中左六合彩頭獎四千八百萬，依家唔知點算?: 30
第一，我要搞清楚我而家嘅狀況，好明顯我同阿瑜已經係情侶關係，
而同時思敏亦都係我嘅情侶，第二...，而家只有阿瑜單方面知道我同時有兩個女朋友，
而且自己仲係第三者。總結以上資料，思敏當前一定係一個受害者，
而阿瑜喺明知我有女朋友嘅情況下主動介入，而且仲接受我嘅示愛，
咁佢到底算係（受害者）定（加害者）呢？咁其實講到尾都係因為我鍾意阿瑜姐，
阿瑜同我兩情相悅咁冇話對與錯架？咁睇離而家最錯果個應該係我先啱！
我太過拖泥帶水啦，根本由一開始我就唔應該唔嗲唔吊咁，
我應該主動去拒絕思敏，咁就唔會有今日咁嘅果，
好...為左阿瑜亦都為左思敏，我一定要下定決心同思敏做過了斷。
諗諗吓我就訓左，到第二朝...因為係星期六唔洗返工，
我訓到差唔多成十一點先起身。
「...吖....！」我打左個喊路、伸左個懶腰，
斯斯然咁走去廁所刷牙洗面，之後繼續死蛇爛鱔咁行出廳。
「...～去旅行～去到盡！」客廳電視傳離廣告嘅雜聲，
睇離應該係阿妹坐左喺梳化，因為阿媽平時好小會主動開電視睇嘅。
經過走廊，終於都行到出大廳，坐左喺梳化嘅人...竟然係....阿妹啦，
好正常...同平時一樣係開住個電視唔睇，然後hea喺張梳化度撳緊電話，
見到我出離亦都冇主動望我，唔通為左琴晚嘅事佢仲嬲緊我？
我順勢行左入廚房，打開個雪櫃...拎左罐可樂出離隊，
同阿妹異典同工咁開住個雪櫃，一手揸住罐可樂，
一手揸住部電話喺度撳緊。
「...叮～噹～!」但係門鐘又忽然響起喎，
廚房就喺門口隔離，於是我就行左出去開門啦。
「...嚓～！」
「...早晨聰哥！」原來係思敏，點解佢會上離嘅，
佢唔係琴晚返夜咩？應該凌晨四點幾先收工咋喎，
咁早又出現嘅！
「...咦...咁...咁早嘅，唔訓晏啲？」我一邊開門一邊問。
「...夠啦，今日聰哥你要上英皇吖嘛，嘻嘻...我點可以唔陪你呢！」
思敏笑笑口咁講，之後就行左入離啦。
「...咦...文蔚，早呀！」思敏同阿妹講。
「...早晨呀，思敏！」阿妹回應，之後思敏就坐左埋去阿妹側邊啦。
而我呢...就行返入房，梳洗吓...換衫褲再行返出離廳。
「...唔阻你地啦。」阿妹一見到我行返出離，
好快咁自動自覺行返入房。
而我同思敏呢，亦都好快出門口落街，真係皇帝唔急太監急啦，
思敏又係好驚我會遲到，匆匆忙忙咁推左我落停車場攞車，
我再揸住部車去到灣仔。
同上次一樣...我地泊好部車之後本來想去返果間軒尼軒餐廳食早餐，
但係去到果陣原來過左十一點半已經冇早餐食，再者飯市就到...啲人開始多啦，
加上時間都幾緊逼下，所以我地決定去完英皇之後先食野...
最後思敏送到我去英皇樓下就走左，
而我就企左喺大堂度攞左個電話出離打比steven。
「...嘟嘟～」
「...喂！」steven接聽。
「...喂...steven！」我講。
「...係...阿聰，係咪到左啦？」steven問。
「...係...係呀，喺樓下大堂。」我講。
「...好吖，我而家落離！」steven講完之後就收左線。
而我就戇居居咁繼續企左喺個大堂度等，大約五分鐘後...
「...唔好意思要你等！」steven終於都出現啦，佢從其中一部𨋢出離。
「...一陣姐！」我回應，之後steven就帶我入返頭先部𨋢，
再上左其中一層好似係廿七樓。
一出𨋢...係一個好大嘅大堂，中間有一個接待處，
坐左兩個接待小姐喺度。
「...跟我離依邊啦！」而steven同接待員微一微笑之後，
就直行直過咁帶左我由側邊走廊行左入去啦。
穿過走廊見到有好多間房，有啲好似係辦公室、有啲就好似係錄音室咁，
經過其中一間好似錄音室嘅房果陣，我仲𥄫到入面坐左一個我幾鍾意嘅實力派二線女歌星喺度添，
...steven帶左我入其中一間房叫我坐低等陣，然後佢就閂門行返出去啦。
依間房呢...中間一張幾大張嘅橢圓形玻璃枱，圍住有好多張櫈，
天花板仲有一啲投射設備，應該係一間會議室。
「...嚓！」百無聊賴咁坐左喺度幾分鐘之後，
steven再一次推門而入，而且今次仲唔止一個人入離添。
「...久等啦阿聰，等我同你介紹返先，我身邊依位靚女呢，
係我地公司嘅經理人霍小姐。」steven介紹緊佢身邊嘅一個中年女人。
「...唔該哂steven，跟住落離交比我得架啦。」
霍小姐同steven點點頭之後呢，steven就自動自覺咁行返出去啦。
而家淨返我同依個中年女人喺度，場面真係有啲尷尬，大佬steven都話見過吖，
依個霍小姐我見都未見過，又唔知乜水，搞到我唔知講咩好啦。
睇真啲...話就話中年，目測我諗大約四十零歲左右啦，但係個樣望落又ok喎，
似係果啲年紀大左嘅過氣model咁款，長直黑髮、一身OL打扮，顯得好成熟穩重。
「...好啦...阿聰呀呵？等我自我介紹一下先，我叫做mani，係依度嘅經理人。
「...你好...你好！」我回應。諗諗吓個名好似好熟咁嘅！
「...廢話我就唔多講啦，其實我留意左你已經一段時間架啦。」mani講。
「...吓！留意左我一段時間？」我好疑惑咁回應。
「...係...由你比賽果日開始，到你上離我地公司試音，你嘅一舉一動，
我都留意得絲絲入扣入木三分。」mani用專家口吻講，都唔知係唔係架！
「...吓...唔係掛！」我有啲愕然。
「...無錯...長話短說啦，你嘅試音表現我幾滿意，
我地公司想簽你做我地公司嘅新人，你點睇吖？」mani好認真咁問。
「...好呀！」諗左幾秒之後，我好冷靜咁回應。
「...定位、造型、練歌同開會時間喺哂我手上依幾份野度，你可以拎返去參考下，
我相信會對你有幫助。」mani邊講邊放低幾份野喺我面前，一時間令我消化唔到。
「..出席宣傳活動、同出show時間表就要睇你訓練進度再安排，
形象設計方面我地會盡快搵人同你度身...有冇問題？」
我未諗到點回應，mani繼續一輪嘴講野。
「...er...係咪每日都有飯盒食架？」因為仲未諗到答乜，所以我求其問左個無聊問題。
「...你講笑咋嘩？紅左嘅話，每日食魚翅都仲得啦。」但係mani竟然好認真咁答我依個膠問題，
之後就繼續交代返做歌手嘅所有野我知，至於吸收到幾多呢...er...再傾啦。
傾完一輪之後，mani就再安排左下一次嘅會面，
基本上我淨係喺度「哦」同「嗯」。
搞左個零兩個鐘之後，我就離開左英皇。落到樓下已經下午兩點，
因為早餐都未食，所以而家餓到死咁濟。
我一邊打電話比思敏，一邊搵緊附近有啲咩好食，
最後我係唔理好醜、但求就手咁入左巴路士街嘅一間茶餐廳嘅。
「...唔該...比個（日式海鮮炒烏冬），凍奶茶！」一坐低我已經急不及待咁，
即時叫左個下午茶炒粉麵，之後就攞左mani比我嘅果幾份野出離睇吓。
望吓先...有一份係公司資料，上面仲釘左mani張咭片喺度添。
再望望...第二份野係練歌嘅時間表，上面寫哂上堂嘅地點、
時間、要準備嘅野...等等，都真係幾pro架喎！
「...聰哥！」睇吓睇吓，思敏亦都離到，伙計亦都同時放低左碟炒粉。
「...咦...叫埋野食添拿！」思敏坐低之後望一望碟炒粉講。
「...哈哈...係呀，肚餓吖嘛，你都叫野食啦！」我笑笑口咁一邊回應一邊遞左個餐牌比思敏。
「...咦...咩離架？」思敏叫完野食之後，終於都留意到枱面上嘅幾份文件啦。
「...er....！」點講好呢！
「...練歌時間表？...嘩...英皇歌手合約？聰哥佢地...簽左你做歌星牙？」
我都未諗到點答，思敏已經拎起左啲文件喺度睇緊，
仲越睇越興奮，情緒相當之激動。