中左六合彩頭獎四千八百萬，依家唔知點算?: 5
(5)
「...er....er....！」點答好呢！
「...er...我揸uber呀！」人急智生...好彩我轉數快姐。
「...吓...冇做送貨份工啦咩？幾時嘅事離架？」
「...er...依幾日嘅事姐...哈哈...啲friend介紹話做uber搵得多啲吖嘛，咪試吓囉。」唯有繼續吹落去啦。
「...咦...咁阿哥你咪每朝都可以車我返工囉？」阿妹又開始奸笑囉。
「...吓！」嘩....你咁都得牙？
「...嘻嘻...阿哥咁錫我，唔會托我手踭嘅。」吖...你條友仔吖，有事就叫大佬，冇事就乜老母。
「...唉...鬼叫我係你大佬咩！」
「...嘻嘻...好野，以後有靚車坐。」睇到阿妹咁開心，
其實車佢返工都冇咩所謂嘅，之但係點解個傻妹完全冇覺得奇怪嘅？
無啦啦有部咁靚嘅車，不過可能佢唔知價啦...諗諗吓女仔唔識都真係唔奇。
「...係喎，你返工返邊度？」講講吓...差啲唔記得問個傻妹去邊添！
「...跑馬地！」吓...又係跑馬地，睇離我依排同跑馬地都真係幾有緣。
出左香港仔隧道，我揸住部車落橋轉左入體育路...
「...喂...喂...依度挨埋一邊停比我得啦。」阿妹突然叫住我。
「...依度？」我挨埋左一邊，阿妹順勢跳左落車，然後邊講byebye邊走左入去，
吓...依度咪...馬會總部！原來阿妹份筍工..就係馬會牙！！！好邪～呀！！！
返到公司附近，泊好部車之後，我就行返公司啦。
因為揸車返工，所以比起平時足足早左半個鐘到達。
早成咁...緊係去嘆返個早餐先啦。話時話...喺度做左咁耐都好似冇咩點試過喺附近食早餐，
因為平時通常都趕到爆，加上朝早多數冇咩胃口，好啦...一於去公司對面間茶記。
「...早餐a，奶茶多奶！」一坐低我就叫左個早餐。
「...收到！」
叫完早餐，又撳吓電話，
睇吓有啲咩新聞先。
「...咦...阿聰！好小見你離食早餐架喎！」
野食都未到，carol就突然出現。
「...吓...係囉，今日早左起身...哈哈！」咁都撞到carol，希望佢唔記得啦，
唔知點解依家真係面對唔到佢地三個，每次見嚫面都有一種罪惡感。
早餐一到，我就起勢咁食，希望快啲食完快啲走啦，
但係不幸嘅事真係一不離二架。
「...嘩...稀客喎，阿聰都會返離食早餐嘅？」占士同阿榮一齊出現，
而且一見到我同carol就好自然咁坐埋落離。
依個組合，正正就等於買六合彩果一日，我有種不祥嘅預感...
占士同阿榮叫完個早餐，就招牌動作拎左份報紙出離度波，
而我就緊係dup低頭，繼續食我嘅早餐啦。本來都相安無事嘅，
但係占士忽然屎忽痕喎。
「...若要生活好，最緊要買利物浦，今晚就揀你啦。」
占士講完之後，望一望阿榮睇吓阿榮有啲咩意見。
「...ok嘅，加多場熱刺穿穿佢，真係冇得破。」阿榮個樣好同意咁。
「...阿聰...整多場三穿一啦。」頂...占士無啦啦講咩夾錢買波姐。
「...唔...啦，冇錢。」我口塞塞咁答。
「...有錢佬...扮咩冇姐，又買股票又盛咁。」雖然占士平時，間唔中都會咁串我，
但係今次比佢講中左死穴，當堂打左個冷震。
「...係喎...上次咪夾錢買左幾張六合彩嘅？」阿榮突然醒起。
仆街啦...真係記得返啦，玩撚完啦我。
「...係喎，對左未呀？」占士和應，再望一望carol同我。
「...阿聰買吖嘛，果日我走先。」carol答。
「...阿聰唔會中左頭獎自己吞哂掛。」口多嘅占士再下一城，完全比佢講中哂。
「...痴線...中條毛咩，果晚對完唔中唔知掉左飛張去邊啦。」我繼續垂死掙扎，老虎蟹都唔認。
「...咁又係，如果真係中左，阿聰你仲會喺度，走左佬啦。」
好彩占士諗野夠正路，不過佢諗到嘅野我一早就諗到啦，
如果我真係玩失蹤嘅話，你地仲唔報警搵我咩，我先冇咁苯。
就係咁，話題由占士輕輕帶過左之後，
我正式宣布...第一關我成功過度啦，
不過睇離短期內我都唔可以辭職啦...唉。
食完早餐...我地就返到公司開工，一切如常...無驚無險又到六點。
放工我又要鬼鬼鼠鼠咁鼠去停車場攞車，依家每日都好大壓力，
就好似早幾年喺告士打道執到錢果啲人咁，又唔可以用咁，
仲要成日都好驚會比差人發現咁，希望依啲日子快啲過啦。
我公司喺柴灣工業區嘅，開車之後，
我就揸左上（東廊）向住屋企南區進發啦。
「...～當潮流愛新鮮～當旁人愛標籤～幸得伴著你我～是窩心的自然....」電話鈴聲響起。
「...喂...邊位。」我一邊揸車，一邊用藍牙耳機接聽。
「...嘻嘻...我嘅好大佬，喺邊呀？」係細妹，
隔住個電話都feel到佢個樣依家成個奸人堅咁，笑得勁奸。
「...點呀...妹頭，又想痴車坐牙？」
「...嘻嘻...知我者莫大佬也。」
「...咁你喺邊吖？」
「...嘻嘻...咪你今朝放低我果個位囉。」
「...怕左你啦，十分鐘到。」睇離我真係前世欠左個傻妹架。
收左線之後，我即時車手上身，當然...快得離我好小心揸車嘅，
最後我只係用左八分鐘就到達馬會總部門口啦。阿妹一早已經棟左喺度，
但係除左阿妹之外，佢身邊竟然企左另一個人喺度....
「...嘻嘻...唔該阿哥，車埋我朋友你應該都唔會介意架啦...呵！」一開車門，
阿妹就跳左上車，之後阿妹個同事亦都跟住尾行左上離，咦...佢咪係...
「...阿哥，佢係我同事阿瑜呀，順路兜埋佢冇問題架啦你！」
係佢啦...女神呀...唔通我同佢真係咁有緣。
「...打搞哂！」阿瑜望一望司機位嘅我，好有禮貌咁回應，死啦...諗諗吓...
如果佢認得我嘅話，可能會張我中左六合彩頭獎單野話比我個妹聽架喎...點算呢？
好彩開車之後阿妹就係咁聊阿瑜傾計冇乜點理過我，我專心揸車之餘，
不時都會偷望一下阿瑜，但係每次從後鏡望過去，阿瑜都會咁啱望左埋離，
搞到我縮都縮唔切。
時間果得好快，眨下眼已經到左阿瑜屋企。
原來阿瑜係住喺鴨脷洲嘅豪宅架，睇離都有返咁上下家底。