中左六合彩頭獎四千八百萬，依家唔知點算?: 76
「...乜...你知ivy住邊咩？」開左車一陣，詠恩忽然問我，因為阿妹一上車就訓著左，仲好似自己屋企咁，將個坐位校到水平咁成個人訓平喺度。
「...知...！」我低調回應。
之後都冇乜點出聲講過野，因為一路揸車一路就諗緊到底點拆，諗到個人入哂神咁，唔經唔覺好快就到左屋企樓下啦。詠恩同我一齊扶住阿妹，慢慢咁行入電梯大堂。
「...張生返離拿！」大堂保安幫我開門。
「...唔該。」我回應，見到詠恩個樣有小小奇怪嘅眼神，好似諗緊點解個保安會識我咁，但係都唔理得咁多啦，好快就上到去屋企門口啦，因為時間都唔早啦，我知阿媽應該已經訓左，老豆亦未必喺度，所以我自己用密碼開左度大門入屋。
「...嚓～」我單手細細力推開度門，另一隻手就同詠恩一齊扶住阿妹入屋。
「...點...點解...你知密碼開門嘅...！」入到屋之後，詠恩好疑惑咁細細聲問我。
「...！」我冇出到聲，一手抱起左阿妹抱左佢入房處理好阿妹先，之後再施施言咁行返出離。
「...喂！你好講啦！」詠恩個樣有小小嬲。
「...講乜野姐。」我繼續回備，一邊答一邊行左去廚房開咗罐可樂飲。
「...點解知密碼？點解保安會識你？點解好似好熟依度咁？」詠恩一輪咀咁開始質問緊我，就好似女朋友質問緊男朋友咁，果種感覺其實又幾開心架喎。
「...因為...！」我講到依度又飲左啖可樂。
「...因為乜呀？」詠恩有啲焦急繼續追問。
「...因為依度係我屋企囉。」我老實作答，因為都唔知仲可以點兜啦。
「...吓！」詠恩呆左，個樣好似有啲驚咁。
「...你...你想點呀？」詠恩口都震埋，好似好驚訝咁。
「...咩野想點呀？」到我有啲疑惑。
「...ivy！」詠恩忽然大叫。
「...喂！」我撳住左佢，因為驚佢會嘈醒阿媽。
「...ng...！」我依家從後一手攬住左詠恩，另一隻手撳住左詠恩個口搞到佢出唔到聲。
「...喂，做乜呀你？會嘈醒哂全屋人架。」我喺詠恩耳邊細細聲講，然後慢慢放開左佢。
「...你做乜帶ivy去你屋企喎，你同佢乜嘢關係姐，你唔講清楚我係唔會比ivy留喺度嘅！」詠恩有小小嬲咁，一定要我講清楚，可能佢驚我會搞阿妹啦，所以想確認吓我哋到底係咪情侶關係。
「...唉...！」我歎左一口氣。
「...你跟我離啦。」之後帶左詠恩入去我間房。
「...！」詠恩唔出聲咁跟住我。
入到我房，佢四圍望緊，可能覺得好有新鮮感啦，但係我冇理到佢，自己一個行左去書櫃果邊。
詠恩由頭先有啲嬲咁嘅樣，慢慢變到好懷緬咁嘅樣，因為我房入面仍然留左好多同佢一齊果時嘅物品喺度，佢送比我嘅風褸啦、同佢一齊影嘅相，我都放哂出離，嘻嘻～其實最近我先放返出離嘅，詠恩睇到眼都定埋，已經唔記得左係要入離質問我。
「...睇咩呀！」我問詠恩。
「...冇...冇野呀...！」詠恩定一定神答我。
「...拿！」我將手上嘅一本家庭相薄遞左比詠恩。
「...咩離架！」詠恩好疑惑咁問。
「...打開佢睇吓！」我再叫，於是詠恩就開始一頁頁咁睇啦。
「...做乜比啲家庭相我睇呀？」睇左幾頁之後，詠恩仲係一頭霧水咁。
「...記唔記得佢呀？」我指住其中一張有阿妹份嘅相，張相大約係我同詠恩一齊緊果段時間影嘅。
「...依個...好似係你個妹。」詠恩依稀記得。
「...再睇清楚啲！」我講。
「...咩喎！」詠恩再望，今次佢望左半分鐘。
「...咪你個妹囉！」但係詠恩仍然係唔認得阿妹，乜佢個樣真係變左好多咩？點解我唔覺嘅。
「...er...咁依張呢？」今次我搵左張兩三年前嘅全家合照。
「...咪又係...」講到一半詠恩停咗落離，開始意識到張相有啲古怪啦，依家睇到入晒神咁。
「...吓...乜...乜原來...ivy就係你個妹牙？」詠恩終於都估到啦，真係蠢蠢地...唔怪得成日比我呃到啦。
「...咪就係囉，唔係你以為我點解要帶佢返屋企啦？」我反問。
「...咁...我點知姐。」詠恩有啲尷尬，但之後面容變返開心，有小小嘴角含春咁。
「...點...點解唔早啲講姐！」詠恩反問。
「...你又唔早啲問？」我再反問。
「...玩野咩你！」詠恩瞇起對眼，鄙視緊我。
「...哈哈～講吓笑姐，唔講邊有得笑呢！」我冷笑回應。
「...一啲都唔好笑囉！」詠恩回應，但係笑笑口咁講，睇得出佢之前嘅苦惱一掃而空。
就係咁，解答完詠恩一一嘅疑問之後，我就落樓開車送詠恩返屋企啦。
「笑乜呀你？」開車無耐我問詠恩，因為一開車條友就開始笑笑口咁，唔知諗緊啲乜。
「...笑你囉！」詠恩笑住講。
「...我有啲乜咁好笑？」我再問。
「...ivy係你個妹呀...一早講咪得囉，洗乜遮遮掩掩喎！」詠恩笑住講。
「...吓...！」我回應。
「...吓乜野姐，定你有啲乜野不可求人嘅秘密先？」詠恩繼續笑笑口咁，好似放鬆左好多咁。
「...痴線...緊係唔係啦，只係費事麻煩姐，你知我係天王巨星離架啦，萬一啲同事知道ivy係我個妹煩住佢要問我攞簽就唔好啦。」我搞左個爛gag，講左一堆廢話。
「...哈哈～天王巨星！」詠恩笑到收唔到聲，好似比人點左笑穴咁，我哋開始傾好多無聊野，就好似返返去我哋啱啱一齊果陣時咁。
歡樂嘅時光過得特別快，我哋講吓無聊iq 題咁，話咁快就已經去到詠恩屋企樓下啦。
「...張生、陳小姐，咁夜嘅？」保安蓮姐笑笑口咁開門比我哋。
「...唔該蓮姐！」詠恩竟然主動打招呼，入到大堂入面，詠恩仲繼續講緊佢果個終極爛gag。
「...喂！有條大白鯊食左啲紅豆，之後會變做乜野。」喺𨋢入面詠恩繼續發功，可能佢頭先都飲左小小酒，所以都比較興奮。
「...搞唔掂喎，你啲問題一條比一條爛嘅！」我回應。
「...嘻嘻...你唔好理！快啲答！」詠恩笑住回應。
「...咦～咦～估死人咩。」佢hea問，而我又hea答。
「...考起你呢，會變成「紅豆沙」呀，哈哈～哈哈～咁都唔識！」詠恩自問自答，講吓講吓就到左詠恩屋企門口啦。
「...哈...！」詠恩慢慢將音量收細，緩和返興奮嘅情緒。
「...傻妹！到你屋企啦。」我講。
「...聽日見啦。」詠恩笑笑口，揮揮手咁講。
「...聽日我返大陸啦，傻妹！」我回應。
「...係...係喎。」詠恩由頭先興奮一時間變返失落。
「...做咩呀？掛住我咪打電話比我囉。」我笑笑口當講笑咁講。
「...無...無聊！」詠恩尷尬回應。
「...好啦，我真係走啦，下次見面...可能已經係幾個月後嘅事啦，你真係冇野要同我講？」我好認真咁問。
「...咁...祝你一帆風順囉。」詠恩有啲敷衍。
「...咁敷衍架。」我不爽回應。
「...咁...萬事小心啦，做野還做野，唔好捱壞身體。」詠恩今次認真好多，眼神中亦都睇得出佢對我嘅關懷。
「...冇拿？」我問。
「...冇啦。」詠恩回應。
「...我有喎。」我講。
「......！」詠恩好專心而我就deadair 左一陣。
「...有冇聽過一段經典對白呀？」醞釀一輪之後...我問。
「...乜..乜嘢對白呀？」詠恩有啲疑惑。
「... 曾經有一份至真嘅愛情擺喺我面前，我冇珍惜。到冇咗嘅時候，先至後悔莫及。塵世間最痛苦，莫過於此。如果個天可以俾個機會我返轉頭嘅話，我會同個女仔講三個字：我愛你。如果係都要喺呢份愛加上一個期限，我希望係...」
「...一萬年！」我好認真咁對住詠恩講出星爺嘅經典對白，今次可以話係我對詠恩嘅第一次示愛。
「....！」詠恩deadair 左，個頭dup低左小小，我都睇唔清楚佢而家嘅表情，只係聽到佢呼吸聲比頭先急速，同埋有小小索鼻水嘅聲。
「...哈哈～我講對白係咪收放自如呢，練左好耐架啦，今日講住咁多先啦，我都要返去沖個涼，走先啦...byebye！」見詠恩deadair 左成分鐘，始終都係冇反應，我唯有自己打完場，面懵懵咁講完堆野之後，就轉身入返部𨋢走啦。
或者依個係我欠詠恩嘅一個承諾啦，因為諗返起我同佢一齊嘅時候都好似冇同佢講過「我愛你！」，事隔左咁多年先講，起碼都好過冇講掛。
返到屋企梳洗完之後，我攤左上床。諗返起依幾個月離同詠思做同事嘅生活，就好似發左場夢咁。坦白講...到依一刻我都真係仲未接受到聽日開始要離開詠恩…離開公司依個事實。但係...難得有機會可以令我嘅演藝生涯，唔洗咁快胎死腹中，我亦都冇理由唔去試吓。而家唯有望...去到大陸一切順利可以早日返香港啦。