＜＜紋身師──存於平泊殘缺的瑰麗＞＞: 第五章：事過景遷

　　「肅清隊」，一群有統一衣著：笠頭黑色大衣，卻看不出職階分別的制服。

　　專門替協會內的紋身師們幹些不合情不合理不合法的勾當，成員當中有紋身師他們自己，有曾經的顧客，也有想要成為紋身師卻又沒門路的，總之就是雜亂不堪的一個組織。

　　可是，他們每次執行任務都會清空埸地，而且不留半點存在過的痕跡。像外星人一樣只在知情者口中謠傳著。

　　「今次麻煩喇。分開走定一齊走呀？」大飛搖搖頭問。

　　「梗係一齊啦，你唔係諗住掉低我呀？」呀肥一雙肉掌抓緊大飛左臂，手心止不住冒汗。





　　「咪捉咁實啦，你估佢地識唔識聽人話丫拿？」大飛狐疑。

　　「我點知呀，我都係第一次親眼見到『肅清隊』咋，不如我地走番入冊避一避咯？」呀肥回答。

　　大飛用力摟住呀肥的脖子說：「你諗都唔好諗呀！咁辛苦先出番黎，頭都唔好擰轉呀！」

　　「得得得，好痛，好痛。」呀肥嘗試對抗這粗壯的手臂。

　　呀肥：「丫！我聽鐵哥講，見到佢地要收埋自己個紋身，然後扮睇佢地唔到就得架喇。」





　　「鐵哥講果個係二十年前既方法，點睇佢地都似係衝住我地而來啦。」

　　他們就相隔著一條馬路，而「肅清隊」交頭接耳的密語著。

　　不一會兒，其中一個向著他倆大力揮手。

　　「喂，好似唔係黎找麻煩喎。」呀肥也大力揮手作出回應。

　　大飛細看對面在揮手的人：「果個唔會係Ｂ女丫嘛？」





　　「唔拿係掛。」呀肥錯諤了一下：「唔係喎，計番，我地坐左十三碌，Ｂ女今年十八架喇喎。」

　　揮手的黑衣女：「飛哥哥！呀肥哥哥！好耐冇見喇！」

　　「啵你呀摩丫，真係Ｂ女呀！」呀肥忍不住興奮，奔跑到對面。

待續......