中左六合彩頭獎四千八百萬，依家唔知點算?: 44
因為都真係好眼訓吓，所以同小苑佢收左線之後，我就即刻撻左上床訓啦。
「...喂...喂...！」把聲咁熟嘅，邊個叫我呢？
「...喂！」
「......！」我呆左咁四圍望緊，我而家坐左喺張梳化度，
點解....周圍嘅環境咁熟咁嘅？個電視櫃、盞吊燈...仲有張飯枱？
「...喂，食得飯啦仲訓！」係詠恩，佢坐左喺我隔離，
拍一拍我膊頭，似曾相識嘅感覺。
「...琴晚又掛住打機啦，今朝上堂係咁瞌眼瞓。」詠恩一邊講，一邊行埋去飯枱度，
而我亦都好自然咁跟住坐埋去。詠恩嘅工人姐姐早就已經喺廚房拎左啲飯餸出離，
我望一望牆上面個鐘，係下面兩點鐘，窗外射入溫柔和嘅陽光，好舒服、好寫意。
同平時返（毅進）放早嘅時間差唔多，我就同詠恩一齊享用我地嘅午飯啦。
「...喂！！」食緊果陣，詠恩忽然間四圍望，然後細細聲咁喺我耳邊叫我。
「...咩呀！」我一邊回應，一邊繼續食飯。
「...細聲啲啦！」詠恩望一望入廚房，好似好驚比工人姐姐聽到咁。
「...咩姐！」我放低左碗飯，望一望詠恩。
「...我呢...成個半月冇離m啦！」詠恩講得相當細聲。
「...車...你不嬲都唔準架啦！」我敷衍詠恩。
「...唔係呀，今次好似有啲唔同囉，個感覺唔知點咁！」詠恩有啲心神恍惚咁。
「...食粒安眠藥你就唔會胡思亂想架啦。」但係我繼續敷衍，完全冇將詠恩嘅說話放喺眼內。
就係咁...依個話題就比我輕輕帶過左。食完飯之後，我就如常咁同詠恩一齊坐喺梳化度睇電視，
詠恩父母都要返工，所以詠恩屋企下午只係得工人姐姐喺度，每日我地放左學之後，
我都會喺度hea到五點零鐘先會走，我好享受依種無憂無慮嘅感覺，
如果可以一世停留係呢一個moment，咁就真係死而無憾啦。
「...世頭裡 多小困倦與掛念～～」電話聆聲忽然響起。
我從睡夢中醒過來，原來又係發夢，我都估到世事邊有咁完美吖。
其實喺我同詠恩分左手依七年離，我間中就會發到類似嘅夢，
每次我都好嚮往以前嘅日子，但係每次訓醒，都會有一種失落感。
人就係咁架啦...有果陣就唔識得珍惜，到失去左既時候先至後悔莫及，
塵世間最痛苦嘅...莫過於此。訓醒之後我望一望個鐘，
原來已經係中午十二點幾，我拎起左床邊嘅電話，
好心急咁即時打左比老大david，可能係依個夢令到我相當上心。
「...嘟嘟～～嘟嘟～～」點解老大個電話咁耐都冇人聽架，急死人咩！
「...嘟～～～」咦...個響聲好似唔同左嘅？
「...喂！」係一把女人聲，我認得喺阿嫂把聲，睇離老大個電話飛左線喎！。
「...阿嫂，阿聰呀，輝哥呢？」我問。
「...阿輝佢入左camp喎！」阿嫂回應。
「...吓...點解嘅？」我有啲驚訝咁問。
「...可能你近排忙未知啦，阿滔佢啱啱升左做（總幫）呀，
嘻嘻...所以要入camp四個星期完成一個（管理課程）。」阿嫂解釋，
唔係掛...點解當你越心急想做一樣野果陣就越多阻滯架！
「...你有緊要事搵佢牙？」阿嫂問。
「...er....一般啦。」我回應。
「...一係你今晚再打比佢啦，佢收工返離果陣應該會開返電話！」阿嫂講。
「...吓...又話入左camp嘅？」我問。
「...係入左camp呀，但係（管理課程）係唔洗留宿架，所以收工可以照返屋企。」
哦...原來係咁，嚇得我吖...仲以為要成個月先搵到老大添，咁都冇咁驚。
「...咁好啦阿嫂，我今晚再打過比佢啦...唔該哂！」講完之後我就收左線，
因為今日公司比我放假一日，所以我而家可以慢條斯理咁嘆返個早餐。
可能係平日嘅關係啦，而家屋企一個人都冇，連阿媽都唔喺度，可能落左街買餸啦。
我行左入廚房，打開個雪櫃一睇，竟然空空如也，再打開個食物櫃，吓...連一個公仔麵都冇，
唔那係呀！！！好唔願意之下，我落左樓下商場。因為而家都算有小小名氣，
所以每次喺屋企附近都要戴帽同黑超先可以落街真係有啲麻煩，但係肚餓就冇辦法啦。
換好哂衫我就急急腳咁落左樓下商場啦，睇吓食咩先...我萬無目的咁行，
行吓行吓...咦...依間咪之前思敏帶我離果間日式茶房，記得啲意粉都唔錯架喎，就食依間啦。
「...二拉些嗎些！請問幾多位呀？」女店員歡迎我。
「...一位吖唔該！」我回應，之後女店員就帶左我去一個卡位度坐低啦。
點完餐後，我又拎返部電話出離，睇吓同浠琳一齊去迪士尼影嘅相，
唔知係咪心理作用呢，越睇就越覺得浠琳似我，由其是對眼...同我一樣都咁大，
輪廓又夠深就好似混血兒咁。
「...思敏你想食啲乜呀？」睇睇吓...忽然聽到背後有把男人聲，
講啲廣東話唔鹹唔淡咁，咪住先...佢叫思敏...唔會係？
我唔敢擰轉頭，只係輕微咁擰左小小，盡量𥄫吓坐喺後面嘅人到底係邊個，但係點𥄫都𥄫唔到...！
「...是...是但啦！」今次係一把女仔聲，
係啦...我認得係思敏把聲，估唔到佢咁快會搵到第二個。
「...係呢...你張信用咭搞返掂未呀？」思敏問果個男仔。
「...吖囉～哇打嘶哇，sorry...未搞到，不過我daddy過兩日會匯錢過離比我！」
男仔講野又日文，又英文再加廣東話...成個abc咁。
「...哦...咁都好啲，係呢...你依幾晚住邊呀咁？」思敏再問。
「...前幾晚都住（Shangri-La）架呢，不過今晚（Shangri-La）full booking，
so tonight 住喺（dorsett）。」男仔回應。
「...（dorsett）喺邊度離架？」思敏問。
「...哦...喺觀塘果邊，好近你！」男仔回應。
「...哦...係...係喎...嘻嘻！」思敏笑笑口咁，傾得相當開心咁喎！
「...吖...我有啲日本果邊嘅家鄉野想送比你，但係又唔記得帶出離，
今晚食完飯...上一上我酒店，我攞比你啦！」男仔繼續攻勢，
講真...條仔講野真係好得，全程氹到思敏勁霖，傾談內容大概係話條仔係日本離香港嘅遊客，
因為早幾年離過香港Working Holiday一年，所以識講廣東話，
仲叫思敏一陣帶佢去旺角附近遊覽吓喎。雖然話我同思敏已經冇啦冇㨢姐，
但係聽到佢地喺度打情罵俏咁，始終都有啲不是味兒。
我快手食完我個（白汁雜菇意粉）之後，就拿拿臨拎起張單即時轉身出門口埋單。
好彩我帶哂黑超帶哂帽咁姐，思敏應該留意唔到我，而家我企喺收銀嘅位置，
思敏正正背向住我，終於都可以望到果個男仔嘅廬山真面目啦。
就咁望落個男仔三十歲左右，中等身材...短髮同我一樣帶住一頂名牌鴨嘴帽，
全身上下都係名牌，著到成個日本板仔look咁，點睇都係非富則貴咁嘅款，
但係睇吓睇吓...點解...點解佢...好似好熟口面咁嘅？
食完之後...我就返左上樓hea，hea吓hea吓我就訓著左，訓醒之後我望一望個鐘，
原來已經係傍晚七點幾，我坐左喺房入面嘅電腦枱前，我又開始諗返起頭先個男仔，
我越諗就越覺得奇怪，但係始終都醒唔起喺邊度見過個男仔，終於...好奇心驅使下，
我決定開車出去，我將部車揸到去觀塘，個男仔所講嘅果間酒店，時間已經係夜晚嘅八點幾啦。
我部車就停左喺酒店大門口，一個可以睇到哂所有人出入嘅位置，
我唔知我到底離做啲乜，但係就係唔知點解有一種感覺叫我要離。
我喺度漫無目的咁等，一邊等...我就一邊撳電話上吓網咁，
等到差唔多成九點半啦，但係就始終都見唔到思敏同個男仔嘅蹤影，
我繼續上網，開始比我搵到啲眉目啦，等到差唔多十點，
終於比我見到個男仔斯斯然咁喺酒店大堂行出離.....。