中左六合彩頭獎四千八百萬，依家唔知點算?: 71
「...「親子2x50」接力賽第一次召集。」大會已經開始叫咪，詠恩亦都開始除低佢著喺面嘅衫褲，入面已經著住左喺午餐後換好左嘅泳衣。
件泳衣係黑色，雖然唔係比堅尼，只係一件好普通嘅連身泳衣，但係就張詠恩嘅迷人曲線盡顯，我...情不自禁咁望到入哂神，而且仲開始有小小生理反應添...死啦...我好似好變態添，我要保持冷靜，我要擰開唔好再睇。
「...做...做咩事呀你？」詠恩見我擰開左，所以拍一拍我膊頭問我。
「...吓...冇...冇事。」因為下面已經有左小小生理反應。所以我好尷尬咁故意用手遮住下體回應。
「......！」我見詠恩feel到，所以望一望之後就有啲面紅咁擰返開。講真其實我一直都會有啲個人嘅微細動作，就好似吳孟達（整蠱專家）入面一咸濕就拗頭咁，例如食辣野我會成頭汗、急屎會摸面、仲有就係有身理反應會縮起條腰成條蝦米咁，詠恩同過我一齊依啲特徵佢一早就知道，所以一眼就睇穿左我...令我更加尷尬。
「...喂...！」冷靜返啲之後，我叫住左詠恩。
「...？」本來諗住行落去嘅詠恩停左落離望一望我。
「...算把啦你！」我講。
「...咩...咩喎！」詠恩無奈回應。
「...你識游水咩？」我用挖苦嘅語氣講。
「....！」詠恩冇回應。
「...隻腳又整親，一陣搞到要人救返你，你話到時浠琳點見人啦。」我繼續講。
「...！」詠恩繼續唔出聲，企左喺原位耷低頭望住地下。
「...坐返低啦，等我離啦。」我拉一拉佢隻手，將佢拉返埋離坐低，然後開始除低我身上嘅衣物啦。
「...你...你做咩呀？」詠恩見到我除衫有啲尷尬咁問。
「...落去游水囉！」我一邊講一邊除埋條面褲，其實我已經一早著定左條平腳泳褲喺入面，所以而家一除就得。
「...但係...！」詠恩欲言又止。
「...得啦...冇事嘅。」就係咁，我就好有型咁行左落去同浠琳集合啦。
「...吓...聰哥哥？」浠琳見到我成面問號。
「...噓...！」我豎起食指，示意叫浠琳唔好出聲。
講真小學水運會嘅親子比賽，又邊會檢查得咁緊先得吖，基本上就冇人會核對家長嘅身分，所以經過好基本嘅點名之後，我同浠琳就正式上線啦。
眼見除左個貴婦著到成身好pro之外，其他家長都奇裝異服咁款。著住白色背心嘅叔叔又有，著t恤嘅肥師奶又有，大家都喺度作狀咁熱身拉吓筋咁。因為家長負責游第一棒，所以拉左冇幾耐，我同其他家長一樣開始上線啦。
「...呠～」氣槍聲一響，所有家長都跳哂落水，真係水花四濺呀，大家知啦...你估個個都識起步插水架咩，除左我同貴婦之外其他人都係好求其咁炸水。
因為親子比賽係無限制泳式嘅關係，我緊係用速度最快嘅自由式博命咁游啦，眼尾見到貴婦同樣係用自由式，而且速度亦都相當之快，只係慢我兩、三個身位左右。
好快就游到一半啦，係時候要轉堂啦，不過我始終都冇正式學過游水，所以轉身動作就緊係做得唔好啦，嘥左好多時間，相反貴婦轉身動作近乎完美，轉堂後比佢追到只有一個身位左右嘅距離，搞到我都開始緊張起離啦。
好彩我始終係男人，力量點都係強啲，雖然貴婦動作同協調性都做得比我好，但我抓一下等於佢兩下咁濟，貴婦始終都係追我唔到，最後...我死頂終於都頂到返終點啦！
「...嘭～～」緊接跳落水嘅係浠琳，之後就到貴婦個女。浠琳起步近呼完美，同樣以自由式快速推進，貴婦個女落水比起浠琳有過之而無不及，但係因為我之前有帶離差唔多兩個身位嘅優勢，所以浠琳而家同樣係快貴富個女一個身位有多。
不過貴婦個女身型較好，手長腳長咁...過左直池一半左右，已經將距離收窄到只係得返半個身位，情況相當不妙。
轉堂啦...浠琳先轉保持到水準，到貴婦個女轉啦，前後都唔夠兩秒，咦～可能水貴婦個女身高關係啦，轉身自然冇咁順暢、連貫性亦差小小，轉完堂後又比浠琳拉返開佢兩個身位，形勢大好呀浠琳！
「...加油～～啪啪啪～～加油～～」喺依個時侯...觀眾席上嘅人開始興奮起上離啦，不斷拍手同大叫。
鬥到最後廿米，浠琳喪游...而貴女就喪追，兩個都進入左忘我境界啦。十米距離...貴女再次逼近浠琳...但係距離只係得返幾米...到最後...始終都係追唔到，浠琳以一個身位之差首先游到終點。
「...woo～～woo～～！」全場都為我地歡呼，可能我地四個真係鬥得太精彩啦，嘻嘻...至少喺小學比賽入面計係啦。所有家長都企哂起身為我地鼓掌，見到貴婦個樣輸咗雖然唔甘心，但見到現場環境都唔敢點出聲，只係同我一樣向觀眾揮手微笑。
「...yeah～」我同浠琳擊掌，見到浠琳雖然透哂大氣，但係知道贏咗之後，果個興奮樣同開心到手舞足蹈嘅表情，連我都興奮埋一份呀。
等所有人都完成比賽之後，除即進頒獎典禮，我同浠琳一齊企上頒獎台，果種開心嘅心情真係無法形容。接過獎牌後，我同浠琳就一齊行返上看台度啦。
「...聰哥哥...原來你咁勁架？」行緊果陣浠琳講。
「...你咪仲勁，我完全估唔到依家啲小學生可以游到咁快，頭先你真係嚇咗我一跳就真。」我回應。
「...嘻嘻～」浠琳仲回味緊攞獎咁嘅樣。
「...媽咪！你睇吓！」浠琳拎住個獎牌，行左埋泳恩度。
「...嗯...」泳恩冇乜反應，可能佢本身就唔熱衷運動，所以感受唔到運動贏咗果份激情。
「...黃老師！！」坐返低之後，貴婦忽然叫左浠琳班主任埋離。
「蕭太，咩事呀？」黃老師回應。
「...就咁嘅，黃老師我唔係話啲咩，親子比賽應該係家長同小朋友一齊進行架嘛，不過有啲人就唔知會唔會喺出面請啲教練返離代游咁囉！」貴婦一邊講一邊望向我地，擺到明係講緊我同詠恩。
「...er...咁牙...！」黃老師一時之間都唔知點處理。
「...我喺張浠琳爸爸，唔知有咩問題呢？」唔知邊度離嘅勇氣，我竟然對住佢兩個講左句咁嘅野。
「...哦...，冇問題...！」黃老師尷尬回應。
「...冇...大家討論下姐。」貴婦亦死死氣收左聲。
「.....！」而詠恩就成個人呆左，不過佢一向都係呆呆地咁架啦，所以冇咩大分別。
至於浠琳呢，就一臉問號咁，有啲不知所措，死啦...會唔會嚇親浠琳呢...！