中左六合彩頭獎四千八百萬，依家唔知點算?: 36
「...蓮姐！！」我大叫，因為詠恩大廈保安行左出離，
而依個保安，好彩係我以前經常會同佢打招呼嘅蓮姐。
「...吓，你...好似係...！」蓮姐聽到我叫佢之後有啲疑惑，
可能過左咁多年已經唔係太認得我啦。
「...張生呀！！！」我繼續認親認戚咁。
「...哦...，我記得啦，陳小姐男朋友...張生！！」蓮姐恍然大悟，好似剎那間看透世事咁款！
「...拿...阿sir，我等我女朋友咋！！」我繼續回應阿sir。
「...咁樣牙！！」警察a諗左一諗！
「...係...係呀sir，同女友鬧左交囉，嘻嘻...你明架啦！」我笑笑口好尷尬咁講。
「...咁好啦，解釋到就得啦，拿...比返張身分證你先張生，快啲氹返女友啦！」
警察終於都相信我啦，比返張身分證我之後就走左，總算解決左啦。
「...張生，乜原來係你牙，頭先睇閉路電視仲以為係啲飛仔，所以咪報警囉，
入離坐啦...唔好坐出面啦...依度有冷氣舒服啲！」蓮姐出奇地對我超熱情，
彷如老朋友來訪咁。
於是我就恭敬不如從命咁跟左蓮姐入去大堂入面嘅梳化度坐啦。
諗起以前我都真係經常會坐喺度等詠恩落離，因為貪佢依度啲冷氣真係正到無論，
無論係幾熱嘅天氣，依度都好似與世隔絕咁永遠維持住20度左右，
不過坐左入離，其實都唔係啲咩好事...
「...係呢...張生，好耐冇見你離啦喎，離搵返陳小姐架？」因為蓮姐都真係幾八卦吓，
所以坐左喺入面之後，佢就不停問我野，雖然唔敢正面問，
但係問題間不斷試探我同詠恩嘅關係，甚至乎連浠琳嘅身世都想喺我身上探個究竟，
不過可惜連我自己都唔知吖，所以不斷同佢耍太極。
等吓等吓...差唔多等到六點鐘啦，收工返屋企嘅人亦都越離越多，
每當有人行入離果陣，我都會金睛火眼咁𥄫到實一實，終於...
喺唔知第幾次有人開門果陣，詠恩出現啦。佢雙手揪住幾袋餸，
個樣好似好匆忙咁，似係啱啱收工趕住返屋企煮飯咁。
一見到我果陣，詠恩成個人呆哂，差啲連手上嘅幾袋餸都跌埋落地。
「...阿恩！」我企左起身，準備行埋去，但係詠恩嘅反應，
竟然係即時掉頭拔足狂奔，好似比大耳窿追數咁，頭也不回。
我追左出去，講真男人點都跑得快過女人，加上佢一抽二褦咁，
一兩個彎位我就已經追到佢啦。
「...阿恩！！」我兜左去佢前面攔住左佢，詠恩塊面dup到好低，
不斷逃避我眼神，而且仲係咁向後退。
「...做咩係咁避開我姐！」我緊貼住詠恩問。
「...冇...冇野呀！」詠恩一邊擰歪面一邊好緊張咁答。
「...浠琳佢，係咪我地個女呀？」我單刀直入！
「...唔...唔係呀！」詠恩聽到之後，好緊張咁回應。
「...唔係，咁係邊個架？」我繼續質問。
「...我話唔係就唔係啦！」詠恩變得好激動，
但係依然係唔敢直視我，成塊面紅哂，眼發淚光咁大叫！
「...小苑講左比我知，話你一直都冇拍過拖，咁唔係我仲會係邊個吖，你講吖！」
可能我都真係太想知個真相啦，所以冇理到詠恩嘅情緒繼續質問，
但係...詠恩已經頂唔順啦...
「...鳴～鳴～走呀！走呀！鳴～」詠恩坐左喺地下度喊到收唔到聲，仲不斷咁叫我走！
「...你講啦！」我用苦苦哀求嘅語氣繼續遊說佢，
但係詠恩完全係聽唔入耳咁，望都冇望過我，
仲喊得比頭先犀利。
周圍眼望望嘅人越離越多啦，個個都開始議論紛紛咁。
「...走呀...我求吓你！」詠恩用哀求嘅語氣再一次叫我走，
睇個勢我再唔走真係會比人再報警拉走架啦，
咁嘅情況...我唯有撤退啦！
https://youtu.be/xFztWAEGx-g
謝霆鋒 罪人
是妒忌 或寂寞令我失掉平衡
倘冰釋介蒂願以畢生去等
是誤會 或是實在我當初真的過份
我可傷過你 而記恨半生
* 還有一點 生動裂痕
還有一點 令人痛心
不肯姑息 不想相識
跟我碰到好像是迎面路人
極力逃避我眼神
你似罪 禁止我走得太近
怎可相識 多麼偏激
怎算待我平等 獨我是罪人
覓認同 漫長鬥爭
覓自由已得到許多教訓*
是墮落 或是現實已經迫我於角落
有一點冷血 未去分析結果
是落寞 或是日後我不想慘遭冷落
你可否說過 還愛著我麼
我退守三百里返返去我部車度，然後打左個電話比小苑，
不過小苑應該返緊工聽唔到電話，所以我喺部車度考慮左一陣，
最後我都係無功而回嘅。
橫掂都過左海，加上差唔多六點半阿瑜嘅收工時間，
於是我就順勢揸左部車去跑馬地諗住接阿瑜收工啦。
但係我此終都離遲一步，差唔多到跑馬地打電話比阿瑜果陣，
阿瑜竟然又話約左朋友食飯喎，無辦法之下我唯有吉車返返九龍啦。
過緊紅隧果陣，我又無啦啦諗起思敏佢好似話收八點喎，心血來潮、
加上冇人陪食飯嘅情況下，我選擇左去機場接思敏收工。三號幹線、
青馬大橋，再經過青嶼幹線之後，我到達機場一號停車場，大約係七點五十分左右，
時間實在係啱啱好呀，每一個細節我都計算埋架啦，我諗大家都無話可說啦掛！
「....嘟嘟～!」八點鐘我準時打比思敏，出奇地...思敏亦都準時接聽喎！
「...喂...聰哥！」思敏好開心咁接聽。
「...走得未，等緊你！」我問。
「...嘻嘻，走得啦！走得啦！」思敏收左線之後，就以光速衝左出離，
離遠見到我部車已經跑住咁過離，洗唔洗咁誇張呀！
「...好野呀聰哥離接我，我地去食咩好呀？」一上到車，
思敏好興奮咁問我，之後佢又開左佢嘅廣播模式啦。
講真聽思敏講野真係好舒服，可以話係一種心靈嘅慰藉，
本來唔開心嘅心情好快已經拋諸腦後。思敏話好想食韓國野喎，
於是就帶左我去尖咀韓國街果度，捐窿捐罅咁搵左間小店行左入去啦。
思敏佢話好開心喎，所以叫左好多野食，又部隊鍋又盛咁，
有時我都真係幾唔明架，明明係餐肉、腸仔加公仔麵姐，
改一改個名就話賣貴幾培咁，但係又大把人仆倒去食架喎，
真係吹佢唔脹。
食完之後陪思敏喺加連威老道行左一陣，我地就去攞車返將軍奧啦。
「...我今日好開心呀，聰哥專登離車我收工，仲帶我食好野添！！！」開緊車果陣思敏講。
「...開心咪好囉！」我回應。
「...咦...頭先食完野抹唔乾淨添！」思敏一邊照鏡一邊講。
「...聰哥，有冇紙巾喺度呀？」思敏問。
「...吓...er...你睇吓前面個櫃桶仔有冇！」我一邊揸車一邊講。
「...睇吓先，吖...有啦有啦！」思敏好快就搵到。
「...咦...有盒野喺度嘅？」不過其實我仲諗緊詠恩同浠琳件事，所以一直都心不在焉咁。
「...聰哥！」好似有人叫我咁嘅？
「...聰哥！！！」
「...吓？？」原來思敏一直都叫緊我，嚇到我dup一dup車再望一望思敏，
思敏而家個樣好疑惑咁望住左我，而佢手上面...吓！！大獲...
果盒咪我諗住買比阿瑜嘅一卡鑽戒，死啦...點解釋呀！
「...依盒係？」思敏一邊講一邊張個盒打開，
而我就繼續唔出聲專心揸車留意住事態嘅發展。