中左六合彩頭獎四千八百萬，依家唔知點算?: 78 上雪山

我一早起身就出發打車去我嘅目的地。喺國內叫車真係好方便，一個app幾分鐘就有車。因為地方大嘅關係，基本上人人都會自己揸車，而我因為冇攞國內車牌，加上唔熟國內嘅關係，唯有叫車出入。

「...你好，是不是要上仙女山滑雪呢？」（國語） 上車後，司機禮貌地問我。

「...對呀，麻煩你了！」（國）我禮貌回應。

就係咁，我就踏上左呢個放假嘅滑雪旅程啦。其實唔知點解心血來潮琴晚忽然間就想滑雪，但係其實我係未滑過雪，根本就唔識滑雪，不過我溜冰，同埋玩滑板都唔錯，所以…嘻嘻…應該冇問題掛。
我哋部車首先由重慶市中心行高速去到武隆區，原來比我想像中更加遠，因為大陸真係好大，由市中心去到武隆全程高速都用左成兩個鐘，到左武隆區之後，沿途白濛濛一片，部車開咗半個鐘頭之後，周圍嘅建築物開始稀少，兩邊全部都係樹，周圍白濛濛一片，開始慢慢進入上山路段啦。

司機同我講，因為今日係平日，所以交通先咁暢順，如果假日離嘅話塞車都塞你幾個鐘喎。





就係咁，同司機有傾有講咁，兩個幾鐘嘅車程出奇地又唔覺得好耐咁喎。坐到囉柚都痹埋終於都去到我嘅目的地，仙女山滑雪場啦。

司機車到我去一個寫住「戶外活動中心」嘅大門口，放低左我之後就開車走左。於是我就一條友懷着浪蕩嘅心情咁行入去啦。依度真係大到離哂譜，我諗分分鐘有成個香港島咁大，因為依度好似係一個國家級嘅森林公園離，今日係平日，遊人都比較疏落，但係門口依度人流都係有嘅。


「…你好！請問有什麼可以幫忙嗎？」（國）一個穿著整齊制服嘅女工作人員，走左埋離問我，我表明來意後，佢就帶左我去櫃檯度買票入場啦。途中啲職員都相當有禮貌，問左我好多問題，又會問你嘅滑雪程度，為咗唔想比佢哋繼續煩住，我講左個大話，話自己係高手，所以叫佢哋唔洗理我，最後佢哋當然係冇再理我啦，好快就攞左滑雪裝備就進入左滑雪場入面啦。

一入到去，其實都真係分唔到到底係入面定出面，因為同門口出面一樣係大到離哂譜嘅，分別我諗就係入面比較空曠啲，但望到去遠處嘅地方就係密麻麻嘅森林根本就望唔到盡頭，點都好啦…既然離到就唔好諗咁多啦，一於盡情享受啦。





換好滑雪裝，攞埋滑雪板，我就跟住指示慢慢咁行出去啦。一開始呢…其實都真係比我想像中難，有小小不受控制咁…，不過可能我天份高啦，哈哈…（講笑），練習左20分鐘之後就開始掌握到個竅門啦，再望望左右隔離，全部都係滑到識飛嘅高手咁濟，鬼咩…緊係因為我頭先同果啲工作人員講話自己識滑，人地就安排左我去個高手區比我啦，完全都唔見有新手同埋一家大細號遊客喺度，不過都好嘅，好處就係人小啲，滑得相當舒服。

我喺附近慢慢兜圈，欣賞沿途美麗嘅風景，周圍白濛濛一片，就好似去左歐洲嘅雪山一樣咁靚。玩到下午兩點零鐘左右，我就返左去遊客中心果度附近搵野食啦。依度呢…真係好多野食，好多麻辣野，我叫左一碗羊肉煲，真係超級好味，又辣又麻，羊味又勁香，食到停唔到口。


「…～仍然想起她眼睛～～仍然跨出這國境。」電話響起，竟然係詠恩。

「…喂！咁得閒呀。」我接聽左。

「冇乜客吖嘛，咪打比你睇吓你做緊乜囉。」詠恩回應，聽語氣佢心情好似唔錯。





「…因住比東哥捉到你（吞噗）呀！」我回應。

「…東哥不知對我哋幾好呀，自從東哥離左之後，大家都融洽左好多，冇哂以前果啲辦公室政治啦。」詠恩開心回應。

「…咁咪好囉。」我hea回。

「…咁你呢，做緊乜野呀？琴晚好似聽到你話今日放假架喎？」詠恩問。

「…係呀，今日同聽日都放假，所以我上左附近嘅雪山滑雪囉。」我回應。

「…吓！滑雪？」詠恩有啲驚訝。

「…係呀，去左一個叫做仙女山嘅雪山，依度啲風景好鬼死靚囉，啲野又勁好食，下次帶你離食吖！」我講。





「…講呢啲…，不過香港依邊都開始凍啦，你果邊應該凍到死。」詠恩回應。

「…凍係凍嘅，但係又唔係話凍到好辛苦果隻，感覺同香港差唔多，可能依度全部室內地方都有暖氣掛，所以真係唔係好覺凍。

「…玩還玩…小心為上呀，知唔知呀！」詠恩關心回應。

「…知道啦！」我亦都一樣，答得好sweet，其實依排我晚晚同詠恩傾電話已經好似一齊返咁，爭在未有一個擁抱。

食完飯之後，我休息左一陣就再一次進入滑雪場啦。有左頭先嘅經驗，我已經掌握左滑雪嘅基本技巧，今次一於向高難度挑戰。同頭先一樣，我進入左高級滑雪區域，而且我今次仲走得好遠，離開左遊客中心之後就一直滑入去森林區域。穿入森林後，雖然仍然有滑雪道同清晰指示，但係要係茂盛嘅大樹間穿插，彎又急，真係非常之考技術。

「…～仍然想起她眼睛～～仍然跨出這國境。」電話又響起。

「…喂！」我用耳機接聽左。

「…又係我呀！」竟然又係詠恩。





「…咦～咁快掛住我拿，唔洗做咩？」我問。

「…嘻～掛你個頭呀！」詠恩笑住講，聽得出佢真係比我講中左。

「…今日收早呀我，依家準備走人。」詠恩再講。

「…咁正牙，收早，有啲咩搞呀？」我問。

「…冇乜野呀，咪返屋企煮飯囉。」詠恩回應。

「…咁嘈嘅你果邊，好大風聲！」詠恩反問。

「…滑緊雪吖嘛。」我回應。





「…滑緊雪你仲傾電話，得唔得架。」詠恩有啲責備咁講。

「…我用耳機架嘛，放心喎。」我讕係勁咁回應。

「…喂！….　～吖！」我大叫，真係型到盡頭便是七…，話口未完我真係出事，跣一跣腳，成個人拋左出滑道！穿過樹叢…然後…….

「…嘭～～～！！！」我應聲倒地，之後……

………..

..

…..

「…呼～呼！」原來我暈左，到我醒返已經係唔知幾耐之後嘅事啦。





「….有冇人呀！！」回過神後，我四周圍觀察左一陣，之後大聲呼叫，但係叫左幾分鐘都未有回應。

我停左落離，開始回想起頭先到底發生左啲咩事。我記得…我同詠恩傾緊電話，之後跣腳…失重心…之後就飛左落嚟依度啦。

係啦…我部電話呢？

我周圍搵左一陣都未見蹤影，我依家身處嘅地方係一個山窿，嚴格離講係一個凹陷左嘅窿，直徑大約係一部巴士咁長嘅一個隆，其實唔係好凹，只係高過我視線半米左右，但係周圍都係雪，我根本搵唔到一個可以爬得到上去嘅落腳點，而且我嘅視線受阻，無辦法望到上面，而上面如果唔係好近嘅話亦都唔會留意到我嘅存在，喺咁嘅情況可以話係叫天不應叫地不聞。

天色開始黑啦，計返我應該都有暈左幾個鐘頭，再係咁落去就更加難搵到幫手，點算好呢？雖然只係暈咗幾個鐘，但係我嘅感覺就好似困左喺度幾個月咁耐，依度雖然未到伸手不見五指嘅程度，但係依度係森林區周圍都係密密麻麻嘅樹，就算附近有燈都唔係幾照到我依個位，電話又唔見左，依度除咗雪就乜野都冇，唔通…我真係要死喺呢度？

我開始嘗試徒手挖開啲雪，睇吓清走部份積雪之後，會唔會搵到可以攀爬嘅借力點。我掘呀掘、掘呀掘…掘完左邊掘右邊，唔經唔覺又過左一個鐘左右啦。周圍嘅天色已經完全黑晒，我開始感覺到好攰…好肚餓，全身乏力咁。我慢慢停咗落離，挨左喺我掘起嘅一堆積雪度，十隻手指頭都凍到無哂感覺啦，依然係徒勞無功，啲積雪根本就深不見底，無可能清得開。

我又休息左一陣，體力又開始恢復左啲。我企左起身又兜左一圈，之後望返住我啱啱挨住嘅果堆積雪，忽然之間諗到另一個辦法！

於是我又開始掘啦，我一下一下咁掘，今次我嘅目標唔係要將眼前嘅無限積雪清走，而係要用雪堆一個斜坡出離。靈感來自我挨住嘅果堆積雪，我喺度諗雖然啲雪清唔走，但係我可以用離堆起佢，形成一條斜坡之後我咪可以沿住條斜路行返上去囉。有左目標之後，我就更加落力掘，掘到我都唔知道時間啦，最後我又用左三個鐘頭嘅時間，終於堆到一個好似小山丘嘅斜坡出離。我戰戰兢兢咁踏左上去，我好慢好慢，一邊保持平衡，一邊四腳爬爬咁，爬上去……

終於…終於我都爬到返上去，但係….

上到去依然係白濛濛一片，而且四面都比樹包圍住，我到底行邊一邊好呢？

冷靜啲…組織吓先，我係離遠飛落頭先個窿度嘅…咁我應該只要向個窿嘅相反方向就可以返返去我原本嘅地方啦？

於是我向住相反方向開始行啦，唔知係咪跌落個窿果陣有少少拗柴嘅關係呢。行左三十分鐘左右，我開始越行越慢…加上冇食過野…體力不計…我…我…似乎…

似乎要再…..

再…一次….

暈低啦…….

Z……..z……..

「….聰！」點解…點解有人叫我嘅，唔通我又發夢？

「…聰呀！你應吓我啦！」好似係詠恩把聲離喎，睇嚟我開始有幻聽啦。