中左六合彩頭獎四千八百萬，依家唔知點算?: 4
(4)
「...不許你注定一人 ～永遠共你去抱緊 ～一生中百樣可能～愛上你是種緣份...」
阿妹嘅電話鬧鐘依舊向起....可能琴晚早訓嘅關係啦，
今朝出奇地精神喎，仲早過阿妹起身咁濟。
沖涼、洗面、刷牙，之後落街搭巴士返工，
一如以往，未夠八點九已經準時到達公司打咭。
一切如常...占士同阿榮兩個例牌落左樓下食早餐，而我呢....就照舊執貨。
執到九點鬆啲，兩條友仔先斯斯然出現，
抵得佢吖...占士個口仲咬住枝牙籤成個老細咁款。
「...阿聰...今日咩環境呀？」醒目嘅阿榮，
見到我執得咁辛苦，即時走左埋離幫我手。
點講呢...雖然我唔算係阿頭，而且佢兩個都成三十尾，
但係我十八歲考車牌之後就一直喺度做到依家都算係老臣子，
所以佢地兩個都會比返幾分薄面，當我半個阿頭。
「...er...同平時差唔多啦，阿榮照舊走港島，占士東九...。」我繼續如常分貨，
睇佢兩個個樣完全唔記得哂六合彩單野...估唔到咁順利。
因為跟單carol冇咩事都唔會專登搵我地，
所以今朝亦都一樣完全冇見過佢出現。
上午如常送貨，中午返到公司都係一樣，我地三個一齊食飯，
但係今日食完飯我緊係唔跟佢地去馬會啦，一陣勾返起佢兩個啲回憶咁點算。
下午依然係一切如常，無驚無險又到六點。
睇離真係我諗多左，根本就冇人會記住...。
「...～當潮流愛新鮮～當旁人愛標籤～幸得伴著你我～是窩心的自然....」
行緊去搭巴士果陣，電話突然響起，死啦...唔會係佢兩個記得返掛。
望吓先...咦...個電話唔識架喎，邊個打比我呢？
「...喂！」
「...喂...張生，b&d車行呀！」哦...原來係車行，
係喎...買左部車架喎，完全冇左件事添。
「...係...係...！」我答。
「...你部車啲手續搞掂哂架啦，出左牌...出左保險...隨時離攞得架啦，唔知你想幾時攞呢。」
男sales好有禮貌咁講，諗諗吓返屋企橫掂都要經過跑馬地，而且緊係想愛車快啲到手架啦。
「...哦...咁我而家過離攞啦！」我答。
「...無問題...張生，咁我等埋你先！」
男sales繼續恭敬，於是我就坐巴士過去跑馬地攞車啦。
因為塞車...去到車行都已經差唔多七點啦，
附近啲舖頭多數已經閂哂門，唯獨果間車行。
「...唔好意思呀...塞車呀！」一入門口我同個sales講。
「...唔緊要，我都唔趕住收工！」你睇吓...假得佢吖...
邊有人唔想早啲收工架，不過條友講野又幾啱聽喎。
循例簽左啲買賣合約，男sales講解吓部車嘅性能，
同檢查吓部車嘅車身之後，我就騎左上我嘅愛驅度啦...yeah!
我揀左我最愛嘅紫黑色，實物出到離真係好鬼死靚，
可能你會問我點解唔買跑車而走去買部七人車，
我諗可能係因為我平時揸開貨van啦，所以比較鍾意揸返啲高身車，
貪佢有電門方便老豆老母上落，又易睇位、空間大、載貨量高...
嘻嘻...講吓講吓啲優點咪即係貨van，但係佢靚仔好多，貨van邊有得比呀。
一揸上手，即時人車合一，八千轉兩米車咁，部車操控一流，
揸得好舒服，真係有啲愛不釋手。因為未租月租車位，
所以部車暫時泊左喺屋企樓下啲日泊車場。
有車真方便呀，泊好車...唔洗三分鐘我就行到返屋企門口啦。
因為今日攞車搞到遲左，所以依家成村人已經坐哂喺飯枱度等緊我開飯啦。
「...今日咁遲嘅？」老豆問我。
「...係呀...東廊塞到爆囉。」是但搵個籍口答啦，反正老豆都唔知架啦。
「...嘻嘻...阿哥...快啲埋離坐啦，好肚餓呀！」
阿妹笑到劉克宣咁，死啦...唔通我走漏左啲咩風聲？
「...嘩...有人生日咩？咁好餸嘅？」嘩...咩事呀，
又鮑魚，又石班咁...越睇就越唔對路喎。
「...你個妹見得成份新工吖嘛，你老豆咪加料囉！」阿媽迅速解答左我嘅疑問，
不過今次老豆真係重手喎，因為收入唔穩定，平時好鬼死慳，估唔到會買鮑魚添。
今餐真係食得好飽，即頭飽到上心口。坐喺梳化消化完一輪之後，
我又開始諗吓跟住落離應該要點運用我依二千幾萬啦。
當然買樓係好緊要，但係點樣拎舊錢可以再搵錢都係一個好嘅問題。
買銀行股收息最穩陣？假設每年收五厘息，攞一千萬買，一年咪可以收返五十萬息？
除返每個月唔洗做都穩袋兩萬幾喎，諗落都係一個唔錯嘅方法。
但係樓個方面此終都係諗唔通，要用一千萬喺返南區買個仲細個我依家公屋嘅豪宅單位喎，
真係點都買唔落手...，唉...日子流流長，有時間都係諗吓用咩方法可以盡快辭職，
離開依家班同事先再講啦。
好快又到左第二朝，今日係星期五，平時會有happy friday嘅興奮，
但係依家唔知點解冇左果種特別嘅感覺，可能而家每日就好似星期五咁開心啦。
買左部新車冇理由唔揸架，所以我今日梳洗完就落左樓下停車場攞車返工啦。
我諗冇問題嘅，去到公司附近嘅停車場泊低，應該都唔會咁似比人見到。
溫完部車之後，我就將我部愛驅開出停車場啦。
「...嘟...！」嘟一嘟八達通，出閘就係咁輕鬆。
「...～吱嘰....！」點知一出街就出事啦，一出停車場門口，
無啦啦有條友衝左出離，之後仲訓低左添。
「...仆街啦！」我驚到面都青埋，死啦...頭先電光火石間唔有冇撞到佢添。
「...啪....！」我開左車門.....唉...死就死啦，都要落車睇吓條友有冇事架啦。
當我打開車門...繞過車門行到去車頭位置，竟然見到有個女仔坐左喺地下，
個人仲好驚咁，...唉...實比人告（老不）啦今次，咦...咪住先...
「...吓...！」
「...吓....！」我地兩個同時吓左出離，
因為原來...係我個妹離架囉...頂佢...嚇q死人咩！
「...阿哥！」阿妹慢慢企返起身叫我。
「...有冇事呀你，比你嚇死呀...無啦啦衝出離。」我講。
「...死啦...死啦，有可能遲到啦...點算呀！」阿妹回過神後，
又開始緊張喺離啦，鬼咩...第一日返工就話遲到，想唔比人炒都唔得啦。
「...上車啦。」見佢咁慘，冇理由見死不救嘅，唯有送佢一程囉。
阿妹一聽到我叫佢上車個樣即時開心返哂，九秒九跳左上離。
「...頭先冇撞到吖嘛？」開車之後我問阿妹。
「...呼...應該冇，不過驚到向後仆低左凳嚫個patpat囉。」阿妹透一透大氣，之後望一望自己講。
「...冇事就好啦，趕還趕...都要睇車架，你估你真係賽跑冠軍咩！」
「...知架啦...知架啦，下次唔會架啦。」阿妹hea我囉。
「...係喎...點解阿哥你會揸住部咁靚嘅七人車嘅？而且仲喺屋企樓下個停車場出離嘅？」
死啦...阿妹突然問起添，早知唔車佢啦....好邪呀!!!!