中左六合彩頭獎四千八百萬，依家唔知點算?: 89 舊公司
「…嘟嘟～～」我拎起咗個電話打。
「…喂！」小苑接聽左，無錯呀…好緊要嘅野就係打比小苑啦。講真依家佢真係我了解詠恩近況嘅唯一渠道，所以唔搵佢都唔得啦。
「…喂！搞緊咩呀？」我問。
「…食緊飯！」小苑答得好含蓄，好似唔敢亂講野咁。
「…屋企？」我再問。
「…係！」小苑回應。睇離佢都好驚比詠恩知道喺我打離。
「…轉頭覆你啦Mabel！」小苑再講。
「…哦！咁你一陣打返比我啦。」我都醒水，好快就收咗線。
「…嘟嘟～～」過左十分鐘左右，小苑終於都打返過離。
「…喂！」我接聽左。
「…想死呀！頭先差啲比家姐聽到你把聲呀。」小苑講。
「…我點知姐！」我無奈回應。
「…點呀！咩事？」小苑問。
「…你家姐…依排點呀？」我戰戰兢兢咁問。
「…冇點喎，同平時完全冇分別！」小苑回應。
「…咁神奇？」我驚訝回應。
「…咁佢有冇返新工？」我再問。
「…咁又冇喎，依兩個禮拜都喺屋企做家務同多左時間陪浠琳同佢溫書果啲。」小苑回應。
「…哦！咁都好啲！」我講。
「…其實好地地點解會無啦啦又同家姐搞成咁架你？」小苑好奇一問，於是我又將燒嘢食果晚嘅事發經過再講一次比小苑知。
「…嘩！你果個前度女友都幾激架喎！」小苑回應。
「…唉…咁都唔關我事架！冇理由要嬲我架嘛！」我無奈回應。
「…喺我地女人嘅角度就緊係你錯啦，一早就應該劃清界線，咁先係皇道呀。」小苑理直氣壯咁，乜真係我錯咩？
「…咁就算係我錯，都唔洗反應大到即時斷絕來往掛…！」我無奈回應。
「…唉！你知我家姐情緒一向都唔穩定架啦，條頸又好似搽咗印度神油咁，硬到冇人有嘅，咁你諗到點補救未吖？」小苑問。
「…有架！」我回應。
「…係點呢？」小苑問。
「…我作左首歌比佢！」我講。
「…吓…搞邊科呀？」小苑一頭霧水咁款，於是我又將我寫歌諗住喺演唱會唱呢單野講一次比小苑聽啦。
「…er …聽落就好似好有計咁，但我都唔知我家姐受唔受依套架喎！」小苑有冇疑惑，可能佢感受唔到有人寫一首歌比佢嗰種浪漫啦。
「…點都好啦，呢個重任就交比你啦！」我用哀求嘅語氣講。
「…吓！又係我？」小苑無奈回應。
「…我唔靠你仲可以靠邊個吖，況且你都想你家姐幸福㗎！」我講。
「…咁…咁又係。」小苑回應。
「…拿！咁啲飛我聽日就攞比你架啦，記住用盡你嘅方法令詠恩離睇演唱會呀！」就係咁，小苑就無奈接受左呢個咁艱巨嘅任務啦。
到左第二日，我朝早如常返老豆公司幫手送貨，但係今日竟然有啲貨係送去我舊公司位於柴灣嘅果幢工廠大廈。唔知點解呢…咁耐冇返過去，揸返住部貨van過去，個感覺好特別。我將部車泊左喺工廈門口，之後攞住啲貨慢慢咁推入大堂。
「…嘩！好耐冇見你啦喎！」一個熟悉嘅保安員叔叔一見到我就好興奮咁講。
「…哈哈…係呀！」我笑笑口回應。
「…做乜推住啲貨嘅？你唔係喺電視台唱歌架咩？」阿叔再問。
「…哦！間中會幫老豆間舖車吓野咁囉！」我回應，其實個保安員叔叔都見左好多年吓架啦，但係就真係噏唔出叫咩名，諗落都真係有啲慚愧。
吹左幾句之後，佢竟然要求同我合照喎，做左歌手咁耐好似都係第一次咋！個感覺有啲怪怪地咁。佢影其他幾個保安員又跟住影，真係瘦田無人耕，耕開有人爭。
上樓送完貨之後，我諗住走左落舊公司行個圈，睇吓佢哋近況如何。我一落到工場門口，就見到一個做後期製作嘅舊同事肥Ken坐左喺門口啲櫈度hea緊。
「…咦～聰！做乜返離嘅？」肥Ken有啲驚訝。
「…係呀，去開呢頭咪上離睇吓你哋囉！咁得閒嘅…？」我問，其實肥Ken同我又唔係話真係好熟嘅，因為我本身係送貨，而佢就係喺工場做後期製作咁所以平時都唔係太多時間會見到，見到吹兩句通常都趕住出車架啦。
「…公司生意唔好吖嘛，cut左好多人架啦！」肥Ken回應。
「…係牙？」我回應。
「…上面跟單cut左兩個，司機cut淨一個！」肥Ken講。
「…跟單cut左邊兩個呀？」我問。
「…cut左carol同yuki囉！」原來carol比人炒左。
「…carol都cut埋？」我講。
「…咪係囉，你知carol一個人冇人冇物架啦，自己一個人住劏房，條仔又唔搵得多，仲話想儲錢結婚，點知依家比人炒埋，連交租都成問題！」肥Ken詳細講述。
「…咁淨返邊個司機喺度呀？」我再問。
「…冇喎，依家個司機新離你唔識架啦，阿占比人炒左之後，阿榮好快就辭職唔做啦，好似話想專心踩板希望可以去到東京奧運喎。」肥Ken回應，原來阿占比人炒先嘅，而阿榮就自己唔做走去踩板，藝術家真係藝術家，踩板可以當飯食架咩？
「…咁生哥呢？」我再問。
「…生哥喺入面，依家要自己落手落腳做架啦佢，你洗唔洗入去搵吓佢吖？」肥Ken問。
「…唔…唔好啦，費事阻住佢做野啦，我都趕時間啦，走先啦，係咁先啦，下次再講啦！」就係咁，見有𨋢我就轉身即走啦，講真入去見到生哥都真係唔知講咩好，真係唔見好過見。
唉…原來我走左之後，大家都各散東西，忽然間有啲唏噓同埋坎坷。點都好啦…既然已成事實就唔好諗咁多啦，應該積極面對，放心啦…遲啲我一定會補償返佢地。
離開左柴灣之後。我揸左部車落太古城，落太古城做乜？當然係搵小苑啦，可能太耐冇提過，大家都唔記得左小苑係喺太古城返工。我泊好部車之後就行過去小苑返工嘅果間舖頭啦。
「…隨便睇睇隨便揀！」離遠已經見到小苑企左喺門口附近叫賣緊。
「…有冇折架！」我講，之後小苑就擰一擰頭過離啦。
「…有呀五九折。」小苑用玩野嘅語氣黑面回應。
「…做乜食左火藥咁呀？」我笑笑口問。
「…唉…成朝都未開到單你話呢！不如真係幫襯買返啲野啦。」小苑回應。
「…好！睇吓囉。」就係咁，我就入咗去睇吓有啲咩啱買啦。
其實小苑做呢間舖啲衫都ok嘅，小苑捉住我比左好多款我試，最後我都買左唔小野。睇佢個樣開心到呢，同中左六合彩冇分別，佢啲同事都開始對我議論紛紛，又問小苑係咪識我又盛咁，小苑開頭都唔想講架啦，但佢啲同事問多兩問，最後小苑係話我係佢姐夫嘅。佢啲同事聽完都相當驚訝，因為Suppose我係單身人士，不過唔緊要啦，I don’t care！
買完野之後因為小苑放飯，於是我就同小苑去左佢成日去果間cafe食午飯啦。
「…拿！」食緊果陣我張兩張演唱會飛交左比小苑。
「…就係呢兩張野牙！」小苑接過啲飛。
「…就係呢兩張囉，點呀…諗掂點比你家姐未呀？」我回應。
「…未喎，是但啦，緊有方法嘅！」小苑hea我。
「…盡盡力好喎！」我有啲埋怨。
「…得啦得啦，總之我死都同你死掂佢啦。」小苑回應。
就係咁，所有野都押哂落小苑身上啦，只許成功不許失敗，希望佢真係可以完成任務啦。
同小苑食完飯之後，我就揸左部貨van 返舖頭。今日舖頭好忙呀，可能就過年啦，好多人都趕住造傢俬。我下午都冇放到假，繼續幫手清下啲貨單，聽東哥講呢…公司好似已經準備緊上市嘅野啦，聽到呢個消息真係又驚又喜，點講呢…公司上市可以越做越大就緊係開心啦，但係如果到時要我接手嘅話，我真係驚我應付唔離。
收工返到屋企，我繼續坐喺電腦前面睇吓份歌詞仲可以點修改，第二段頭果兩句硬係格格不入咁，填極都係好怪咁。放空一陣無聊望吓Facebook，竟然見到思敏出post喎。自從燒嘢食事件之後呢，思敏個專頁就停咗落離啦，一直都冇見過佢出任何嘅post同留言，忽然出post唔知到底想講咩呢？
「…大家好！（大食懶花花花）要同大家暫告一段落啦。由於本人近排好忙冇時間再打理專頁，希望日後可以繼續帶大家周圍去食好野啦！」乜話…原來係要摺埋個專頁牙？我係咪應該去關心一下佢呢？但係咁樣會唔會好似上次咁又比返個假希望佢架？諗諗吓都係唔好搞咁多野啦，專心啲繼續造好我嘅音樂啦。