Welcome to Knot ~ Season 2: #196. 路比

送咗啫喱入閘，我個心反而仲唔踏實。
以前Sky身邊一直都有呢個人，雖然對我嚟講係有啲失落，但都話晒係個好錫Sky嘅人，有佢留係Sky嘅身邊，我都安心啲。
但係宜家呢？！感覺上就好似得返我一個咁。
哈哈！我係咪好無用呀？！明明已經少咗個情敵，但個感覺仲冇安全感咗，我真係呀～

係頭先嗰程車到，啫喱已經好明確咁講咗俾我知佢同Sky之間宜家係點。佢仲叫我諗清楚其實我最希望同Sky嘅結局會係咩。
「如果真係想發展下，就要把握機會，唔好俾個timing溜走咗。我就係miss咗太多，所以就算係啱嘅人，緣份都只係得咁多，要強求都無用。」啫喱喺機場臨入閘前同我講。
「但係…我驚最後連朋友都冇得做。」呢個係我一直都擔心嘅事。
「傻仔，大家都識咗咁耐啦。你同我都好清楚Sky嘅性格，佢點會為一兩件事，就放棄一段咁長嘅友誼呀？！再講，我同佢嘅關係…宜家我哋咪又繼續做返好朋友！無事嘅，放膽去試，唔得都好，都叫無憾呀嘛！」佢拍咗一拍我膊頭，就轉身入閘。
啫喱都講得啱嘅，死，都唔可以死得不明不白。



道理我係明，可惜我仍然需要啲時間去過一啲心理關口。
上咗的士，我突然唔想返去OC。我認，我係驚緊唔知點面對Sky。可以話我係諗多咗，但我呢刻嘅感覺係好真實。
一個人係台北市四圍咁亂行亂蕩，根本就冇一個目標，我只係唔想返去住。
Send 咗個message返去話今日唔會咁早返，我就繼續出發，一個人係台北闖蕩。

蕩下hea下，竟然嚟到台北小巨蛋附近。
望下表，原來已經晚上11點幾。
呢個鐘數，我決定去Taboo行個圈。
作為一個TB，嚟到台北都唔去Taboo見識下嘅話，其實都幾對唔住自己。



煙嘅氣味、酒嘅味道、嘈雜嘅人聲、音量有啲過份嘅音樂、一個又一個無啦啦會對住你笑嘅美眉、一位又一位我以為會無端端會啤行我，但其實無咁做仲好nice下嘅TB，加起嚟就起咗一種迷幻嘅作用。
明明唔係喺香港，但係呢到嘅氣氛同感覺，反而令我好有親切感。

我選擇自己一個坐埋一邊去享受片刻嘅歡愉。
我唔打算投入呢到任何嘅活動，我只係想做隻塘邊鶴，係側邊感受下氣氛。
突然有個諗法，覺得自己好似個啲準新人咁，要去盡情享受單身嘅最後一晚咁。
哈～ 真係諗多左，撇開唔講Sky接唔接受我，我係咪真係打算表白，連我自己都未知。
點咗酒，我開始無焦點咁四圍望。
身體隨住音樂節奏搖動，間唔中都有一兩個台灣妹走過嚟搭下訕。可惜本大爺今日冇咩心情去溝女，所以都係有禮貌咁打發咗佢哋走就算。


直至我對眼突然俾某種景象吸引住。

就係我11點鐘嘅方向，係舞池嘅最後面，一堆女嘅中間，我發現咗佢嘅身影…