中左六合彩頭獎四千八百萬，依家唔知點算?: 43
「...聰！！！」有人叫我。 我回頭一望，原來係大師姐。
「...joey姐！」我回應。
「...咁快飽拿？」大師姐問。
「...差...差唔多啦。」我口窒回應。
「...係喎，未恭喜你添，攞左個新人獎，恭喜哂呀！！！」大師姐笑笑口咁講。
「...多謝！！我都恭喜師姐你又大殺四方！！」我尷尬回應！
「...遲吓你都得架！」師姐回應，唔知係咪揶揄緊我呢？
「...講笑咩，師姐你係香港史上攞得最多獎嘅女歌手，幾時輪到我吖！」我回應。
「...我唔會睇錯人嘅，我覺得你非池中物，只要有一個機會就會化龍昇天！」
大師姐忽然好認真咁講，個樣又唔似講笑喎，唔通我真係有咁嘅潛質？
「...乜joey姐你識睇相架咩？」我好疑惑咁問。
「...之前跟玲玲師父學過吓囉。」師姐回應，咁其實都叫做識咩？
「.......！」我冇出聲，deadair 左幾秒。
「...不過呢，你唱歌把聲真係太似謝霆鋒啦，我唔知你係有心模仿定點啦，
雖然話把聲似霆鋒算係靚聲底，但係太似就會冇左自己嘅風格囉。
就好似早幾年嘅mr主音咁，把聲似eason令佢紅極一時，
但係風潮過後佢都仲未搵到自己嘅風格，最後咪一沉不起囉！」大師姐用心良苦咁說教，
搞到我唔知講咩好呀，只係不停點頭。
「...自己諗吓啦聰，有咩唔明隨時搵我傾計啦！」就係咁，大師姐拍一拍我膊頭之後，
就輕飄飄咁行返入去啦，而我呢...隔多分零鐘之後，亦都行返入去。
時間都差唔多凌晨兩點啦，個個飲飽食醉之後亦都各散東西，
而我亦都唔例外，出門口後，即刻跳左上的士，極速返到去將軍澳。
一入門口...，廳燈竟然著住，原來阿妹仲未訓，依然喺度撳緊電話。
「...返離拿阿哥！」阿妹望一望我講。
「...嗯。」我嗯左一聲。
「...頭先喺電視見到你攞獎喎，之後去左慶功牙？」阿妹問。
「...係呀，大師姐請食飯吖嘛！」我答。
「...嘩...你就好啦，可以見到咁多明星。」阿妹講。
「...見得多你就厭架啦，有時對住會有壓力添！」我講。
「...係喎，頭先電視有直播咩？」我問。
「...有呀，99台播！」阿妹答。
「...哦！」
「...er....有冇得返睇架？」我哦左一聲，之後諗諗吓，
又心思思想睇返頭先得獎跑一刻，於是就叫阿妹上網搵比我睇啦。
自己睇返自己上電視攞獎果種感覺真係好特別，怪怪地咁...又有啲搞笑。
「...嗞～～」睇睇吓，電話震左一震，咦...成凌晨三點鐘都仲有人whatapp我嘅？
唔知邊隻夜鬼仲唔訓呢，唔通係公司啲人？睇睇先！
「...恭喜哂喎聰！」小苑02:50AM 咦...原來係小苑，諗落上次去完迪士尼之後，
原來已經幾個月冇搵過佢啦，依幾個月真係忙到痴線。
「...多謝，係呢...浠琳呢？」02:52AM 聰。
「...佢一早訓左啦！」02:55AM小苑。
「...佢知唔知我攞獎？」02:56AM聰，其實我咁問會唔會自作多情左啲呢，
成幾個月冇見，浠琳都唔知仲記唔記得我啦。
「...我唔知喎，我都係啱啱返到屋企咋嘛！今晚公司盤點呀，
之後同同事出左去打邊爐。」02:58AM小苑。
「......！」02:59AM聰。
「...嗞～～」隔左幾秒，小苑打左比我！
「....喂！」我接聽。
「...唔洗咁頹喎！」小苑講。
「...邊有姐！」我冇離精神咁回應。
「....浠琳好掛住你喎！」小苑笑笑口講。
「...係！！！？？？」一聽到我個人即時醒哂。
「....你又知！」之後我再問。
「...你上兩個星期上大台個音樂節目果陣，浠琳一見到你即時睇到入哂神，
仲係咁問我幾時可以再同聰哥哥出去玩！」小苑回應。
「...嘻嘻...！」我偷笑！
「...你就笑得出，難為我囉！」小苑好晦氣咁講。
「...嘻嘻...sorry，點解咁講呢？」我冇再笑，但依然笑笑口咁問。
「...比浠琳篤爆左囉，家姐一聽到即時愕左然，連我老豆老母都問我你係邊個囉！
搞到我口都啞埋唔知點回應好！」小苑無奈回應。
「......！」我dead左一dead，但係我未諗到點安撫小苑之際，小苑再一次爆出。
「...仲未完囉，我都未諗到點答佢地，浠琳竟然大大聲話你係我男朋友喎，
簡直係火上加油！」小苑講都火都離咁濟。
「...er...唔...唔好意思呀，搞到你添！」我無奈回應。
「...唉...算啦，話過要幫你架嘛，雖然比浠淋搞到我比老豆老母問長問短，
但係都唔係冇回報嘅！」小苑講到好玄咁，唔知佢想講咩呢？
「...回報？」我好疑惑咁再問。
「...浠琳身世之謎呀！」小苑講，係喎...，
佢唔講我都唔記得左之前老大David幫我攞左浠琳啲頭髮去做﹝親子鑑定﹞添，
都成兩個幾月前嘅事，忙都無左件事！
「...你有線索？」我問。
「...我覺得浠琳應該係你個女！」小苑回應。
「...點解咁講？」我有小小緊張咁問。
「...果晚成屋人訓哂之後，我照常一個人坐左喺廳撳電話，
家姐忽然間喺房行左出離喎，然後呢...我地嘅對答大約係咁.......
「...仲唔訓？」家姐問。
「...差唔多啦！」我一邊撳電話一邊回應。
「...我有啲野想同你傾吓！」家姐好認真咁講。
「...講啦。」我繼續好唔專心咁撳緊電話。
「...阿妹你唔可以同阿聰一齊架！」家姐忽然坐左埋我隔離，
仲一手捉住左我手臂好緊張咁講。
「...點解呀！」見到家姐咁緊張，我緊係打蛇隨棍上啦。
「...我...我...唔知點講比你知，總知你聽我講啦，你唔好同阿聰佢一齊得唔得呀？」家姐眼泛淚光！
「...er...你咪聽浠琳亂嗡啦，我邊有同阿聰一齊喎！」家姐楚楚可憐咁求我，我仲邊忍心玩佢吖。
「...真嘅？」家姐問。
「...真架，我地只係普通朋友咋！」我拍一拍家姐膊頭講，
家姐聽到之後個人好似鬆左一口氣咁，之後就繼續呆坐喺梳化度。
「...其實你同阿聰之間嘅事，我都略知一二嘅，但係...家姐你...係咪有啲咩難言之隱吖？
如果係嘅我可以同你分擔吓架！！」我見家姐呆左，於是問佢。
「...我地嘅對話，大至上就係咁啦。」小苑講到依度，忽然完左。
「....喂...，啱啱先講都戲肉咋喎，無啦啦做咩野完左架？」我好緊張咁問。
「...咁真係完啦嘛，最後家姐都係咩都冇講囉！」小苑回應。
「......！」我冇出聲。
「...不過我直覺覺得浠琳應該會係你個女！」小苑見我唔出聲，於是好有自信咁回應。
「...咩野直覺呀大佬？」我揶揄緊佢，大佬講左一大輪原來都係靠估！
「...緊係女人嘅直覺啦，唔通九十度啲直角咩！」小苑繼續自high。
「...咁你有咩打算呀？」自high完，小苑又繼續問我問題。
「...咩打算？」我好疑惑咁回應。
「...我係話...如果浠琳真係你個女，咁你有咩打算？追返我家姐？
但係你而家個女朋友又點呀？」小苑不停發問，講真...我真係冇諗過依個問題，
我嘅男女關係本身都已經亂過亂葬崗架啦，不過講真都真係要認真諗吓，
因為老大幫我搞果份親子鑑定報告，可能隨時已經放左喺老大度好耐啦，
等聽日訓醒，我就即刻搵老大問問，到時謎團就會解開。