Welcome to Knot ~ Season 2: #194. 樂少

想點啫？！
點解個個都要蝦我喎？宜家我好蝦啲咩？我個額頭刻住「好蝦啲」咩？
森木走嚟蝦我、Scarlett蝦我、Teddy蝦我、青蝦我、宜家連Oppa都蝦我…
嗚～嗚～做咩喎？！

「樂少…點呀你？好喇，夠喇！」睇下！Oppa又蝦我喇！「人出酒你出命，你又真係飲鬼晒我啲酒，仲唔夠皮，要拉我出嚟劈。」
好嘈呀～飲啦講！
「夠喇你！做咩呀？係咪發生咗咩事，唔開心呀？係你話俾我知，我幫你撐。」嘈死人喇！我一個揮手，就將Oppa揮到唔知去咗邊。

以為可以好好咁繼續飲，點知愈嚟愈嘈！


「嘩搞咩呀？今日啲酒唔駛錢咩？係就嚟多round呀！」一聽把死人聲，就知係由細蝦到我大嘅Taz。
「仲講？！幫手啦。」嗯~ 係好好人嘅靖，佢就未蝦過我呢！
「唔係呀？！Oppa一手都得起佢啦。叫我哋過嚟係睇下佢點表演咋？！」Taz你真好嘈呀。
「你係咪睇超人片睇上腦，幫手啦～」Oppa你咪搞我啦，我要飲呀！
「佢咁嘅款，返屋企實嚇死樂師奶，去Knot啦，我俾間客房佢。」點解宜家連靖都蝦我架？我要留係到，飲晒啲酒呀～

做咩要咁對我喎？嗚～我對你哋咁好，你哋一個二個就嚟蝦我！嗚～俾個良心你哋當狗肺呀！
「喂，佢發咩酒癲？係咁喊喎！」人哋咁傷心，衰人Taz你就咪嘈！
「嗱！熱毛巾，俾佢敷下啦。」
「唔該靖。樂少乖，冇事冇事，Oppa係到。」


走開呀～我要返去再飲，唔要瞓係到呀！
「你咪亂郁啦，又唔知自己重！再郁中暈你架！」
「寶貝呀，佢已經暈緊，你再中佢我驚佢死咋。」

咪嘈呀！我頭好痛呀！
嗚～連我個頭都蝦我…
唔係咩？青佢玩我，我對佢真心一片，佢當我痴尻咗線; Teddy又搶走亞青，重要屈係我自作多情、不自量力去追佢條女呀; 諗住同Scarlett表白，佢又話暑假後要返美國，同我係朋友; 森木就返嚟蝦我無用，襯Oppa唔係到就嚟兇我，Oppa返嚟話佢呢，就唔只皮…連骨都收埋; 點知連Oppa都蝦我，竟然咁對我…手信都唔俾份我。
嗚嗚～我唔鐘意你哋呀！

「嘩嚇到我個心離一離，等我以為佢話Oppa你食咗佢隻豬咁重口味添呀！」


「警告你咪成日亂講嘢呀吓！」
「嘩痛呀～寶貝，Oppa拍人個頭呀～」
「你乖啦，無事！啫喱，睇嚟你都要打俾Sky同路比，提佢哋返嚟嘅時候要專程買份手信俾樂少之餘，重要幫你買多份添喎！」