中左六合彩頭獎四千八百萬，依家唔知點算?: 72（浠琳身世公開）
就喺我唔知點解釋嘅時候，浠琳忽然坐左埋離，
喺我耳邊細細聲講...！
「...聰哥哥，好彩你識講大話姐，如果唔係我都唔知點算啦。」原來浠琳覺得我係講大話，嘻嘻...又係嘅...我自己諗多左姐。
「...不過如果聰哥哥係我爸爸，咁都幾好吖！」浠琳笑笑口咁講。
「...哈哈...係咩？聰哥哥有咩好呀？」我興奮追問。
「...er...嘻嘻，唔知道呀！」浠琳一路答一路傻笑，小朋友真係天真可愛。
「...咳咳～」講到依度詠恩咳左兩聲，似係叫我收聲嘅訊號，咁我緊係即刻收爹架啦。
就係咁，坐左一陣之後，所有賽事經已完成，終於離到壓軸大獎，就係頒發全場總冠軍啦。其實睇個人得分一早已經知道冠亞季軍係邊三個架啦，所以都冇咩好緊張，全靠我親子比賽為浠琳攞得斷定勝局嘅五分，最後浠琳以兩分之微力壓勁敵成功奪得全場總冠。
見到浠琳咁細過就咁有成就。我真係老懷安慰啦。嘻嘻...頒完獎後...我就用獎勵浠琳為理由，帶左佢哋去世貿果間Mr steak食buffet，細路仔一聽到話有得食buffet喎，仲唔開心到飛起咩，詠恩亦冇say no ，就係咁...我地又再一次享受一家三口就時光啦。
「...嘩...朱古力噴泉呀！」浠琳見到咁多甜品，未開始食對眼已經發哂光啦。
「...食完正餐先準食呀！」詠恩有啲嚴肅咁講，唔知為人父母嘅感覺係點架呢？依樣野...詠恩強過我太多啦，真係要多多學習吓。
食緊果陣詠恩不停咁偷望我，似係留意到我同浠琳都係一樣用左手食野，有小小驚雅咁款，但係又唔敢表露出離。其實左手係咪真係遺傳比較大呢，因為其實我老豆同阿妹一樣都係左手，所以我認為係老豆遺傳比我地嘅，希望浠琳一樣係遺傳左我啦，係喎...之前咪約左老大上佢屋企食飯順便攞埋份報告嘅，完全冇左件事添，老大又係喎...完全冇搵過我，再咁拖落去都唔係辦法，聽日一於去佢環頭接佢放工。
「哈哈...你睇吓你，食到成面都係啦。」我用紙巾幫浠琳抹面。
「...嘻嘻...個朱古力雪糕真係好好味呀。」浠琳回應，連甜品都食完啦，浠琳食左成三杯雪糕，詠恩竟然都冇鬧佢喎，可能因為我喺度啦，見到浠琳個滿足樣，睇離佢平時都真係冇乜機會食咁多。
食完之後，我就開車送左佢兩母女返屋企。之後再帶住疲倦嘅身軀自己揸車返屋企啦。
「...di...di...」鎖好部車之後，我就喺屋企停車場慢慢步行返屋企啦。
「...阿聰！」咦...忽然有人叫我嘅？我下意識望左後去。
「...咦！」原來係小生，佢同樣喺停車場出現，而且身邊仲企左個中年男人喺度。
「...咁夜嘅去邊離呀？」小生好興奮咁問我，大家可能唔記得左邊個小生啦，佢係我同詠恩讀毅進果陣嘅其中一個friend，係喎...我都唔記得咗小生係同我住同一個屋苑嘅，撞到一啲都唔出奇。
「...冇...同詠恩食完飯返離咋嘛。」我回應。
「...wu...你同返詠恩一齊啦？」小生好興奮咁問。
「...唔係...依家我同詠恩喺同一間公司度做姐。」我尷尬回應。
「...吓...你...唔係喺無記架咩？」小身驚訝回應。
「....er....！」於是乎我就簡略再講一次我嘅故事比小生知啦。
「...吓，咁慘牙！」聽完之後小生回應。
「...無辦法啦，都怪自己太情緒化姐。」我回應。
「...點都好啦，加油啦...我支持你架！」小生比左個老鼠仔手勢我。
「...多謝你！」我回應。
就係咁，同小生傾完一輪之後我就返屋企訓覺啦。今日真係玩到好攰，晨咁早起身，又做過運動，撻落床唔洗五分鐘，我就訓到隻豬咁啦。
第二日係星期日，我訓到中午先起身。梳洗完之後。我就揸左部車出去啦。去邊？唔記得咗啦咩，去接放工呀，琴日咪話過要去老大公司度踩場囉咁快唔記得，因為老大係守元朗，所以我揸左部車入去，泊低部車喺警署附近之後，我就行左過去啦。
「......！」我行左入報案室左望右望。
「...有咩事？」一個軍裝警行左埋離。
「...想搵冼sir架！」我回應。
「...邊位冼sir？」軍裝警有啲疑惑。
「... 冼xx！」我響全朵。
「...哦...冼sir，你邊位搵佢呢？」軍裝警恍然大悟。
「...我係佢朋友離嘅，有啲緊要事搵佢，但係打過佢手提冇人聽，想睇吓佢喺唔喺度囉。」我解釋。
「...咁牙，得...我入去幫你問問，你點稱呼呀？」軍裝警問。
「...你話阿聰搵佢得架啦。」我回應。
「...得...阿聰吖嘛，咦...你好似好熟面口咁嘅...！」軍裝警答完我之後，諗左一諗。
「...er...唔該哂！」我尷尬回應。
「...吖...邊度見過呢...」軍裝警邊行邊諗，嘻嘻...希望佢諗唔起啦，費事煩啦。
「...我記得你啦，唱歌果個！」過左幾分鐘後，軍裝警返返出離，笑笑口咁指住我講。
「...冼sir叫你等一陣，佢話好快會出離架啦，你坐陣先啦。」軍裝警講完之後就行左去啦，睇佢個恭敬樣，睇離老大喺度都幾德高望重喎。
「...聰！」幾分鐘後老大就行左出離啦，睇佢一身白色軍裝look，升左「士沙」果然唔同啲，見到佢蓮子容咁嘅口面，睇離佢相當滿意自己套新制服。
「...嘩...套白色衫好型仔喎。」我笑笑口講。
「...嘻嘻...ok啦。」老大開心回應。
「...拿...你等左好耐嘅野呀！」老大遞起手上嘅公文袋，等左咁耐...終於都到手啦，望住份公文袋...有種感動流淚嘅感覺。
接過公文袋之後，因為老大話當緊間唔得閒招呼我，咁見又有啲肚餓喎，一於上網睇吓附近有啲咩好食先。
「.....！」我攞左部電話出離，睇吓先...咦...思敏更新左佢ig 喎。
「今日又去試新嘢啦。」一張相影住間舖頭門口，招牌寫住「醉x」一間似係港式又台台地式嘅食店。
上網搵吓先，咦...喂...間野喺附近咋喎，而且網上啲相仲好似好好食咁添，橫掂都肚餓...一於行過去睇吓有咩好食先。
間舖頭呢真係非常之近，只係過一過大馬路。而且我部車就係泊左喺果邊，一陣食完攞車都好方便，我兩三分鐘已經行到過去，見門口唔係太多人，於是我就行左入去啦。
「...聰哥！」思敏竟然仲喺度，一見到我就興奮大叫。好彩間舖冇客喺度姐，如果唔係真係堅尷尬。間舖係小店..得果幾張枱，周圍嘅裝修亦都好簡潔，其實似小食店多啲囉。
「...點解你會喺度嘅？」思敏問。
「...離開依頭搵朋友攞啲野咋嘛。」我fing一fing手上嘅公文袋。
「...哦...咩離架？」思敏問。
「...冇...啲文件野離咋嘛。」唔通話比佢知係親子鑒定報告咩。
「...啱啦，一於即興拍返集節目先。」思敏回應，就係咁...思敏又開始set機拍片啦，而我呢...冇佢咁好氣...緊係食左先講啦，見枱面已經離左兩碟野，一碟好似係雞翼，而另一碟就係...咦...係鮑魚離喎！小食店都有鮑魚食...唔怪之得思敏要離拍佢啦。
啲野食呢...幾有特色...啲鮑魚同雞翼都係用酒煮過，好香酒味...至於其他野呢...都好唔錯，應該係台式私房野，今次我比九分！至於點解比九分而唔係十分呢...咁就要問吓nba明星入樽賽評判之一嘅偉迪點解喺關鍵時刻比九分搞到個幾界都攞唔到冠軍嘅球星繼續飲恨啦。
好似差遠左小小添，唔好意思...總之餐飯就好食啦。食飽之後...我就順路送埋思敏返屋企啦。
「...係呢，聰哥你最近...幾好吖嘛？」揸緊車果陣。思敏問我。
「...er...還可以啦...哈哈！」我笑笑口回應。
「...歌星果邊點呀？」思敏再問。
「...都係咁啦！」我回應。
「...仲未有消息牙？」思做再問。
「...嗯..！」我回應。
「...係牙...冇理由架，我地個youtube Channel點擊率都算高吖，聰哥你嘅人氣同知名度應該比起之前好左好多架喎，無理由你公司啲人睇唔到架？」思敏有啲疑惑咁講。
「...佢地始終都係傳統主流媒體，可能未必會理啲新興網絡市場掛。」我回應。
「...係牙...唔緊要啦，我會繼續努力架啦，聰哥你一定得架。」思敏回應，明明係我自己問題佢都可以講到佢問題咁。仲話要繼續努力喎，有時真係覺得佢都唔知係咪前世欠左我咁，搞到我好鬼死內疚。
途中阿妹打離話喺九龍灣果邊同朋友食完飯，所以我就順路去兜埋佢返屋企啦。
「...咦...敏敏，點解你喺度嘅？」阿妹上車果陣見到思敏有啲驚訝。
「...係呀，同聰哥去拍完野咋嘛。」思敏回應。
「...哦...你地果個飲食節目！」原來阿妹都知架喎，不過思敏同阿妹咁friend，知道都冇咩出奇吖。
就係咁。阿妹上左車之後就同思敏雞啄唔斷，都好嘅...有阿妹喺度，我就唔洗再諗要同思敏傾啲咩啦。送完思敏返屋企之後，我就繼續開車同阿妹一齊返屋企啦。
「...今日同敏敏去左邊呀？」行緊果陣阿妹問我。
「...元朗。」我答。
「...嘩...特登去到咁遠牙？」阿妹驚訝回應。
「...其實我本身唔係約左思敏架。」我尷尬回應。
「...咁去到咁遠搞乜野？」阿妹再問。
「...拿...！」我隊左份報告比阿妹睇。
「...咩離架？」阿妹揸住問。
「...你睇真啲...！」我回應。
「...親子鑒定...咩離架？」阿妹睇離唔記得左浠琳件事。
「...浠琳呀...記得未呀？」我再講。
「...浠琳...哦...恩姐個女！！！記得啦，記得啦！乜阿哥你真係...走左去搵親子鑒定架？仲以為阿哥你講吓架咋！」阿妹一邊講，一邊拆開公文袋條繩。
「...喂...你做咩呀？」我大喝一聲。
「...拆開睇吓囉！」阿妹理所當然咁款。
「...返到去先啦。」我緊張回應。
「...做咩姐，唔想快啲知咩。」阿妹好風騷咁講。
「...咪亂離呀你，想我炒車就睇啦。」我嚇緊阿妹。
好彩最後佢都好聽話咁收返埋份報告。我地泊好部車，行返屋企之後呢，我就一枝箭咁衝左入房沖涼啦。沖緊涼果陣，我不斷反覆思考，個心好忐忑...依一刻終於都來臨，好驚一陣睇到份報告個結果浠琳唔係我個女，我驚我真係會接受唔到。但係點都要睇架啦，沖左半粒鐘後，我先硬著頭皮咁走返出去，準備接受依個現實啦。
「...喂！」點知一出到去，阿妹條粉腸又已經打開左我份公文袋囉，頂佢！我緊係一手搶返過離啦。
「...hehe～我睇左啦！」阿妹好得戚咁講。
「...喂呀，亂咁睇人啲野架！」我有小小嬲咁講。
「...成份都係雞腸離架喎，你識睇咩？」阿妹串我，係喎...我望左份野兩眼的確係成份雞腸。
「...okok，咁你講啦。」我合埋眼舉起雙手，好似投降嘅姿勢回應，準備受死啦。
「...一早乖乖地比我睇咪唔洗咁煩囉。」阿妹搶返份報告，原來佢都未睇，依家先拎起份野細心咁開始睇緊，而我就望住阿妹希望喺佢嘅眼神入面搵到答案，真係好鬼死緊張呀！
「.....！」睇左半分鐘之後，阿妹個樣面有難色咁款，唔係咩事吖嘛，阿妹你唔好嚇我呀！
「....！」阿妹忽然眼發淚光，雙眼紅晒。
「...做...做咩呀？點...點姐？」我緊張到食哂螺絲咁。
「...九...九十九點九%吻合⋯⋯」阿妹喊哂口咁講出離。
「...咁即係？」我好疑惑。
「...浠琳係你個女呀！」阿妹大聲講出。
「... ！」我dead左...個腦一片空白。
「...咁你喊乜野姐？」過左大約十零秒之後，我有返意識問阿妹。
「...嗚...我替阿哥你開心咋嘛！」阿妹回應，喺依一刻...我先開始有生理反應，眼淚開始不由自主咁流出，同阿妹兩個好似傻左咁抱頭痛哭...，好彩老豆阿媽未返到離姐，如果唔係實嚇死佢哋都似。點都好啦...由今日起我就係一個父親，我要盡量做返一個父親應有嘅責任，浠琳...對唔住，我枉為人父咁多年，我張敬聰而家對天發誓，我一定會盡快對你作出最大嘅補償......