中左六合彩頭獎四千八百萬，依家唔知點算?: 35
「...喂！！」小苑叫左我唔知幾多聲。
「...er....。」我繼續遊魂。
「...喂，你有冇聽我講野架？」小苑有啲唔耐煩咁問。
「...er...你講果個浠琳，係咪即係頭先見到果個細路女呀？」我好緊張咁問。
「...係呀！」小苑回應。
「...咁...咁...！」死啦，越諗越似，唔...唔會真係我個女掛？依家諗返轉頭，
我...我記得...果次同詠恩佢吵大鑊之前果個月，佢好似提過吓話成個半月冇離m架喎，
唔通......
「...咁咩呀，係咪姐？」小苑好心急咁追問。
「...我...我...，點知姐！」我口窒回應。
「...你地果陣到底發生過啲咩事呀？」小苑追問。
「...其實我知嘅野可能仲小過你呀，不如你將你知嘅野講比我知先啦。」我反問。
「...你想知啲咩呀？」小苑諗一諗之後問。
「...我想知我地分左手之後嘅所有野！！」我講。
「...er...我唔知你地幾時分手啦，但係如果我冇估錯，
應該係2010年年中左右！」小苑講。
「...係呀！係呀！2010年6月！」我和應！
「...吖...咪住先，你係咪姓張架？」小苑忽然靈光一閃。
「...你...你點知架？」我面都青埋啦。
「...吖...浠琳全名叫張浠琳呀！！再加埋以上種種嘅蛛絲馬跡，我斷定...」
小苑講都依度吞一吞口水....
「...你就係浠琳嘅爸爸！！！」
「...你就係浠琳嘅爸爸！！！」
「...你就係浠琳嘅爸爸！！！」
小苑嘅依句說話，簡直就好似將我判左死刑咁，我而家嘅心情...就好似有人話比你知，
中左六合彩但係張飛過左期咁...，本來可能會係一個完美嘅結局，但係就係天意弄人，
或者可以話係我太年少輕狂，令到我錯失左好多野。
小苑講左好多野我知，佢話依七年離...詠恩一直都冇拍過拖，
佢地屋企人就算點問，詠恩始終都係唔肯講浠琳嘅爸爸到底係邊個，
就係咁..佢寧願自己一個人默默咁去湊大浠琳，都唔肯講出真相。
其實果陣詠恩大可以搵返我吖，話就話吵大鑊姐，咁如果真係有左我嘅骨肉，
無理由唔搵返我同我商量吓架？我都有權知道真相架嘛，到底詠恩佢有啲咩苦衷姐？
收左線之後我攤左喺張床度成晚都訓唔著，一方面我好內疚...我覺得好對唔住佢地兩母女，
我冇盡過做老豆嘅責任...，令到浠琳佢冇一個美滿嘅童年，另一方面...
我而家已經喺阿瑜同思敏兩個女人之間周旋，如果我而家去搵返詠恩，
咁咪變左四角關係？仲複雜過愛因斯坦嘅相對論，我應該點處理呀！！！
唉～天呀，你係咪要咁樣玩我先？係咪比條路離行吓都唔得先，
唉～我張敬聰都係注定一世都被情所困架啦，真係天意弄人...
我地大家明明都係住喺香港仔，但係依七年離...就從來都冇撞到過，
好似大家都有心避開大家咁。
https://youtu.be/QGHB-5e37Fw
陳奕迅 十面埋伏
聞說你時常在下午 來這裡寄信件
逢禮拜留連藝術展 還是未間斷
何以我來回巡邏 偏仍然和你擦肩
還仍然在各自宇宙 錯過了春天
只差一點點即可以再會面
可惜偏偏剛剛擦過十面埋伏過孤單感更赤裸
總差一點點先可以再會面
彷彿應該一早見過 但直行直過
只差一個眼波 將彼此錯過
遲兩秒搭上地下鐵 能與你碰上麼
如提前十步入電梯 誰又被錯過
和某某從來未預約 為何能見更多
全城來撞你 但最後處處有險阻
只差一點點即可以再會面
可惜偏偏剛剛擦過十面埋伏過孤單感更赤裸
總差一點點先可以再會面
彷彿應該一早見過 但直行直過
只等一個眼波
軌跡改變角度交錯寂寞城市又再探戈
天空閃過燦爛花火和你不再為愛奔波
總差一點點先可以再會面
悔不當初輕輕放過現在懲罰我分手分錯了麼
分開一千天 天天盼再會面
只怕使你先找到我 但直行直過
天都幫你去躲 躲開不見我
我成晚就以淚洗面，差唔多到天光...我先身心俱疲咁訓著左。
臨訓前...我send左個whatapp同阿頭生哥請左日病假，
之後我就失去左知覺啦........
Z......z.....
「....爸爸！」係一把小朋友嘅聲音，係咪叫緊我呀？
「...嘻嘻...阿女快啲追住爸爸啦！」把聲咁似詠恩嘅，係咪詠恩呀？
「...爸爸，等埋我呀！」
「...爸爸，唔好走呀！」
「...爸爸，唔好唔要我呀！！！」
我冇唔要你呀！！
我真係冇呀！！！
.....
.........
「...呼～呼！」我透緊大氣！
「～滴答～！」周圍好寧靜，只有掛牆鐘嘅滴答聲，原來係...發夢！
望望個鐘...原來已經係下午嘅兩點幾，
阿媽應該落左街買餸，而家成間屋空無一人。
我行左入廚房，招牌動作咁打開左個雪櫃隊可樂，然後坐返過梳化果邊。
我沉思左一陣，最後我行返入房洗面刷牙，換好衫褲就行左出街啦。
我去邊？我打算重遊舊地囉，一落到樓下車場，我就揸左部車過海，
返左去香港仔，泊好部車之後，我就行左去詠恩屋企樓下。
我坐左喺佢幢大廈嘅大堂出面，一個百感交集嘅地方。
我記得當年我都坐過喺依個位置等詠恩，
側邊牆身依然遺留住當日我用鎖鑰刮花嘅「I love u yan」字樣......
真係令人懷念。
就係咁...我漫無目的咁坐左喺度，其實我都唔肯定自己喺度等緊啲乜，
可能係想知道個答案掛。等吓...等吓，唔經唔覺就等左個幾鐘，
我發覺等人真係一個無底深淵離架，每次想放棄果陣，
你都仲係會同自己講等多十五分鐘，但係當然係十五分鐘又十五分鐘...
等左咁耐先離放棄，又覺得好唔抵喎，最後我等左差唔多兩個鐘，...忽然.....
「...先生，喺度做咩呀？」一把男人聲，我抬頭一望，竟然係兩個軍裝警察。
「...吓...er...！」我支吾以對！
「...麻煩攞張身分證出離睇睇先！」其中一個應該係沙展嘅警察a講，
於是我就攞左張身分證出離啦。
「唔該，Zulu、六、兩、兩、xxx，尾數六so far！」警察b接過我身分證後報上台。
「...做咩架！」警察a問。
「...er...運輸！」我答。
「...今日放假牙？」警察a問。
「...er...係...係囉！」我口窒回應。
「...係度等咩呀？」警察a繼續問。
「...er...等...等朋友囉。」我答。
「...等咩朋友呀？」警察a繼續追問。
「...er........」我er左幾秒。
「...拿...唔洗er啦，有人投訴話你坐左喺度兩個幾鐘唔知做乜，
你再解釋唔到嘅話，我地唯有做野架姐，到時可能會告你遊蕩，
你自己諗清楚先！」警察a好認真咁警告我，搞到我都真係有小小淆底，
就喺我不知所措唔知點好嘅時候，救星突然出然！