中左六合彩頭獎四千八百萬，依家唔知點算?: 95 手術開始
進入手術室之前，護士帶左我去一間類似檢查房嘅野，交低左啲手術衫褲比我換之後，護士行返入離叫我將身上所有野用一個袋幫我載起，之後就叫我訓上手術床準備推我入手術室啦。
入到手術室護士推我到正中間嘅位置，之後啲護士就喺度開始set野啦。等待期間手術室門口再一次打開，今次到第二個護士推住浠琳入離，將浠琳推左埋我隔離平排咁泊埋一齊。
「浠琳！」我細細聲叫，因為而家嘅浠琳係醒左嘅。
「…聰…爸爸！」浠琳叫我爸爸呀…我係咪發緊夢呀！浠琳第一次叫我爸爸呀！
「…浠琳你知道左拿？」我有啲尷尬咁問。
「…嗯！頭先媽咪同我講左啦！多謝你呀爸爸！多謝你捐個肝比我。」浠琳同我講，搞到我又有啲眼濕濕啦。
「…傻女…我係你爸爸離架嘛，我一定會保護你架！」我感動回應。
「…對唔住呀，咁多年離我都冇好好照顧你。」我有啲內疚咁講。
「…雖然我以前冇爸爸係幾唔開心，但係我知道左原來我有爸爸而且仲係聰哥哥之後，我真係好開心架，我終於可以話比我啲好朋友知我有爸爸啦。」浠琳好開心咁講，睇得出佢係發自內心，小朋友真係天真可愛。
「…嗯！爸爸應承你吖，做完手術之後…爸爸會無時無刻陪住你，我哋一齊開心一齊笑一齊喊…總之我哋以後做乜都一齊！好唔好呀？」我講。
「…嗯！」浠琳笑住點頭。
「…咁我哋一齊努力啦！」我比左個單手握拳頭嘅姿勢佢。
「…好啦！兩位大朋友小朋友！手術要開始啦。」醫生終於都到咗啦，而家所有醫護人員都各就各位。
「…你哋好呀！我係今個手術嘅主診醫生，隔離兩位係xxx醫生同xxx醫生、麻醉師…！」醫生介紹完一輪之後，再簡單講一次手術流程之後呢…麻醉師開始幫我哋麻…醉………啦……………….z………..z……..！
「…可以開始啦。」點解…好似聽到有人講野嘅…
「…咇～」
「…咇～」
「…七點半啦！浠琳起身食早餐…夠鐘返學啦…！」點解…有人叫浠琳起身返學嘅？
「…今日考數學醒神啲呀…！」把聲好熟…但係又唔係詠恩把聲離喎…！
「…啪！」好似係開門聲。
「…咇～！」
「…咇～！」
「…咇～！」
Z……..z……….
咦～呢度係邊度呀？好似係一間私家病房離架喎？有個女仔坐左喺床邊嘅？
「…大佬！大佬你醒拿！醫生！」係阿妹…阿妹好緊張咁叫醫生，到底發生咩事呀？
「…一切正常，冇問題架啦！」醫生檢查完我之後就走咗啦。
「…到底發生咩事呀？詠恩呢？浠琳呢？」我好疑惑咁問阿妹。
「…大佬你昏迷左兩日啦！」阿妹講。
「…吓！我昏迷左兩日？」我有啲驚訝。
「…醫生話手術中途大佬你一度心跳停頓，好彩之後救返你咋，但係你就昏迷左，好彩你都算快醒返姐。」阿妹鬆一口氣講。
「…咁浠琳呢？浠琳點呀？」我好緊張咁問。
「…浠琳冇事呀，你放心啦大佬。手術好成功呀，手術之後浠琳好快就醒返啦，不過恩姐佢…！」阿妹忽然停咗。
「…詠恩做咩呀？」我問。
「…因為大佬你昏迷，恩姐一直都喺床邊擔心你又暈又嘔咁，之後仲暈低埋添。」阿妹講。
「…咁依家呢？」我有啲緊張咁問。
「…啱啱醒返啦，頭先阿媽打離話有醫生同佢檢查喎。」阿妹講。
「…帶我去吖，吖～。」就係咁，我叫阿妹帶我過去搵佢哋啦，雖然傷口仲有啲痛，而且個身都仲吊緊啲鹽水，但心急如焚嘅我又點會肯訓低吖。
「…姐夫！」一過到去就見到小苑，而且四大長老都喺哂度。
「…聰！你醒返啦。」詠恩訓左喺床度好感動咁叫我，睇得出佢身體好虛弱。
「…嗯！一切都過去啦。」我講。
「…浠琳呢？」我再問小苑。
「…浠琳啱啱做完手術無耐要喺深切治療部病房度嚴謹觀察呀，你都係啦…做乜咁快起身呀，醫生話你都要住院一排架喎。」小苑講。
「…得啦…我一陣會返過去，我岬過離睇吓詠思姐！」我講。
「…醫生！」大家講，因為有個醫生行左入離。
「…嘩！你咁快落床，快啲返過去休息呀。」醫生見到我有啲驚訝，仲鬧鬼我添。
「…我睇一睇我老婆就返過去架啦。」我笑笑口講。
「…醫生我個女冇乜野吖嘛？」外母問。
「…你個女有野喎！」醫生望住份報告講。
「…吓！咩…咩野呀？」大家都好驚咁問。
「…恭喜你個女有左呀！」醫生笑笑口講，吓…詠恩又有左？
「…吓！」全部人都打咗個特，好驚訝咁望住我，咪住先我都唔知架喎…！
「…無錯呀，頭先檢查果陣同你個女做左超聲波，你個女已經懷孕十週！」醫生將超聲波相交左比外母。於是我地就圍哂埋去睇啦。
不過張相呢…其實暫時只係見到豆豉咁細粒，所以都冇乜野睇到。我望一望詠恩…佢竟然坐左喺張床度偷笑喎，好明顯佢係一早知道架啦。
「…你一早知架！」我行左埋床邊細細聲問。
「…知左唔係好耐架咋，因為呢排成日都想嘔，所以我之前買左驗孕棒驗！」詠恩有啲尷尬細細聲咁講。
「…唔通係…喺雪山果陣？」我恍然大悟，計落時間相當吻合，冇錯應該係喺雪山果次，估唔到咁易中架…又一擊即中！
「…嗯！應該係…！」詠恩面都紅埋，點一點頭。
就係咁…大家都喺一片歡笑聲中度過。同詠恩佢地傾完一輪之後，我好快就走返過自己病房休息，因為其實我捐完個肝都要留院觀察兩星期架，所以我頭先算係偷偷地落床架咋。
之後嘅日子相對平靜，每日詠恩都會離探我，煮飯比我食。同我講吓浠琳嘅近況，因為我唔行得過去睇佢，所以要靠詠恩講返比我聽，聽詠恩講…浠琳情況相當穩定，已經由深切治療部轉左去肝臟移植中心嘅普通病房啦。再過一排就可以出院啦，置於我呢…都係一樣啦，情況相當穩定，而且捐贈者本身就係唔需要休息咁耐嘅，咁所以呢…今日我就可以出院啦。
一早護士就入離幫我循例做咗一啲基本檢查，之後叫我換返自己嘅衫等醫生離我就可以走啦。
「…老公！」詠恩亦都好準時離到，依家照舊拎左啲飯餸出離比我食。
「…就走得架啦喎！」我講。
「…橫掂都煮咗啦，食埋先走囉。」詠恩一邊講一邊整理緊枱面，於是我就開始食飯啦。
「…浠琳今日點呀？」食緊果陣我問。
「…ok呀！已經可以坐喺床度啦，不過醫生仲係唔比佢落床住，不過浠琳都好聽話，唔會扭計。」詠恩講。
「…哈哈～真係好想見吓個女！」我笑笑口講。
「…乜…淨係想見個女咋？」詠恩忽然陰陰嘴笑。
「…你講咩呀？」我有啲疑惑。
「…嗱～」詠恩拎左張超聲波相出嚟比我睇。
「…呢張相好似係我哋個B張超聲波相離？」我諗左一陣有啲疑惑咁問，因為張張超聲波相都差唔多㗎啦。
「…嘻嘻…係我地個B，不過唔係你之前睇果張…！」詠恩繼續奸笑。
「…即係…？」我打左個問號。
「…張相琴日去產檢嗰陣影㗎，已經三個月啦可以睇到BB嘅性別，醫生話係仔嚟㗎！我地而家除咗有個女之外，仲多咗個仔呀！」詠恩好興奮咁講。
「…真係架！」我亦一樣，開心到即刻摸住詠恩個肚。
「…BB，我係爸爸呀！」仲張隻耳黐咗埋詠恩個肚度。
醫生好快就離左，攞左啲文件離比我簽左之後，我就同詠思一齊出院啦。出院做啲乜？緊係第一時間去睇吓我個寶貝女啦。一出病房門口我就即時衝左過浠琳果邊…！一入到去…就見到浠琳坐左喺病床上面玩緊電話！
「…浠琳！」我大叫。
「…爸爸！你出得院拿？」浠琳見到我好開心咁回應。
「…係呀！爸爸冇哂事好返晒啦！」我谷左隻老鼠仔出離。
「…你都要快啲好返呀！」我再講。
「…嗯！」浠琳點頭。
「…淨係聽哂爸爸話，咁媽咪叫你玩小啲電話你聽唔聽先。」詠恩講。
「…嘻嘻～玩一陣咋嘛！」浠琳伸左條脷出離。
「…玩完記住做功課同溫書呀！」詠恩喺個袋度拎左啲功課出離。
交底功課之後，我就同詠恩離開醫院啦。落到樓下…原來詠恩已經叫定左車，於是我哋就一齊上車啦。
「…車我去邊先！」上車冇耐…我就笑笑口咁問詠恩。
「…老爺話要幫你洗塵喎，依家已經喺屋企等緊我哋架啦。」詠恩講。
「…嘩！幾時開始識叫老爺架！」我笑緊詠恩，因為我住院呢兩個星期老豆都冇離睇過我，好似話忙緊公司上市啲野，阿媽就會間中跟埋詠恩一齊上離，估唔到佢哋啲關係都搞得唔錯喎。
「…咪住先…返屋企唔係應該西環果邊近啲咩？點…點解落域多利道呀？」我有啲疑惑咁問，因為返將軍澳正常行西廊、灣仔繞道過東隧架嘛…無理由會行沙宣道落域多利架？