就有人開門。
「…吓！阿聰！」開門嘅喺carol。
「…阻唔阻你呀？」我問。
「…唔阻，入離先傾啦。」carol開門請左我入去坐，以前就聽得多啦，今日都係第一次親身體驗到carol屋企到底有幾細啦。
成間屋得一張單人床，一個衣櫃同一張摺檯，無廚房得個電池爐，而且廁所亦都極細，保守估計一百呎都唔到，真係要好似carol咁細粒先可以住得到，唔怪之得佢結咗婚都唔可以同個老公一齊住啦。
「…冇…見咁耐冇見經開呢頭咪探吓你囉。」我打開話題。
「…係呢…最近咩景況呀？」我問。
「…無呀，你知而家疫情都未好返哂幾難搵工架啦，咪喺附近做住收銀先囉。」carol回應。
「…你老公呢？」我再問。
「…佢…佢都仲係返緊地盤。」
「…都仲係分開住牙？」我再問。
「…你知啦，佢屋企果邊又係成村人嘅，冇辦法啦。」carol無奈回應。
「…係喎，你結婚果陣都未做人情比你添，攞住啦。」我將一張支票遞左比carol。
「……！」carol接過支票之後成個人呆哂。
「…咪…咪住先，呢度寫住千二萬喎！阿聰做…做咩先。」carol好驚咁想推返張支票比我。
「…攞去啦，同老公買個好啲嘅單位住啦，風水佬話要我做善事喎，之前你喺公司都成日幫我，你咪收咗佢囉。」我不斷搵一啲好牽強嘅理由，務求要carol收咗張支票佢。到最後我都成功達陣，carol喊住咁同我講多謝，其實係我欠左佢哋嘅，我當日講過會雙倍奉還，今日總算叫做到吖，希望佢同佢老公可以幸福快樂啦。
走左之後我離到第二站，慈雲山嘅一間髮型屋。髮型屋喎…我諗大家都估到係邊個啦，冇錯我要搵嘅就係占士，可能大家都忘記咗， 占士本身係一個髮型師，咁所以呢聽講佢俾人炒咗之後，就返咗去做佢嘅老本行，去到慈雲山嘅一間髮型屋度幫人剪髮。
「…歡迎光臨，請問有冇相熟師傅啊？」我推門而入，一個女職員問我。
「…占士喺咪度呀？」我問。
「…占士哥！」女職員叫，之後就見到占士喺入面房施施然咁行出嚟啦。
「…咦～聰！咩風吹你嚟啊？」占士見到我有啲驚訝，仲笑笑口咁。
「…知你喺度剪髮特登過嚟搵你幫手呀嘛，今晚有個好重要嘅地方要去，幫我修修佢，同埋set靚個頭吖！」我回應，之後占士就開始幫我剪髮啦。
「…吖…估唔到你做咗明星之後真係會返嚟搵我剪髮，係呢…依排好似好少見你上電視咁嘅？」剪緊果陣占士問。
「…冇啦，我都開始慢慢淡出緊娛樂圈！」我回應。
「…點解呀，之前做得幾好呀，你果套電影做火鍋店職員果套我都有睇架，之後仲好似攞左金像獎最佳電影架！」占士有啲可惜咁問。
「…我老豆公司比較忙，所以我要開始返去幫吓佢手。」我回應。
「…哦！」
「…你點呀？撈得掂唔掂？」我反問。
「…冇話掂唔掂嘅，呢啲屋村地方，都係做吓街坊生意餐搵餐食咁啦。」占士回應。
「…占士哥，你地識架？」差唔多剪完，頭先嗰個女職員走咗埋嚟，有啲尷尬咁問占士。
「…阿聰係我以前公司同事離架！」占士回應。
「…係呀！唔記得介紹添，我女人呀！」占士再講，原來個女職員係阿嫂離嘅。
「…阿嫂你好！」我微笑回應。
「…我有聽你啲歌架…可唔可以同你影張相呀？」阿嫂竟然要求合照，咁我梗係來者不拒啦，剪完之後我先後同占士、阿嫂同埋佢哋兩個一齊合照，等佢哋可以擺我張相喺度做生招牌。
「…好靚呀，唔該晒唔該晒！」set好晒頭之後我照住鏡講。
「…客咩氣吖！」占士回應。
「…好啦買單啦！」我行左埋櫃位度將一張票交咗比阿嫂講。
「…買乜鬼嘢單啦，得啦我請啦！」占士好豪邁咁回應。
「…占…占士…哥！」阿嫂見到張票之後嚇到目定口呆，口都震埋咁叫占士，占士覺得奇怪，好疑惑咁行咗埋離。
「…咩意思呀？」占士睇完張票之後，有啲無奈咁問。
「…買單囉！黃大仙話叫我幫助下啲朋友。」我繼續用一啲九唔搭八嘅藉口。
「…大啦啦千二萬喎，你發咗達呀？」占士再問。
「…係呀，我老豆而家係上市公司主席，遲吓間公司都要由我接手架啦，咁所以呢…咪當幫吓朋友囉，你以前成日都話想開一間自己嘅髮型屋架嘛，呢度夠哂架啦，同阿嫂兩個好好咁生活啦。」雖然占士開頭有啲抗拒，但係講真人都係貪心嘅，見到千二萬喎，比我講多兩講就開始動搖㗎啦，最後都好感激咁收咗張支票，我又完成一單任務啦。
最後…我要搵邊個？當然係阿榮啦。三個之中最擔心嗰個就係佢，點解？因為佢最似藝術家囉。不務正業，只係間中幫人影吓相同畫畫，最重要嘅就係踩滑板，都係啲搵唔到食嘅嘢嚟嘅。咁所以呢…最後我去到位於觀塘嘅一個室內滑板場。聽聞佢而家喺度兼職教班。一上到去就見到得幾個人喺度踩緊版，而阿榮就喺到教緊其中一個小朋友。
「…阿榮！」我叫，阿榮望一望過嚟，之後就行咗埋嚟我度啦。
「…聰！做乜咁好上嚟呢度搵我嘅？」阿榮微笑咁問。
「…搵你教踩滑板呀嘛！」我講。
「…講笑咩…！」阿榮笑笑口回應，之後我哋兩個人就坐咗去板場側邊嗰啲櫈度。
「…你點呀，仲係全職教滑板呀？」我問。
「…係呀，咁可以方便我專心訓練啦嘛。」阿榮再講。
「…生意O唔OK吖？」我再問。
「…你知而家疫情架啦，雖然開始好啲…但離踩板嘅人始終都係少。不過唔緊要啦，為咗去東京，死慳死抵都要㗎啦。」阿榮回應。
「…你仲諗住去東京奧運架？」我問。
「…係呀！本來上年去，但因為疫情推遲咗一年，咁所以我依家就籌備緊。」阿榮好興奮咁講。
「…你知啦，奧運有幾可有滑板姐，今次唔去就呢世都冇機會㗎啦，難得我仲可以以教練團嘅身份跟港隊過去喎，當埋條底褲都要啦。」阿榮講。
「…咁我都為香港運動員出一分力啦。」講到呢度大家都知我想做乜㗎啦，梗係拎張票出嚟交俾阿榮啦。
「…千…千二萬！」阿榮同其他兩個都係一樣反應啦，見到張票都係成個人呆晒。
「…嗯！有左依千二萬咪可以專心訓練同買返啲教材，你想點用就點用囉。」我再講。
「…嗯！多…多謝你呀阿聰，我會好好利用架啦。」但係阿榮同佢兩個完全唔同，好快就興奮接受左我個千二萬啦…佢…唔會係以為我果千二萬係捐比香港運動員掛…點都好啦…比左佢嘅佢鍾意點用就點用啦，都係佢自己嘅意願。
好啦！咁多年嘅承諾，喺我心入面嘅內疚感…終於都一掃而空啦。跟住落離呢…我就要趕我嘅下場啦。去邊度？你估我無情白事set到個頭咁行，真係食飽飯冇屎屙咩，緊係有緊要野做呢，至於做啲乜嘢，等陣你哋咪知囉！
還完一大輪債已經差唔多黃昏時間啦，我揸住部車返返去跑馬地馬會。泊好部車之後我就步入場地搭𨋢上到去六樓嘅馬主廂房。
「…咁遲架！」一上到去就見到阿妹坐咗喺門口附近嘅櫃位度。
「…忙吖嘛！」我求其回應。
「…阿嫂等咗你好耐啦！」阿妹再講。
「…詠恩喺邊度呀？」我四圍望緊。
「…啱啱入咗新娘房補妝啊，你快啲入去睇吓佢啦。」阿妹回應。
冇錯呀…今日就係我同詠恩擺酒嘅大好日子，我哋選擇咗喺馬會舉行，因為我覺得馬會係我嘅發跡地，所以喺邊度開始就要喺邊度終結。點解隔咗兩年先擺酒？其實兩年前律師喺我哋屋企簽完紙之後，我哋就開始籌備婚禮架啦，但係好景不常，社會發生咗好多事，之後就係疫情嘅出現，我哋嘅婚宴一再延期，所以拖下拖下到今時今日先可以補辦我哋嘅婚宴。
「…爸爸！」浠琳衝左埋離，小苑緊隨其後。
「…乖囡！嘩！今日着得好靚女喎！」我摸一摸浠琳個頭講。
「…你個女得咗啦！你有咩表示啊？」小苑忽然彈出一句說話。
「…得咗咩呀？」我問。
「…你自己睇吓！」小苑遞咗份表格俾我睇。
「…咩離架？…星夢…傳奇！」我一路睇一路讀。
「…唔係吖嘛，你個阿姨…舊年真係走去幫佢報左我舊公司果個歌唱比賽啊！」我有啲驚訝咁講。
「…做咩姐，你當年可以參加歌唱比賽，點解你個女唔參加得呢？」小苑好招積咁講。
「…咁…佢先得個十歲人仔！」我有啲無奈咁講。
「…爸爸我十一歲㗎啦！」浠琳回應。
「…都係太細個姐！」我繼續無奈，大佬自己個囡喎，梗係唔想佢進入娛樂圈呢個大染缸㗎啦。
「…咁你個女唱歌真係好聽吖嘛，如果唔係點會入到決賽呢！」小苑繼續力薦。
「…咁！」我都唔識點講啦。
「…爸爸，我真係好鍾意唱歌架！」浠琳用楚楚可憐嘅眼神對住我講。
「… 唉～好啦好啦，爸爸支持你囉！」我投降啦。
「…好野！多謝爸爸！」見到浠琳開心乜都係值得嘅。
「…記住！入到決賽最緊要事事小心，對人要有禮貌，要虛心學習，知唔知啊？」我講。
「..知道啦！」浠琳回應。
「…阿仔！」阿媽叫我，於是我就行咗過去。
阿媽今日着得好靚，從來都冇見過佢着得咁靚，依家抱住我個仔喺度同啲親戚玩緊。
「…阿媽！今日咁鬼靚呀！」我講。
「…唔好講呢啲住，你睇吓我買咗隻藤鈪比你個仔呀，你睇吓靚唔靚，可以辟邪定驚架！」
阿媽好開心咁抱住我個仔喺度搖離搖去，好似玩公仔咁，不過我個仔又真係幾得意，舊年年頭出世，出世嗰陣得五磅幾重㗎咋，好彩之後阿媽照顧周到養到佢肥肥白白，老豆搵師傅幫佢改咗個名叫做張俊昊，希望佢第時有我咁靚仔啦。
「…好靚喎老婆！」玩完個仔一輪之後，我行左入新娘房，見到化妝師同詠恩補緊妝。
「…咁遲先離㗎，頭先我啲姨媽姑姐個個都爭住要同你影相呀！」詠恩有啲抱怨，鬼叫我係一個過氣明星咩，都仲有人會想同我影相嘅。
化妝師都好通氣，見到我哋打情罵俏都好識做，唔出聲咁閃走咗。
「…終於有機會同你傾吓計囉！」見化妝師行開咗，我就即時攬住左詠恩，仲摸手摸腳添。
「…喂！啲仔女喺出面隨時會走入嚟㗎！」詠恩有啲緊張咁講。
「…怕咩姐！你以前成日同我講淫人妻女笑呵呵，而家我淫自己妻子咋嘛！冇問題啦！」我一邊講繼續一邊鹹濕詠恩，搞到佢成個人都㷫哂。
「…喂呀！！！好啦好啦！今晚先啦！」詠恩投降，好啦，咁我就放過佢啦，今晚先同佢滿清十大酷刑。
「…新郎新娘，啲賓客到齊㗎啦可以準備出場！」婚禮司儀走咗入嚟通知我哋，於是我同詠恩就準備出場開始我哋嘅婚宴啦。
「…離㗎喇喎！」我拖住詠恩，有啲緊張咁講。
「…離架啦。」詠恩笑住回應。
「…正式㗎喇喎！」我再講。
「…你好無聊啊！」詠恩串緊我，因為佢知道我講緊對白。
「…不如你嗌聲action吖！」我再講。
「action！」詠恩回應，司儀亦都捉緊個時間請我哋出場。
就係咁，我哋就係一片歡呼聲之中出場，沿途仲有馬會職員幫我哋拉響花泡。其實只不過係親戚食飯，都唔使真係搞到咁隆重喇，不過都唔緊要嘅，我見到詠恩個樣非常享受。我哋循例做一啲婚宴儀式，切蛋糕啊…合巹交杯啊，當然唔小得梗係嘴嘴環節啦，詢眾要求…我哋咀咗差唔多成分鐘，啲親戚先捨得收手。
今晚我好開心，我飲咗好多酒，我諗係我一生中飲得最多酒嘅一晚，之後唔知係咪我有啲醉意呢，忽然間想喺咁多親戚朋友面前獻唱返一首喎。
「…各位親戚朋友，酒微菜薄招呼唔到啊！」我異常興奮，開始喺度個人show。
「…見冇咩做，不如送首歌俾大家！」我講，音樂又唔知點解好配合咁突然響起喎，好啦我嘅故事就講到呢度啦，多謝咁多位來賓支持左我咁耐！再見！
完！
https://youtu.be/VPxWRVx59F8
張敬聰 鷹
她的心鐵石那樣無情 即使可惜我始終不吃驚
一顆心鑽石那樣澄明 不必等她說得出口已經
以一個閒盪的心情 縮手 出門 方向未明
抱緊我遊盪的宿命 現在分手可再起程 續集未決定
＊仍然想起她眼睛 仍然跨出這國境
無涯世界這樣闊 還有願望未看清
仍然想睜開眼睛 留神吉川的美景
誰人要埋怨 沒法預計熱戀的壽命
(還能夠微笑 誰人要和我再乾兩杯贈慶)
喜歡她發夢那樣神情 不喜歡她帶憂傷的笑聲
喜歡她正在放任年齡 不喜歡需要當她的棄嬰
我不要如什麼幽靈 苦苦癡纏 不算盡情
我不愛無謂的安定 現在分手不過表情 異樣地鎮定
Repeat ＊
這麼多人貧病照樣過
這麼多人捱餓最慘不過
如愛人不陪我 還能開懷我精彩
Repeat (＊)
完美結局完。