中左六合彩頭獎四千八百萬，依家唔知點算?: 第一章1
第1章
咁講四千八百萬咪得返千二萬？雖然話張六合彩四個人都有份姐，
但係而家張飛喺我度，要我由四千八百萬嘔返三千六百萬出離，
得返千二萬我真係過唔到自己。
坐左喺後樓梯，思想掙扎左好耐，
我諗大約坐左半粒鐘左右，我都依然係諗唔到應該點做。
我再一次拎張飛出離，拎住部電話上左馬會個網再次核對
，對左好多好多次，由號碼、日期、至期數每一樣都對到清清楚楚，
證實我今次雖然唔係對住夏春秋離對，但係都真係中到應一應！
之後再望一望側邊，頭獎兩注中，每注派二千四百萬元...
「...屌....！」衝口而出，邊條仆街分左我二千四百萬保佑佢生仔冇屎忽呀。
個心當堂比人插左一刀咁，大佬...無啦啦比人分左二千幾萬呀...
係人都嬲啦，咪住先...而家比人打劫左二千幾萬，
如果再分返三份比同事咪得返六百萬，買個大小小嘅單位都買唔到囉。
今次我諗都唔洗諗，下定決心一定唔會再比人分得我一分一毫，
落差咁大，由四千八百萬到得返六百萬喎，
我諗比著係你可以嘅話你都唔會想再同人分啦。
冷靜過後...我返返入屋，老豆老母依然喺房，
而我阿妹就去完街返左離，而家坐左喺梳化度撳緊電話。
我望一望佢之後就扮到若無其事咁行返入房，好彩阿妹掛住撳電話完全冇理過我，
如果唔係實會忍唔住內心嘅喜悅，到時一個唔覺意講左出離就大檸樂啦。
其實我又唔係話真係咁自私L唔想同屋企人分享嘅，
但係啲錢一日未到手始終都真係唔敢亂咁講出離囉，
更何況依家保唔保得住果二千四百萬都成問題，
係喎...唔講由特止，一講又諗返起分錢單野，就算我唔想分，
但係如果比佢地三個是但一個知道左都真係想唔分都唔得囉。
咪住先....張飛係電腦飛離嘅，佢地三個根本就冇睇過啲號碼，
本來我同carol講話之後會影相send返啲號碼比佢睇，
但係之後做野到收工根本就冇左件事咁我而家應該點做呢？
搵四張今期唔中嘅六合彩飛再Send 比佢？而家有一張真係中左得返三張唔中嘅，
點樣搵多一張唔中嘅頂上呢？去馬會執？點執喎...成間馬會都係人比人見到咪好怪？
咪住先...老豆間中都有買吓六合彩，可能今期佢都有買架喎，
但係咁樣無啦啦走入去問佢，你覺得佢會唔懷疑咩？唉....咁又唔得，
咁又唔得，點解中左六合彩頭獎反而會咁煩惱架！！！
就係咁...我挨左係張床度又諗左半個鐘啦，
到最後...我決定當咩事都冇發生過。
諗諗吓…都成十一點啦，六合彩九點幾就開左，
如果而家先無啦啦send返張相過去咪會更加奇怪，
更何況到依家都冇人主動whatapp或者打電話搵我，
我諗九成九都唔會記得夾份買左六合彩依壇野架啦。
正當我諗通左，嘴角開始奸笑果陣，細妹忽然開門行左入離，
身有屎嘅我嚇到成個人即時彈一彈起，差啲連部電話都飛埋落床。
「...嘩...咩料呀！」阿妹係比較豪爽嘅人，所以講野都比較粗魯，
講下我阿妹先，佢叫文蔚，不過我地唔係姓莫係姓張嘅，
廿三歲讀完大學出離做左一兩年野，好似都係做埋啲跟單文員咁，
有時都覺得依家啲後生真係幾慘，大學生出離都係得果一萬蚊個月，
我依啲細時唔讀書大個做運輸嘅拿埋都講緊搵萬五六啦，
揸大車或者老細車果啲仲去到成兩皮野添，你話啲人有乜辦法唔灰呢！
講返阿妹先，已經唔高架啦，得果153cm，肥妹仔一名，不過好彩皮膚白，
長長頭髮咁都算係個靚女離嘅，而家個男朋友係佢大學同學離，
斯斯文文咁都算係個乖仔離嘅，加上話哂都係大學生，所以我對佢男友都幾有好感。
我同阿妹係訓同再間房嘅，我訓下格佢訓上格，雖然我同細妹年紀差成五年喎，
但係由細到大感情都唔差，有咩開心唔開心都會攞出離傾嘅，
但係今次中左六合彩依壇野，打死都唔可以講住架啦，個傻妹正一大喇叭離架，
比佢知道即係全世界都知道，到時傳到啲唔熟嘅親戚朋友，姨媽姑姐度咪仆街，
到時日日都有人離問我地屋企借錢都有排煩啦，
再加上比佢男朋友知嘅話都唔知會唔會利用個傻妹呃我啲錢架，
暫時都係唔講最穩陣。
「阿哥你冇野吖嘛，發哂呆咁嘅？」死啦...唔係咁快睇得出我有古怪吖嘛？
「...冇...冇野，有啲頭痛姐。」回過神後，求其搵左個籍口答阿妹。
「...洗唔洗啪返兩粒Panadol呀？你塊面好青喎！」
估唔到阿妹咁關心我，第時攞到錢一定要分返啲比佢開心下。
「...哦...唔洗啦，訓下好架啦，阿妹你都早啲訓啦，因住聽朝又遲到呀！」
「...唉...今日收左Warning letter啦！」阿妹嘆一嘆氣。
「...遲左幾多次呀？」
「...er...都十幾次架啦...嘻嘻！」阿妹笑得有啲尷尬。
「...er...十幾次又真係多左啲嘅，早返啲囉！」
「...我都想，但係真係好難架，阿哥你地男人唔明架啦，朝早又要化妝喎，
仲要洗面、吹頭都已經搞一大輪啦，香港仔隧道又成日塞車喎，
好多時都因為條香港仔隧道塞車搞到我遲到囉，屋企樓下又冇港鐵，
專登轉車去黃竹坑搭，部車又細喎得三卡，試過要等幾班車先上到呀，
所以到最後我都係寧願搭返巴士囉。」阿妹一輪咀咁向我訴苦，
搞到我即時想唱返首陳小春嘅鬥苦呀，不過我果啲就真係（啞仔吃黃蓮）有苦自己知啦。
阿妹訴完苦之後，就熄燈爬左上上床啦，而我又開始進入返我自己嘅內心世界，
咪住先...中左頭獎好似要登記架喎？於是我即刻拎返起部電話，
再撳返入馬會個網度，睇下先...撳左一輪都係睇唔明應該點做。
吖...係啦...1817，成日都聽到話要打去1817登記。
於是我細細聲趷返起身，拎埋部電話走左入廁所嘗試打依個咁神秘嘅電玩號碼啦。
「...嘟...嘟....。」
「...歡迎至電馬會熱線，廣東話請按一字。」原來係電話錄音，
我跟住指示一步一步咁撳，到最後.....
「...唔好意思，我地嘅辦理時間係.......請於明日辦工時間內至電登記...」
頂...乜原來要第二日朝頭早先登記得架，收左線之後我坐左喺個廁所度都唔知依家應該做咩好。
一日未登記此終都係覺得唔安全，點算好呀...成晚流流長好難頂架喎。
唯有返入房坐埋部電腦度上網打發吓時間啦。以前成日諗中左六合彩一定要做依樣做果樣，
但係到目前為止，我係一樣都未諗到嘅，掙係諗點唔比人知同點攞錢都已經夠煩....
唔知真係收左錢之後又會點呢！
唔知點解，時間過得好慢，就好似度日如年咁，我坐左喺電腦枱前面繼續亢奮，
諗吓有咩睇先，係喎....睇樓！成日話買樓買樓都要了解下到底點買先得架！
大佬咁大個人莫講話買樓啦，就連出去租樓都未試過啦，到底要點買？
於是我即刻撳哂啲網頁出離，中原呀，美聯呀，大大小小嘅地產網，
了解完一輪之後發現，原來得二千幾萬都真係唔係好多選擇，真係井底之蛙，
以前細個睇（富貴逼人）明明標叔一家買成間別墅都係講緊幾百萬架咋喎！
點解依家喺港島區買個大約一千呎嘅豪宅單位竟然要差唔多二千萬囉，
即係成副身家差唔多揼哂落去先夠！唔拿係掛！！依家樓價真係高到
離哂地囉，睇離要退而求其次搵啲細小小嘅豪宅，再唔係就要住到去新界先得啦。
睇完一輪之後，已經零辰兩點幾，雖然心情依然興奮，但係經過一日嘅辛勞工作，
再加上頭先神打上身嘅行為，身體開始有啲疲態啦。我抑壓住興奮嘅心情嘗試上床訓覺啦。
雖然熄哂燈，但係講真又點會咁快訓得著吖，喺床度轆離轆去，
間中諗到啲野想買又會即刻趷返起身拎起部電話撳兩撳，
如是者不停重複以上動作，到最後我都唔記得我係轆到幾點先訓得著嘅。
「...不許你注定一人 ～永遠共你去抱緊 ～一生中百樣可能～愛上你是種緣份...」
阿妹嘅電話鬧鐘向起.....但係琴晚咁亢奮嘅我而家已經變左一條死魚咁繼續賴皮。
「...喂...阿哥你再唔起身遲到架啦喎！」唔知過左幾耐之後，
阿妹拍一拍我，我個人先開始有反意識。
「...仆街啦...遲到啦！」我彈左起身，即時衝左入廁所梳洗，
途中聽到阿妹返工嘅開門聲，之後我定一定神，係喎...我中左六合彩架喎，
仲洗咩咁驚喎？但係咪住先...無啦啦就唔做實會比佢地三個知有問題啦！
於是我梳洗完之後就返左入房拎起部電話啦。
「...嘟嘟...嘟嘟！」我打左個電話比阿頭生哥。
「...喂！」生哥接聽！
「...喂...生哥牙，我...我唔舒服呀，今日...返唔到工啦！」影帝上身嘅我，
七情上面咁不斷Chok出辛苦聲線，務求要令生哥絕對相信。
「...ng........!」生哥一貫作風唔出聲，喺度ng左好耐！
「...咳咳....！」於是我即時比多小小戲咳多兩聲，睇吓生哥再會有啲咩反應。
「...ng...係咁啦！」生哥依然冇咩反應，用低沉嘅聲音回答我，
不過依句說話正正就係表示准許。
「...呼...！」收線之後鬆一口氣，之後落離又要再一次打去1817挑機啦。