中左六合彩頭獎四千八百萬，依家唔知點算?: 第一章(2)
(2)
距離佢琴晚所講嘅辦公時間尚餘一個鐘，
最好嘅消磨時間方法當然係打機啦。
因為老豆老母都返哂工，所以依家屋企空無一人，
我照舊攤左喺梳化打左幾舖，時間好快就過。
時間未到，我已經急不及待咁單手拎起部電話，
枱頭望住牆上面個鐘準備倒數啦。
「...10、9、8、7、6、5、4、3、2、1」
倒數完畢，我再一次至電神聖嘅熱線1817，
依然係跟住電話錄音嘅指示一步一步咁撳到去最後啦。
「...早晨！」一位小姐好有禮貌咁同我講早晨。
「...早...早晨！」我驚到口都窒埋咁回應。
「...先生，係咪要登記超過五百萬嘅派彩呢？」
「...係...係呀！」我繼續口窒。
「...恭喜你先，請問係咩彩票呢？係賽馬定係六合彩呢？」
「...六...六合彩，琴晚果期！」
「...明白，請問係以咩方式投注架呢？」
「...er...喺投注站用現金買電腦飛架！」
「...明白...請你繼續提供多啲資料先！」就係咁，
接線生機械式而又禮貌地向我問左好多問題，
包括幾時買喺邊度買，姓名、身份証號碼各樣那樣，
而最令我出奇嘅就係原來連電腦飛上面印左嘅一啲編碼佢都會逐一咁對。
咁艱巨嘅任務終於都完成啦，佢問我想幾時上去領獎喎，
我緊係話即刻啦，攞錢嘅野緊係越快越好架嘛。
所以我早餐都唔食，收線之後就即刻換衫衝左出街啦。
唔知點解呢，身上袋住張二千幾萬嘅六合彩硬係好唔自在嘅，
覺得周圍嘅人都好似想搶你張飛咁嘅樣，差啲就想張張飛收埋喺條底褲度架啦。
受盡精神轟炸，終於都坐巴士出到去跑馬地馬會總部啦。
行入大堂果下我都仲係私私縮縮咁，原來袋住幾千萬喺身真係唔易架。
「先生有啲咩可以幫到你呀？」行到埋接待處，接待員好有禮貌咁問我。
「...er......!」我er左一陣，因為身邊其實都有幾多其他人喺度，
速遞員又有、清潔阿姐又有，所以唔係好敢講出離。
「...先生？」接待小姐個樣打左個問號，
於是我就稍為伸左個頭埋去佢耳邊細細聲講啦。
「...er...領...領獎！」終於都講左出口啦，
明明唔係啲唔見得光嘅野，但係要同人講就硬係覺得怪怪地咁嘅。
「...領獎...？係咩獎呢？」原來接待小姐仲係未明得哂。
「...六合彩頭獎呀！」我終於鼓起勇氣講左出離啦。
「...哦...明白明白，請問先生係咪已經登記同預約左架啦？」
接待小姐當堂明哂，依家撳緊電腦同打緊電話。
「...張生呀呵？ 請等一等負責同事依家落離，你可以喺梳化度坐低等等先。」
接待小姐收左線之後好恭敬咁同我講。
於是我就戇居居咁行埋左一邊啦，等緊果陣見到好多西裝佬出出入入，
有哂保鏢成個名流紳士咁，雖然話我依家中左六合彩都算係個千萬富翁吖，
但係比起佢地就忽然覺得自己好渺小。
人地果啲講緊個個都憶憶聲身家嘅，
唔知我有冇一日可以好似佢地咁經常出入依度呢？
「...張生呀呵？」幻想完一輪之後，負責嘅同事終於都落到離啦。
原來係一個靚女離架，睇落廿五六歲度，瘦身材，留左一把啡色長直髮，
眼大大咁，個樣有幾分似三色台（安樂窩）果個姐仔林穎彤咁，好有陽光氣息。
「...係...！」見到咁靚女，我表現得更加緊張，依家面紅紅咁企左起身。
「...你好，我係賽馬會（顧客服務主任）Sonia tam，要你等咁耐真係唔好意思呀，請跟我離吖！」
sonia好唔好意思咁對住我講，果下微笑都真係殺死人。
講真等攞二千繼萬喎，你叫我坐喺度等三日兩夜我都要照等架啦，
而且sonia仲要咁靚女，直頭係我鍾意果種類型添，等幾耐都冇所謂啦。
Sonia帶住我入左去搭𨋢上到去唔知幾多樓，
之後轉左幾個彎入左去其中一間房度。
我地大家都坐低左之後，sonia就開始幫我對資料啦。
佢協助我填左啲表格，搞完一輪之後，支票終於都到手啦。
望住果張望落都唔知有幾多個零嘅支票真係有份講唔出嘅魔力。
sonia循例講左啲條款比我聽之後，簽完個名...二千四百萬嘅支票終於都到手啦...yeah，
接住果一刻直頭係感動到想喊出離添。
「...咁ok架啦張生，我送你出去吖！」sonia同我講，之後就送左我落樓，
沿途我都仲係對住張支票著哂迷咁目不暇給，到門口果陣sonia對住我講左句
「咁好啦張生，下次贏多啲！」我亦都好有型咁回左佢一句「贏夠啦。」。
走左之後，我仲係心神彷佛咁，此終都未接受到自己成為左千萬富翁依個現實，
依家萬無目的咁沿住黃泥涌道行左去跑馬地公廁果邊。
我入左去廁所，放低左幾兩，洗左個面令自己清醒返啲。
唉...依家諗返起頭先咁好嘅機會點解唔問sonia攞電話呢，
依家走左我諗我依世都未必有機會撞得返佢啦。
算啦...依家有錢，你慌冇女咩，依家當務之急係要快啲處理好依二千四百萬佢，
冇錯啦...去銀行...拿拿臨入左張票先叫做最穩陣。
定左新目標之後，我就沿住電車路行到去跑馬地嘅渣打，
入我果張唔知有幾多個零嘅二千四百萬支票啦。
可能係平日嘅關係啦，加上依家都仲未到食飯時間，
所以依家銀行嘅人流真係比較疏落。
因為冇人排隊嘅關係，我照平時咁行左埋去一個普通櫃位度。
「...唔該，入票。」
「...哦...有冇話想入邊個戶口咁呢？」櫃位小姐一手接過支票同時問我，於是我就拎埋張提款咭出離遞埋比佢啦。
「...er...唔好意思，先生等我一陣。」但係小姐望左張支票十幾秒就忽然叫我等等，
之後就左入櫃位後面唔知搞咩啦。
過左幾分幾鐘，櫃位小姐帶左個睇離高級小小嘅小姐出離，睇個勢似係經理咁款。
「...張生...想入票呀呵，不如跟我過（優先理才）果邊，等我幫你搞啦。」
疑似經理小姐一邊講一邊帶住我行，由平民區去到有梳化位嘅高級區，
入左房之後疑似經理仲叫左個阿姐沖杯咖啡拎離比我飲添，平時邊有咁好服務架，
分分鐘等成個鍾都埋唔到櫃位啦，依家有錢啲人都對你唔同哂。
「...你好呀...張生，我叫Helen 姓伍嘅，係依度嘅經理，張票已經幫張生你入左架啦，
因為見張生你嘅戶口資產去到一定嘅水平，所以已經自動幫你個戶口升級到我地嘅
（優先理才）服務架啦。」搞左幾分鐘之後，經理小姐斯斯思咁同我講。
「...哦...！」我都唔知答佢咩啦，總次就係咁哦啦。
「...係呢...張生，有冇諗過投資吓啲咩咁呀？」經理小姐忽然問左個咁嘅問題。
「...吓...er...冇喎，都唔係好識依啲野！」我口窒窒咁答。
「...其實依家市道咁好，買吓基金回報都唔錯架喎，風險又低，
好似我地公司最近推廣緊果隻（金磚四國）基金咁吖，回報有成四厘幾，
而且我地仲有專人幫你睇住添！」唔講由特止，我都知個經理冇好野架啦，
見到我有二千幾萬就即刻捉我入房係咁sell我買基金，又依樣又果樣咁，
好彩我定力夠，死都話返去同屋企人商量吓先姐，如果唔咪真係分分鐘要放低幾球。
經過一個鐘頭嘅防衛戰，最後經理都要扯白旗投降放我走嘅...YEAH。