中左六合彩頭獎四千八百萬，依家唔知點算?: 52
「...叮咚～叮咚～」我撳緊鐘。
「...嚓～」一個長啡髮分側界嘅女人開門，一個我見都未見過嘅員工，
係一個大約三十到尾嘅姐姐，不過其實我除左開幕果日上過離之外，
都真係好似未上過離，所以未見過一啲都唔奇。
「...你好，係咪想搵室內設計？咦...你咪係！」姐姐好有禮貌咁問，
之後忽然 變得疑惑，應該係認得我。
「...彪哥呢？」我一邊行入去一邊問。
「...吓...彪哥？」姐姐個樣好尷尬咁，，可能真係新離啦。
「...東哥！！！」我叫，因為見到老豆第二個friend阿東，
就坐左喺入面嘅其中一張枱前。
「...吓...聰仔，點...點解你會上離架？」阿東一見到我好似好驚訝咁，
本來坐左喺度埋頭苦幹咁嘅樣都即時彈左起身，不知所措咁東張西望。
「...老豆呢？」我亦都四圍望緊，睇吓見唔見老豆嘅身影。
「...er...志哥...志哥...佢....」東哥臉色一沉，支吾以對咁，到底發生乜野事呢？
點解個個都好似咁神秘咁嘅？搞到我越離越好奇添。
「...叮～咚～」說時遲 那時快，正當我同東哥你眼望我眼之際，
門鐘突然響起，緊接就係頭先果位女同事順手開門。
「...你好...請問有乜野幫到你....」姐姐同樣禮貌地詢問，而門外嘅...係一個中年男人，
著住牛仔褲、波鞋，上身著住黑色寬頻風褸再加個黑色斜咩袋，典型速遞員look。
「...er...（順利建材）收票架，離左幾次架啦，睇吓今日會唔會有得收！」男人問。
「...東哥！」姐姐同時望向阿東。
「...咁...牙！」東哥皺哂眉頭，好似食左辣椒出唔到聲咁嘅樣。
「...你介唔介意過多兩日再離過呀，因為老闆依幾日唔喺度簽唔到票比你地呀，
唔好意思！」東哥好唔好意思咁回應。
「...吓...er...我要覆一覆公司先。」男人拎起手提。
「...比張單我睇吓！」男人打電話期間，我走左埋去問男人。
「...八萬六千，哦...得啦...你等一等我開票比你！」我望一望張單好爽快咁回應。
「...哦...唔該！」男人聽到之後放返低個電話。
「...你坐一坐先。」我講完就同東哥一齊走左入老豆間房啦。
「...聰仔咁唔係咁啱規矩架！」一入到房，東哥即刻有小小緊張咁講。
「...唔緊要啦，老豆返離比返我咪得囉！」我輕鬆回應，
講真十萬八萬又唔係啲咩大數目，況且老豆會比返我㗎嘛，
又驚啲咩呢？
開票果陣...我先第一次真正留意老豆間房，
出奇地整潔，唔知老豆平時做野係點架呢！
「...幾整潔喎間房！」我多口一問。
「...志哥平時都冇幾可喺房嘅，唔係去左度野就去同啲建材公司傾野，
好多時返一返離又要再出過去，間房就緊係整潔啦！」東哥回應，
哦...原來如此...估唔到老豆發左達都仲咁勤力，同我簡直兩個層次。
開完票...我就拿拿臨拎出去比個速遞員，之後再走返入老豆間房，
試吓喺東哥身上問吓老豆到底喺度搞緊啲乜。
「...叮～咚～」但係我櫈都未坐暖，門鐘又再一次響起，
緊接又係頭先果位姐姐嘅敲門聲。
「...東哥，（時穎燈飾）又有人離收票喎，係咪照叫佢等一陣呀？」
姐姐問，唔係掛...又收票，點解收得咁密嘅？
「...ok ，比張單我！」我講。
「...唔...唔好啦，Elaine你叫佢過兩日再離過啦！」點知東哥忽然好緊張咁，撳住我唔比我再開票。
「...ok...！」Elaine 講完之後就行返出去。
我同東哥你眼望我眼，deadair 左幾秒...
「...係咪...出左啲咩問題呀？」我好婉轉咁問。
「...er.....唉...！！」東哥欲言又止，表情好無奈咁左望右望，就好似月經前緊張咁款。
「...東哥，唔係連我都信唔過掛？」我努力遊說，希望東哥可以一五一十咁話我知到底發生緊乜事。
「...唔...唔係，係唔想連累你姐！」吓...連累？講到咁嚴重咁嘅，有啲恐怖喎！
「...講啦，到底發生咩事呀？老豆又去左邊呢？」我再追問，
東哥本身都唔係一個守得秘密嘅人，比我Chok多兩chok，
就和盤托出將所有野講哂我知。
「...咩話！彪哥夾帶私逃？？」我大叫。
「...細...細聲啲啦，聰仔！」東哥好緊張咁望一望房門口講。
「...你再講多次，我有啲唔係好明！」我細聲回應。
「...頭先咪講左囉，阿彪個衰仔攞哂公司嘅流動資金失左蹤！」東哥細細聲講。
「...咁關老豆返左大陸咩事呀？」我再追問，因為頭先東哥話老豆依幾日失蹤嘅原因，就係返左大陸。
「...講起真係火都離！！志哥之前接左單大野，有一間大企業將所有辦公室嘅裝修判左比我地做，
成幾百萬生意，仲同人地簽好哂約添，點知個打靶仔無啦啦攞走哂公司啲錢，
好彩大部份材料之前都入左貨，但係其中一樣對方指定要用嘅門就仲未搞得掂，
本來已經同一間建材公司傾好左比貨我地嘅，但係就係喺限期前比唔到錢人，
最後人地將批貨賣左比其他人啦。」東哥激動陳述。
「...咁依家我比錢搵佢買返咪得囉！」我回應。
「...唉...聰仔，係咁易就好啦，果批門唔係普通野離架，係內地一個好出名嘅品牌，
依個牌子嘅門全國數一數二，之前個供應商其實都仲肯比貨我地嘅，但係就得返好小貨，
根本就唔夠我地交貨用，咁所以志哥咪上左深圳代理度睇吓仲搵唔搵到貨囉。」東哥陳述完畢。
「...咁樣樣....！」我dead左一dead。
「...如果搞唔掂咁點算？」我再問。
「...仆x冚x產囉！」東哥又變得激動。
「...咁大獲？」我疑惑一問。
「...要賠double比人架，成四百幾萬生意，賠雙倍咪成千萬咁濟囉，
公司資金比阿彪攞哂都所剩無幾，如果搞唔掂嘅話...公司執笠就緊架啦，
志哥都唔知仲洗唔洗上身添！」東哥補充。
「...咁樣...老豆到底喺邊姐？」我再問。
「...er...應該上左（田貝四路）建材城果頭，做咩咁問？」東哥回應，之後再問。
「...上去搵佢囉！阿媽好擔心老豆呀！」我講。
「...你就咁上去都唔係咁似搵到架喎，你又唔知佢實際位置，
不過佢個電話間中都會收到嘅，你自己小心啲啦。」東哥講完之後，
我就一枝箭咁走左。
唔知點解...我突然會有咁嘅衝動，因為我本身係一個唔多鍾意返大陸嘅人，
對上一次返可能要數到1987年，講笑姐...不過都起馬幾年都冇返過一次，
可能睇得動新聞多啦，成日都營住好似個個都係賊咁。點都好啦...一離開左公司，
我就揸車直奔上水，將部車泊低左喺上水火車站停車場之後，我就坐港鐵去羅湖再到深圳啦。
過關果陣仲以為深圳好落後添，原來真係井底之蛙，人地大陸已經開始先進過香港，
過左關之後，我跟住東哥比我嘅指示，搭地鐵去到翠竹站，其實都只你幾個站，
落車之後再沿住（田貝一路）二路，三路咁一直行過去，唔洗廿分鐘，我就去到（田貝四路）啦。
依度一個街口都遠到飛起，睇吓地圖先...家合居...家合居...吖...搵到啦，
嘩...原來都真係幾大，離遠已經見到大大個招牌，成個商場...樓高四、五層左右，
你就當係一個九展咁上下啦，但係成個場都係賣裝修、建材，家居野，五花八門...由燈飾、
梳化、枱櫈，到睡床、大櫃、水泥、牆紙、地板同各種家居設備應有盡有，真係睇三日都睇唔哂。
而家都已經差唔多傍晚六點幾七點，雖然未去到人頭湧湧，但係依然人流唔小，
眼見大多數都係講廣東話嘅香港人，應該好多都係行家，或者裝修佬專登上嚟攞貨。
其實東哥真係講得好啱，人海茫茫點搵姐，老豆個電話又一直都唔通，
我喺果度行左差唔多兩鐘，唔經唔覺已經差唔多八點半啦，
周圍嘅人流開始稀疏，商舖開始拉閘關門，點算呢...山長水遠離到，
唔係要空手而回掛....
正當我繼續萬無目的咁四圍行唔知點算嘅時候，忽然.....