中左六合彩頭獎四千八百萬，依家唔知點算?: 75
伯母幫詠恩抹吓塊面，之後再扶左詠恩入房。眼見詠恩阿爸應該唔喺屋企，小苑亦都係，而浠琳就應該喺房訓緊覺。
「...飲杯茶先啦！」伯母安頓好詠恩入房之後，就行左入廚房沖左杯熱茶比我。
「...吖...唔該伯母！」我有啲緊張咁起一起身接過熱茶。
「...我認得你！」我飲緊茶果陣，伯母眼定定微笑咁對住我講，個樣相當慈祥，令我緊張嘅情緒都舒緩返唔小。
「...唔...？」我望一望佢。
「...做電視果個吖嘛！」伯母再講。
「...嘻嘻...係呀...伯母。」我笑笑口回應。
「...阿恩好耐都未試過咁開心啦。」伯母有感而發。
「...嗯...係咩？」我問。
「...點稱呼你呀？」伯母問。
「...吓...er...叫我阿聰得啦。」我緊張回應。
「...哦...阿聰牙，阿恩都咁大啦，識個男朋友都正常嘅，但係我想你有個心理準備。」伯母好認真咁講，搞到我鬼死咁緊張。
「...吓..咩野呢？」我疑惑回應。
「...你...應該知道阿恩佢有個女架啦？」伯母忽然問。
「...吓...er...知道嘅！」我回應。
「...唔好怪伯母咁直接啦，雖然男人都唔會想做人後抵公，但係如果你同得我個女一齊，對佢係認真唔係玩玩下架呢，我都好希望你對佢好之餘、都會對埋佢個女一樣好，唔知阿聰你可唔可以應承伯母呢？」伯母好認真咁問左我一個咁嘅問題。
「...放心啦伯母，我對詠恩係認真絕對唔係玩玩下，而且我亦都好錫浠琳會當佢係自己個女一樣！」嘻嘻...浠琳根本就係我個女，我點會唔錫先得架，伯母你諗多左啦。
「...你咁講我就放心啦，見到阿恩佢難得咁開心，我都希望你會比到多啲開心佢....係呢...」伯母問左我好多問題，一啲家庭背景呀，點樣識詠恩呀咁，當然我修改左小小只係話我係詠恩公司同事，而冇交代我哋之前嘅歷史。
伯母聽完之後都幾滿意，可能佢聽到我話我老豆係開公司做老闆覺得有能力照顧詠恩兩母女掛。比伯母問完一輪話之後，我終於都甩到身返屋企沖個靚涼、換件靚衫啦。
梳洗完一輪之後，我攤左喺張床度，開始回味返頭先喺後樓梯嘅情景，果種心跳回憶，係至今未曾感受過，連之前同阿瑜一齊果陣都冇依份感覺。最後要到凌晨兩點幾我先訓得著。
第二日我照常返工，一返到公司...詠恩就即刻行左埋離！
「...早晨！」我講。
「...早晨！」詠恩尷尬回應。
「...係呢...我想問....」詠恩有啲疑惑咁問我。
「...問咩呀？」我微笑回應。
「...我琴晚...係點樣返屋企架？」詠恩有啲尷尬咁問。
「...吓...你全部都唔記得哂牙？」我扮哂驚訝咁講。
「...做...做咩野喎！講啦...我發生過啲乜喎？」詠恩有啲面紅，繼續追問。
「...你媽咪冇話你聽咩？」我問。
「...吓...點解咁講？你見過我媽咪？」詠恩有啲緊張。
「...嘻嘻～」我笑淫淫咁望住詠恩。
「...做...做咩喎？」詠恩雙手拓胸，有啲怕羞咁向後退開半步。
「...冇野，咪就係我扶你返去囉！」我變返正經樣講。
「...媽咪開門？」詠恩有啲疑惑咁問。
「...係呀！」我答。
「...之後呢？」詠恩再問。
「...之後牙...er...之後我咪扶左你入梳化囉。」我諗一諗之後回應。
「...屋入面有冇其他人？」詠恩應該想問佢老豆喺唔喺度。
「...冇掛，我見唔到囉。」我回應。
「...咁...媽咪有冇問你啲奇怪野呀？」詠恩又緊張起離啦。
「...都冇乜喎。」我hea答。
「...咁牙...！」詠恩諗緊野。
「...你想知啲咩野姐？」我反問。
「...冇...冇野啦。」詠恩擰一擰頭，之後就返左埋位做野啦。
因為電影嘅拍攝已經如火如荼，所以我返埋今日工就要好倉猝咁離開公司啦。公司同事都好支持我，聽到我話要去拍戲，mandy姐就話要同我搞個歡送會，其實就即係收工全部同事一齊食飯姐。
Mandy姐話識左我咁耐都冇聽過我唱歌喎，所以揀咗去唱k buffet。就係咁...收舖之後除左東哥話約左老細傾野要走先之外，我哋全間舖mandy姐、Yvonne 姐、詠恩，我同阿妹一行五人就去咗旺中唱k啦。
「...張生！留咗間vip房比你架啦，依邊啦。」一上到去大堂經理好有禮貌咁走埋離招呼我，緊係啦...我一早就打定比唱片公司啲同事搭通哂天地線架啦，唔係邊有咁好招呼呀。
「...嘩！間房好大呀，我哋得果五個人，竟然比左間廿人大房我哋喎，阿聰係歌手真係唔同啲架！」一入到房...Yvonne 姐好興奮咁講。
「...朋友比面姐！」我回應。
因為收工大家都肚餓啦，所以開始出去攞野食。詠恩亦都唔例外，同阿妹兩個一齊行左出去。雖然話詠恩當阿妹係情敵姐，但始終都係同事，大家年紀又近啲，所以平時佢兩個喺公司都會有講有笑咁。見所有人出哂去，我就緊係唔會放過咁好嘅機會啦，即時點左兩首Eason 嘅歌熱一熱身先。
「...除非你是我～才可與我常在～」唱到咁上下，佢哋都陸續返哂離。
「...拿！」詠恩攞左啲野食放左喺我前面。
唱完首歌後，我亦都開始食野，睇吓先...作為一間卡啦ok而唔係一間餐廳離講呢，食物質素真係算唔錯架啦，種類又多...大家都讚不絕口。
「...咦...哈哈...聰，原來有你架喎！」Yvonne姐忽然講，我望一望，原來佢攞住個遙控點緊歌，再望真啲...螢光幕上竟然出現左我個名，一張出席活動嘅相，下面就只有兩首歌，見到都唔知好嬲定好笑啦。
「...喂...點離聽吓！」mandy姐可能覺得好奇，而且應該未聽過，所以叫Yvonne 姐點。
「...咪玩我啦。」我尷尬回應。
「...我未聽過吖嘛，最好阿聰你就唱live比我地聽啦。」mandy姐回應。
「...係啦...唱歌！唱歌！」頂佢...阿妹喺度搧風點火，係咁一路拍手一路叫唱歌。
最後我無奈獻唱，雖然係怪怪地咁，但係作為一個歌手，唔應該有尷尬嘅感覺，所以我都唱得幾放吓，又假音又震音咁，大家全程都如痴如醉，連詠恩都跟住大家一齊拍手打拍子。
「...wu～啪啪～～」啪完之後，阿妹帶頭拍手。
「...掂喎聰！拍咩戲吖，做返歌手好過啦。」聽完之後mandy姐講，佢個樣好似好驚訝咁，就好似我喺一個武功好差嘅人面前施展「如來神掌」咁，mandy姐擘大個口得個窿，完全臣服於我嘅武功之下。
「...你估我唔想咩，都要經理人搵我先得架！」我無奈回應。
之後大家都開始盡情享受，可能平時工作壓力都幾大吓，離到之後mandy同Yvonne 兩位阿姐感覺都放鬆左好多，仲叫左啲酒開始飲起上離喎。
我就一向都唔太鍾意飲酒嘅，所以都冇咩點飲，而詠恩可能受過琴晚嘅教訓啦，都唔敢點掂。只係係咁易飲左小小。
「...嚓～」就喺佢哋玩到興高采烈之際。房門忽然比人推開。
「...聰仔！」一個中年女人推住度門叫我，咦...佢咪係...
「...咦～sandy姐！好耐冇見啦喎！」我回應，因為入離搵我嘅竟然係我舊公司同事Sandy姐。
「...都係架，你又唔返離探我哋。」sandy姐回應。
「...joey姐咁忙，邊得閒應酬我吖。」我回應，因為sandy姐其實就係我舊公司joey姐嘅助手。
「...就係joey知道你喺度，專登叫我過離搵你架，你睇吓佢幾有你心吖。」sandy姐回應。
「...吓！佢離左？」我有啲驚訝，大佬...天后喎，竟然都會離唱k，完全估佢唔到囉。
「...係呀，過離先傾啦。」sandy姐再叫，於是我就跟左sandy姐過去啦。
我跟住sandy姐去到另一間vip房，一入到去就見到joey姐坐左喺度食緊野，房入面仲坐左幾個舊同事，連同我一齊出道嘅阿yen都喺度，忽然有種好懷念嘅感覺添。
「...喂...聰！」joey姐見到我之後好興奮咁向我揮手。
「...聰！好耐冇見啦！」阿yen同樣興奮，而且仲走左埋離我身邊拉左我埋去坐添。
「...嘩...咁齊人呀！」我講。
「...啱啱附近做完野，joey姐話想唱歌喎，咪近近地上左離囉，之後經理知我哋識你咪話左比我地聽你都喺度囉。」阿yen講。
「...係呢，同星夢啲人上離牙？」joey姐問。
「...唔...唔係，我而家有另一份工呀，同啲同事上離玩吓咋嘛！」我有啲尷尬咁講，之後就將我嘅處境粗略講一次比佢哋聽啦，佢哋聽完之後都面色一沉。
「...我冇野喎，馬死落地行，冇野做咪乜都做住先囉。」我講。
「...唔掂有咩需要真係要開聲喎！」joey姐好認真咁講。
「...得啦！」我微笑回應。
「...最衰你有約喺身啦，如果唔係咪過返離我哋公司囉。」joey姐諗左一諗。
「..吖...，我下年開紅館，你離做我其中一晚嘅特別嘉賓！」joey靈機一觸。
「...吓！你啲嘉賓全部都天王巨星離架喎！咪玩我啦...joey姐。」我尷尬回應。
「...一場半場冇所謂啦，阿yen都有份，係咪唔比面先？」joey姐講。
「...點...點會呢？」我緊張回應。
「...拿...預咗你架啦！」joey姐開心回應，就係咁...無啦啦可以有機會去紅館唱歌，幾多歌手夢寐以求嘅地方，我都唔知到底係好事定壞事啦。
見返阿yen真係好開心，諗返好多啱啱出道果陣嘅野，其實我一直都有留意阿yen嘅動向架，不過佢就...唔好得我幾多啦，始終都係紅唔起，喺我走左果排，公司都比多左機會佢，但係就...可能佢觀眾緣差啦，都係冇乜人氣咁。同佢地傾左一輪之後，我就行返過自己間房啦。
「...飲呀！」一入到去，就見到阿妹同mandy姐喺度鬥飲緊，搞乜野玩到咁high吓？
「...哥......聰哥！返離拿！」阿妹見到我差啲漏左口叫我阿哥，之後即刻兜返。
「...係呀！」我hea回。
「...頭先果個老女人邊個離架？」Yvonne 姐問。
「...佢牙，你唔覺得好熟面口架咩？」我反問。
「...你咁講又有啲熟喎，唔知喺邊度見過咁。」yvonne姐一路諗一路講。
「...佢家姐係影后離架喎，諗吓！」我再講，之後佢地諗左一陣終於都估到啦，其實佢正正就係影后紅姐嘅細妹，亦都係我舊公司同事，天后joey姐嘅得力助手。
「...吓！！jo....joey離左？」阿妹相當激動，鬼咩佢一向都係joey姐fans，知道偶像就喺隔離喎，緊激動啦。
「...帶我過去見吓佢吖！」阿妹問。
「...痴線...緊係唔得啦！人地天后離架。」一陣搞到佢唔高興，我咪連去紅館做嘉賓嘅機會都冇埋，打死都唔帶阿妹過去。
「...嘢～～」阿妹唔知係咪飲大左兩杯，忽然一野攬左落離，個樣仲好興奮添，佢係咪唔記得左有其他人喺度架，大佬咪害我好喎！
「...ivy你飲多左啦。」我細細力推開左阿妹。
「...嘻嘻～講呢啲！」阿妹繼續傻笑，詠恩喺隔離都開始黑黑地面，但係無辦法，咁多人喺度我乜嘢都做唔到，阿妹繼續同mandy姐隊酒之餘，繼續對我相當熱情，就好似喺屋企對住我果陣咁，一啲避忌都冇，我刻意避開阿妹同詠恩玩，到最後阿妹同mandy姐兩個係飲到冧咗嘅。
因為Yvonne姐同mandy姐都係住同一區。所以負責送mandy姐返去。但阿妹冧左，同時詠恩又喺度喎，點算呢咁？
「...我送完你返去之後再送ivy返屋企啦，不如！」詠恩扶住阿妹上左我部車之後，我提議。
「...吓...你自己一個送ivy？不如我地一齊送左ivy返屋企先啦。」詠恩回應，我唔知點解佢會咁講，可能佢驚佢走左之後，我同阿妹會發生啲咩啦，唉...本來諗住送完詠恩返香港咪可以同阿妹齊齊返屋企囉，依家你話點算呢，詠恩叫到又唔推得喎，真係捉蟲。